ﺍﻟﺴﻔﺎﺭﺓ ﺍﻟﻤﺼﺮﻳﺔ ﺑﺪﺑﻲ ،،،،
ﻇﻞ ﻳﻮﺳﻒ ﺟﺎﻟﺴﺎً ﻏﻴﺮ ﻣﺼﺪﻗﺎً ﻟﻤﺎ ﻓﻌﻞ ﻟﻠﺘﻮ ، ﻟﻘﺪ ﻭﻗﻊ ﺑﻴﺪﻩ ﻋﻠﻰ ﻭﺛﻴﻘﺔ ﺍﻧﻬﺎﺀ ﺣﻴﺎﺗﻪ ﺣﻴﻨﻤﺎ ﻗﺮﺭ ﺍﻻﻧﻔﺼﺎﻝ ﻋﻦ ﻧﺪﻯ ..
ﻛﻢ ﻫﻮ ﻣﺆﻟﻢ ﺫﺍﻙ ﺍﻟﺸﻌﻮﺭ .. ﻟﻘﺪ ﺧﺬﻟﻬﺎ ﻓﺎﺳﺘﺤﻖ ﻟﻌﻨﺘﻬﺎ ...
ﺗﻮﺟﻪ ﻳﻮﺳﻒ ﺑﻌﺪ ﺫﻟﻚ ﺇﻟﻰ ﺍﻟﻤﻄﺎﺭ ﺍﻟﺪﻭﻟﻲ ﺑﺪﺑﻲ ﻟﻜﻲ ﻳﺤﺠﺰ ﺃﺣﺪ ﺍﻟﺘﺬﺍﻛﺮ ﺍﻟﻌﺎﺋﺪﺓ ﻟﻠﻘﺎﻫﺮﺓ ، ﻭﻟﻜﻦ ﻟﻢ ﻳﻜﻦ ﻫﻨﺎﻙ ﺃﻱ ﺗﺬﺍﻛﺮ ﻣﺘﻮﻓﺮﺓ ﺇﻻ ﺑﻌﺪ ﻳﻮﻣﻴﻦ .. ﺳﺄﻝ ﻳﻮﺳﻒ ﻋﻦ ﺍﻣﻜﺎﻧﻴﺔ ﺍﻟﺴﻔﺮ ﺑﻤﺎ ﻳﺴﻤﻰ ﺑـﺎﻟـ ( ﺗﺮﺍﻧﺰﻳﺖ ) - ﺃﻱ ﺍﻟﺴﻔﺮ ﻟﺒﻠﺪ ﻗﺮﻳﺐ ﻣﻦ ﺩﻭﻟﺔ ﺍﻻﻣﺎﺭﺍﺕ ﺛﻢ ﺍﺳﺘﻘﻼﻝ ﻃﺎﺋﺮﺓ ﻣﻦ ﻫﻨﺎﻙ ﺇﻟﻰ ﻣﻄﺎﺭ ﺍﻟﻘﺎﻫﺮﺓ ﺍﻟﺪﻭﻟﻲ ، ﻭﻟﻜﻨﻬﺎ ﻟﻢ ﺗﻜﻦ ﻣﺘﻮﻓﺮﺓ ﺃﻳﻀﺎً ﺇﻻ ﺑﻌﺪ ﻳﻮﻡ .. ﻟﺬﺍ ﻋﻠﻴﻪ ﺃﻥ ﻳﻤﻜﺚ ﻟﻴﻠﺔ ﺃﺧﺮﻯ ﻓﻲ ﺃﺣﺪ ﺍﻟﻔﻨﺎﺩﻕ ﺍﻟﻘﺮﻳﺒﺔ ﻣﻦ ﺍﻟﻤﻄﺎﺭ ﺣﺘﻰ ﻳﺴﺎﻓﺮ ﻓﻲ ﺍﻟﻐﺪ ﻋﻦ ﻃﺮﻳﻖ ﺍﻟـ ( ﺗﺮﺍﻧﺰﻳﺖ )
ﺃﺧﺮﺝ ﻳﻮﺳﻒ ﻫﺎﺗﻔﻪ ﺍﻟﻤﺤﻤﻮﻝ ، ﻭﻗﺮﺭ ﺃﻥ ﻳﻔﺘﺤﻪ ﺃﺧﻴﺮﺍً .. ﻓﻮﺟﺪ ﻣﺌﺎﺕ ﺍﻟﻤﻜﺎﻟﻤﺎﺕ ﺍﻟﻔﺎﺋﺘﺔ ﻣﻦ ﺃﺑﻮﻳﻪ ..
ﺍﺗﺼﻞ ﺑﻮﺍﻟﺪﺗﻪ ﻭﺑﺼﻮﺕ ﻣﺘﺤﺸﺮﺝ ﻣﺨﻨﻮﻕ ﺃﺧﺒﺮﻫﺎ ﺑـ ...
- ﻳﻮﺳﻒ ﻫﺎﺗﻔﻴﺎً : ﺍﻟﻮﻭﻭ
- ﻋﺒﻴﺮ ﺑﺨﻀﺔ : ﺍﻧﺖ ﻓﻴﻦ ﻳﺎ ﺑﻨﻲ ، ﺩﻩ ﺍﻧﺎ ﺑﻄﻠﺒﻚ ﻣﻦ ﺍﻣﺒﺎﺭﺡ ﻛﺎﻧﺖ ﻋﺎﻭﺯﺓ ﺃﻗﻮﻟﻚ ﺍﻭﻋﻰ ﺁﺁﺁ ...
- ﻳﻮﺳﻒ ﻣﻘﺎﻃﻌﺎً ﺑﻨﺒﺮﺓ ﺣﺰﻳﻨﺔ ﻣﺨﺘﻨﻘﺔ : ﻃﻠﻘﺘﻬﺎ ... ﻃﻠﻘﺘﻬﺎ ﻳﺎ ﺃﻣﻲ ﺧﻼﺹ
- ﻋﺒﻴﺮ ﺑﺼﺪﻣﺔ : ﺍﻧﺖ .. ﺍﻧﺖ ﺑﺘﻘﻮﻝ ﺍﻳﻪ ؟
- ﻳﻮﺳﻒ : ﻃﻠﻘﺘﻬﺎ ﻭﻫﻲ ﻣﻈﻠﻮﻣﺔ ﻋﺸﺎﻥ ﺍﻟﻜﻞ ﻳﺮﺗﺎﺡ
- ﻋﺒﻴﺮ : ﻋﻤﻠﺖ ﻛﺪﻩ ﻟﻴﻪ ؟
- ﻳﻮﺳﻒ : ﻃﻠﻘﺘﻬﺎ ﻭﺣﻜﻤﺖ ﻋﻠﻰ ﻧﻔﺴﻲ ﺃﺷﻴﻞ ﺫﻧﺒﻬﺎ ﻃﻮﻝ ﺍﻟﻌﻤﺮ
- ﻋﺒﻴﺮ : ﻳﻮﺳﻒ
- ﻳﻮﺳﻒ : ﺧﻼﺹ ﻳﺎ ﺃﻣﻲ ﻫﻲ ﺑﻌﺪﺕ ﻋﻨﻲ ﻭﻣﻌﺪﺗﺶ ﻟﻴﻬﺎ ﻭﺟﻮﺩ ، ﻫﻲ ﺣﻠﻢ ﺟﻤﻴﻞ ﺿﺎﻉ ﻣﻨﻲ ﺑﺴﺒﺐ ﺗﺴﺮﻋﻲ ﻭﻏﺒﺎﺋﻲ
- ﻋﺒﻴﺮ : ﻟﻴﻪ ﻋﻤﻠﺖ ﻛﺪﻩ .. ﻟﻴﻴﻴﻴﻴﻪ ؟؟؟
- ﻳﻮﺳﻒ : ﻣﺶ ﺩﻩ ﺍﻟﻠﻲ ﻛﻨﺘﻲ ﻋﺎﻭﺯﺍﻩ
- ﻋﺒﻴﺮ : ﻷ ﻳﺎ ﺑﻨﻲ .. ﺃﻧﺎ .. ﺃﻧﺎ ﻋﺮﻓﺖ ﺍﻧﻲ ﻇﻠﻤﺖ ﻧﺪﻯ ﻭﻛﻨﺖ ﻋﺎﻭﺯﺓ ﺃﻗﻮﻟﻚ ﻣﺎﺗﻄﻠﻘﻬﺎﺵ
- ﻳﻮﺳﻒ : ﺑﻌﺪ ﺍﻳﻪ ﺑﺘﻘﻮﻟﻴﻠﻲ ﻛﺪﻩ ؟؟؟ ﺑﻌﺪ ﻣﺎ ﺧﻼﺹ ﻛﻞ ﺣﺎﺟﺔ ﺧﻠﺼﺖ ﻭﺍﻧﺘﻬﺖ ..
- ﻋﺒﻴﺮ : ﻳﺎ ﺑﻨﻲ ﺃﻧﺎ ﺁﺁﺁ ... ﺍﻟﻮﻭﻭ .. ﺍﻟﻮﻭﻭ ﻳﻮﺳﻒ ، ﺭﺩ ﻋﻠﻴﺎ !
ﺃﻏﻠﻖ ﻳﻮﺳﻒ ﺍﻟﺨﻂ ، ﻓﻠﻢ ﻳﻌﺪ ﻗﺎﺩﺭﺍً ﻋﻠﻰ ﺍﻟﺤﺪﻳﺚ .. ﻇﻞ ﻳﺒﻜﻲ ﺑﺤﺮﻗﺔ ﻋﻠﻰ ﻓﺮﺍﻗﻬﺎ .. ﻛﺎﺩ ﻳﺨﺘﻨﻖ ﺑﻌﺒﺮﺍﺗﻪ ، ﺑﺂﻫﺎﺗﻪ ، ﺑﺄﺣﺰﺍﻧﻪ ، ﻭﻟﻜﻦ ﻣﻦ ﺳﻴﻨﺠﺪﻩ ؟؟ ﻣﻦ ﺳﻴﺴﺘﻤﻊ ﺇﻟﻴﻪ ؟؟
..................................
ﻓﻲ ﺷﺮﻛﺔ Two Brothers ،،،،،،
ﺗﻮﺍﺟﺪﺕ ﻋﻠﻴﺎﺀ ﻋﻠﻰ ﻏﻴﺮ ﻋﺎﺩﺗﻬﺎ ﻣﻨﺬ ﺍﻟﺼﺒﺎﺡ ﺍﻟﺒﺎﻛﺮ ﻓﻲ ﺍﻟﺸﺮﻛﺔ ، ﺣﺘﻰ ﺃﻧﻬﺎ ﺟﺎﺀﺕ ﻗﺒﻞ ﻣﻮﻋﺪﻫﺎ ﺍﻟﻤﺤﺪﺩ ﺑﺴﺎﻋﺔ ، ﺗﻔﺎﺟﻲﺀ ﺳﺎﻋﻲ ﺍﻟﻤﻜﺘﺐ ﺑﻮﺟﻮﺩﻫﺎ ، ﻭﻇﻦ ﺃﻧﻬﺎ ﻭﺭﺍﺋﻬﺎ ﻋﻤﻞ ﻣﺎ ﻣﺘﺄﺧﺮ ﺗﺮﻳﺪ ﺍﻧﺠﺎﺯﻩ ، ﻭﻟﻜﻨﻬﺎ ﻛﺎﻧﺖ ﺗﺨﻄﻂ ﻟﺸﻲﺀ ﻣﺎ ..
ﺩﻟﻔﺖ ﻋﻠﻴﺎﺀ ﺇﻟﻰ ﻣﻜﺘﺐ ﻣﺮﻭﺍﻥ ﺗﻔﺘﺶ ﻓﻲ ﻣﺤﺘﻮﻳﺎﺗﻪ ، ﺃﺧﺬﺕ ﺗﻔﺤﺺ ﺍﻟﻤﻠﻔﺎﺕ ﺑﺤﺮﺹ ﺷﺪﻳﺪ ، ﺛﻢ ﺗﻀﻌﻬﺎ ﻓﻲ ﻣﻜﺎﻧﻬﺎ ﻋﻠﻰ ﺍﻟﺮﻓﻮﻑ ﺃﻭ ﻋﻠﻰ ﺳﻄﺢ ﺍﻟﻤﻜﺘﺐ .. ﻟﻢ ﺗﺠﺪ ﻣﺎ ﻛﺎﻧﺖ ﺗﺒﺤﺚ ﻋﻨﻪ ، ﺯﻓﺮﺕ ﻓﻲ ﺿﻴﻖ ﻭﺧﺮﺟﺖ ﻟﺘﺠﻠﺲ ﻋﻠﻰ ﻣﻜﺘﺒﻬﺎ ..
- ﻋﻠﻴﺎﺀ ﺑﻀﻴﻖ : ﻣﺶ ﻣﻮﺟﻮﺩﻳﻦ ﻫﻨﺎ ؟؟ ﻃﺐ ﻳﺎ ﺗﺮﻯ ﻭﺩﺍﻫﻢ ﻓﻴﻦ ، ﺍﻭﻭﻭﻭﻑ .. ﺩﻩ ﻛﺪﻩ ﺍﻟﻤﺪﺍﻡ ﻣﺎﻳﺎ ﻫﺘﺰﻋﻞ ﺃﻭﻭﻭﻱ .. ﻭﺩﻱ ﺯﻋﻠﻬﺎ ﺻﻌﺐ ﺃﻭﻱ !
ﺟﺎﺀﺕ ﺍﻟﺴﻜﺮﺗﻴﺮﺓ ﺭﻳﻬﺎﻡ ﺇﻟﻰ ﻣﻜﺘﺐ ﺍﻟﺴﻜﺮﺗﺎﺭﻳﺔ ﻭﺗﻔﺎﺟﺌﺖ ﺑﻮﺟﻮﺩ ﻋﻠﻴﺎﺀ ﻓﻲ ﻫﺬﺍ ﺍﻟﻮﻗﺖ ﻭ ..
- ﺭﻳﻬﺎﻡ ﺑﺘﻌﺠﺐ : ﺍﻧﺘﻲ ﺑﺘﻌﻤﻠﻲ ﺍﻳﻪ ﻓﻲ ﺍﻟﺸﺮﻛﺔ ﻣﻦ ﺑﺪﺭﻱ ؟
- ﻋﻠﻴﺎﺀ ﻭﻫﻲ ﺗﻨﻈﺮ ﻟﻄﻼﺀ ﺃﻇﺎﻓﺮﻫﺎ : ﻋﺎﺩﻱ
- ﺭﻳﻬﺎﻡ : ﻷ ﻣﺶ ﻋﺎﺩﻱ ، ﺩﻩ ﻣﺎﻓﻴﺶ ﺣﺪ ﺟﻪ ﻟﺴﻪ
- ﻋﻠﻴﺎﺀ : ﻛﻞ ﻭﺍﺣﺪ ﺣﺮ ، ﺃﻧﺎ ﺑﺤﺐ ﺃﻟﺘﺰﻡ ﻓﻲ ﺷﻐﻠﻲ ﺃﻭﻱ ، ﺃﻇﻦ ﺍﻥ ﺩﻱ ﺣﺎﺟﺔ ﻣﺘﺰﻋﻠﺶ
- ﺭﻳﻬﺎﻡ ﻭﻫﻲ ﺗﻨﻈﺮ ﻟﻬﺎ ﺑﻨﻈﺮﺍﺕ ﻏﻴﺮ ﻣﺼﺪﻗﺔ : ﻣﻤﻤﻢ ...
ﻟﻤﺤﺖ ﻋﻠﻴﺎﺀ ﻣﻦ ﺯﺟــﺎﺝ ﺍﻟﻤﻜﺘﺐ ﺍﻟﻌﺎﻛﺲ ﻭﺻﻮﻝ ﺭﺏ ﻋﻤﻠﻬﺎ ﺍﻟﺴﻴﺪ ﻣﺮﻭﺍﻥ ﺇﻟﻰ ﺍﻟﺸﺮﻛﺔ ، ﻓﻘﺮﺭﺕ ﺃﻥ ﺗﺴﺘﻐﻞ ﺍﻟﻔﺮﺻﺔ ﻭ ...
- ﻋﻠﻴﺎﺀ ﻭﻫﻲ ﺗﻨﻬﺾ ﻣﻦ ﻣﻜﺎﻧﻬﺎ ﺑﺼﻮﺕ ﻧﺎﻋﻢ : ﺃﻧﺎ ﻫﺎﺭﻭﺡ ﺃﻋﻤﻠﻲ ﻧﺴﻜﺎﻓﻴﻪ ، ﺗﺤﺒﻲ ﺃﻋﻤﻠﻚ ﻣﻌﺎﻳﺎ
- ﺭﻳﻬﺎﻡ ﺑﺎﻗﺘﻀﺎﺏ : ﻷ
- ﻋﻠﻴﺎﺀ ﺑﺼﻮﺕ ﺃﻛﺜﺮ ﻧﻌﻮﻣﺔ : ﺑﺮﺍﺣﺘﻚ ﺩﻩ ﺍﻧﺎ ﻛﻨﺖ ﺣﺎﺑﺔ ﺃﺭﻳﺤﻚ ﻭﻛﺪﻩ
ﻛﺎﻧﺖ ﻋﻠﻴﺎﺀ ﺗﻨﻈﺮ ﻣﺘﻌﻤﺪﺓ ﻓﻲ ﺍﺗﺠﺎﻩ ﺭﻳﻬﺎﻡ ، ﺣﺘﻰ ﺗﺼﻄﺪﻡ ﻋﻨﻮﺓ ﺑﻤﺮﻭﺍﻥ ﻭﻫﻮ ﻳﺪﻟﻒ ﻟﺪﺍﺧﻞ ﺍﻟﻤﻜﺘﺐ ، ﻭﺑﺎﻟﻔﻌﻞ ﻧﺠﺤﺖ ﺧﻄﺘﻬﺎ ...
ﺣﻴﺚ ﺃﺩﻋﺖ ﺃﻧﻬﺎ ﺗﻌﺜﺮﺕ ﻓﻲ ﻣﺸﻴﺘﻬﺎ ، ﻭﺃﻟﻘﺖ ﺑﻨﻔﺴﻬﺎ ﻓﻲ ﺃﺣﻀﺎﻥ ﻣﺮﻭﺍﻥ ، ﺍﻟﺬﻱ ﺗﻔﺎﺟﻲﺀ ﺑﻬﺎ ﺗﺴﻘﻂ ﻓﺄﻣﺴﻜﻬﺎ ﻋﻠﻰ ﺍﻟﻔﻮﺭ ﻭ ...
- ﻋﻠﻴﺎﺀ : ﺁﺁﺁﺁﻩ
- ﻣﺮﻭﺍﻥ ﻭﻫﻮ ﻳﺴﻨﺪﻫﺎ : ﺣﺎﺳﺒﻲ
ﻭﻗﻔﺖ ﺭﻳﻬﺎﻡ ﻣﺸﺪﻭﻫﺔ ﺑﻤﺎ ﻳﺤﺪﺙ ، ﻓﻘﺪ ﻛﺎﻥ ﻳﺒﺪﻭ ﺃﻥ ﺍﻷﻣﺮ ﻛﻠﻪ ﻣﻔﺘﻌﻞ ﻭ ...
- ﺭﻳﻬﺎﻡ ﺑﺼﺪﻣﺔ : ﻳﺨﺮﺑﻴﺘﻚ .. ﺩﻩ .. ﺩﻩ ﺍﻧﺘﻲ ﻣﺼﻴﺒﺔ
ﺗﻌﻤﺪﺕ ﻋﻠﻴﺎﺀ ﺃﻥ ﺗﺠﻌﻞ ﺛﻘﻞ ﺟﺴﺪﻫﺎ ﺑﺎﻟﻜﺎﻣﻞ ﻣﺤﻤﻼً ﻋﻠﻰ ﺟﺴﺪ ﻣﺮﻭﺍﻥ ﻟﺘﻠﺘﺼﻖ ﺃﻛﺜﺮ ﺑﻪ ، ﺛﻢ ﻣﺪﺕ ﻳﺪﻫﺎ ﻟﺘﻠﻤﺲ ﺭﻗﺒﺘﻪ ﺑﺄﺻﺎﺑﻌﻬﺎ .. ﻻﺣﻆ ﻣﺮﻭﺍﻥ ﻣﺎ ﺗﻔﻌﻠﻪ ، ﻓﺄﺑﻌﺪﻫﺎ ﻋﻨﻪ ﻋﻠﻰ ﺍﻟﻔﻮﺭ ﻭ ..
- ﻣﺮﻭﺍﻥ ﺑﺤﺪﺓ : ﺧﺪﻱ ﺑﺎﻟﻚ ﻭﺍﻧﺘﻲ ﻣﺎﺷﻴﺔ
- ﻋﻠﻴﺎﺀ ﺑﺼﻮﺕ ﺳﺎﺣﺮ ﺧﺎﻓﺖ : ﺃﻭﻭﻭﻩ ، ﺳﻮﺭﻱ .. ﺃﻧﺎ .. ﺃﻧﺎ ﻣﺸﻮﻓﺘﺶ ﺣﻀﺮﺗﻚ ، ﻛﻨﺖ ﻣﺮﻛﺰﺓ ﻓﻲ ﺣﺎﺟﺔ ﺗﺎﻧﻴﺔ
- ﻣﺮﻭﺍﻥ ﻭﻫﻮ ﻳﻨﻈﺮ ﻟﻬﺎ ﺑﻨﻈﺮﺍﺕ ﻏﺎﺿﺒﺔ : ﻷ ﺭﻛﺰﻱ ﻛﻮﻳﺲ ﺑﻌﺪ ﻛﺪﻩ .. ﻋﻦ ﺍﺫﻧﻚ
ﻭﻗﻔﺖ ﻋﻠﻴﺎﺀ ﺗﻨﻈﺮ ﻟﻪ ﺑﻨﻈﺮﺍﺕ ﻏﻴﺮ ﺑﺮﻳﺌﺔ .. ﻣﻤﺎ ﺟﻌﻞ ﻣﺮﻭﺍﻥ ﻳﻀﻄﺮﺏ ﻭﻳﻘﻠﻖ ﻣﻨﻬﺎ ..
ﺛﻢ ﺍﺑﺘﻌﺪ ﻋﻨﻬﺎ ﻣﺴﺮﻋﺎً، ﻭﺩﻟﻒ ﺇﻟﻰ ﻣﻜﺘﺒﻪ ، ﺛﻢ ﺃﻏﻠﻖ ﺍﻟﺒﺎﺏ ﺑﻌﻨﻒ ﺧﻠﻔﻪ ... ﺍﻧﺘﻔﻀﺖ ﺭﻳﻬﺎﻡ ﻋﻠﻰ ﺍﺛﺮ ﺍﻟﻄﺮﻗﺔ ، ﻭﻟﻜﻨﻬﺎ ﻛﺎﻧﺖ ﻭﺍﺛﻘﺔ ﺃﻧﻬﺎ ﺑﺴﺒﺐ ﻣﺎ ﻓﻌﻠﺖ ﻋﻠﻴﺎﺀ .. ﺭﻛﻀﺖ ﺭﻳﻬﺎﻡ ﺧﻠﻒ ﻋﻠﻴﺎﺀ ﻟﺘﻮﺑﺨﻬﺎ ﻭ ...
- ﺭﻳﻬﺎﻡ ﺑﻨﺒﺮﺓ ﺣﺎﺩﺓ : ﺍﻧﺘﻲ ﺍﺗﺠﻨﻨﻲ ؟؟ ﺍﺯﺍﻱ ﺗﻌﻤﻠﻲ ﺣﺎﺟﺔ ﺯﻱ ﺩﻱ
- ﻋﻠﻴﺎﺀ ﺑﺒﺮﻭﺩ : ﻫﻮ ﺃﻧﺎ ﻋﻤﻠﺖ ﺣﺎﺟﺔ ، ﺩﻩ ﺃﻧﺎ ﻭﻗﻌﺖ ﻗﺼﺎﺩﻙ
- ﺭﻳﻬﺎﻡ : ﻫﻮ ﺍﻧﺘﻲ ﺑﺘﺴﻤﻲ ﺩﻱ ﻭﻗﻌﺔ ؟؟؟
- ﻋﻠﻴﺎﺀ ﻭﻫﻲ ﺗﺒﺘﻌﺪ ﻋﻨﻬﺎ : ﻳﻮﻭﻭﻩ ، ﺃﻧﺎ ﻛﺪﻩ ﻣﺶ ﻫﺄﻟﺤﻖ ﺃﺧﻠﺺ ﺍﻟﻨﺴﻜﺎﻓﻴﺔ .. ﻋﻦ ﺍﺫﻧﻚ !..
ﺗﻌﻤﺪﺕ ﻋﻠﻴﺎﺀ ﺃﻥ ﺗﺜﻴﺮ ﺣﻨﻖ ﺭﻳﻬﺎﻡ ﺃﻛﺜﺮ ﺑﺄﺳﻠﻮﺑﻬﺎ ﺍﻟﻔﻆ ﻭﺍﻟﺒﺎﺭﺩ ... ﻭﻟﻜﻦ ﻛﺎﻧﺖ ﺭﻳﻬﺎﻡ ﻟﻬﺎ ﺑﺎﻟﻤﺮﺻﺎﺩ ﻭ ..
- ﺭﻳﻬﺎﻡ ﺑﻨﻈﺮﺍﺕ ﻣﺘﻮﻋﺪﺓ : ﺍﻟﻈﺎﻫﺮ ﺍﻥ ﺩﻩ ﻫﺎﻳﻜﻮﻥ ﺃﺧﺮ ﻳﻮﻡ ﻟﻴﻜﻲ ﻓﻲ ﺍﻟﺸﺮﻛﺔ ﻳﺎ .. ﻳﺎ ﻋﻠﻴﺎﺀ !
...............................
ﻓﻲ ﺩﺍﺧﻞ ﻣﻜﺘﺐ ﻣﺮﻭﺍﻥ ،،،،
ﺍﻧﺰﻋﺞ ﻣﺮﻭﺍﻥ ﻛﺜﻴﺮﺍً ﻣﻤﺎ ﻓﻌﻠﺘﻪ ﺗﻠﻚ ﺍﻟﺤﻤﻘﺎﺀ ﺑﺎﻟﺨﺎﺭﺝ ، ﻓﻬﻮ ﻳﺪﺭﻱ ﺗﻤﺎﻣﺎً ﺃﻥ ﺗﻠﻚ ﺍﻷﺳﺎﻟﻴﺐ ﺍﻟﺮﺧﻴﺼﺔ ﻟﻦ ﺗﺠﺪﻱ ﻣﻌﻪ ﻧﻔﻌﺎً ، ﻷﻧﻪ ﺳﺒﻖ ﻭﻣﺮﺕ ﻋﻠﻴﻪ ﺟﻤﻴﻌﻬﺎ ﻓﻲ ﻣﺮﺍﺣﻞ ﺳﺎﻳﻘﺔ ﻣﻦ ﺣﻴﺎﺗﻪ ، ﻭﺍﻵﻥ ﻟﻦ ﺗﻌﻴﺪ ﺍﻟﻜﺮﺓ ﺗﻠﻚ ﺍﻟﻔﺘﺎﺓ ﺍﻟﻤﺪﺳﻮﺳﺔ ..
ﻛﺎﻥ ﻣﺮﻭﺍﻥ ﻳﻨﻮﻱ ﺍﻟﺘﺨﻠﺺ ﻣﻨﻬﺎ ، ﻓﻮﺟﻮﺩﻫﺎ ﻳﻤﺜﻞ ﺗﻬﺪﻳﺪﺍً ( ﺃﺧﻼﻗﻴﺎً ) ﻟﻪ ﻗﺒﻞ ﺃﻥ ﻳﻜﻮﻥ ﻣﻬﻨﻴﺎً ...
ﻟﺬﺍ ﻗﺮﺭ ﺃﻥ ﻳﻄﻠﺐ ﺻﺪﻳﻘﻪ ﻳﻮﺳﻒ ﻭﻳﺒﻠﻐﻪ ﺑﻬﺬﺍ ﺍﻟﻘﺮﺍﺭ ، ﻇﻞ ﻳﺘﺼﻞ ﺑﻪ ﻋﺪﺓ ﻣﺮﺍﺕ ، ﻭﻟﻜﻦ ﻳﻮﺳﻒ ﻟﻢ ﻳﺠﺐ ﻋﻠﻰ ﺍﺗﺼﺎﻻﺗﻪ ﺍﻟﻤﺘﻜﺮﺭﺓ ... ﻭﻟﻜﻦ ﻣﺮﻭﺍﻥ ﻟﻢ ﻳﺴﺘﺴﻠﻢ ﻓﺎﻷﻣﺮ ﻫﺎﻡ ﻭﻻ ﻳﺤﺘﻤﻞ ﺍﻟﺘﺄﺟﻴﻞ ...
ﻓﻲ ﺍﻟﻨﻬﺎﻳﺔ ﺍﺟﺎﺏ ﻳﻮﺳﻒ ﻋﻠﻰ ﺍﻻﺗﺼﺎﻝ ﻭ ...
- ﻣﺮﻭﺍﻥ ﻫﺎﺗﻔﻴﺎً ﻭﻫﻮ ﻳﻤﺰﺡ : ﻫﻮ ﺍﻟﻠﻲ ﺑﻴﺘﺠﻮﺯ ﺑﻴﻘﺎﻃﻊ ﺍﻟﻨﺎﺱ ﻭﻻ ﺍﻳﻪ ؟؟؟
- ﻳﻮﺳﻒ ﺑﺼﻮﺕ ﻣﺨﺘﻨﻖ : ﻃﻠﻘﺘﻬﺎ
- ﻣﺮﻭﺍﻥ ﺑﻌﺪﻡ ﻓﻬﻢ : ﻃﻠﻘﺖ ﻣﻴﻦ ؟
- ﻳﻮﺳﻒ : ﺧﻼﺹ ﻃﻠﻘﺖ ﻧﺪﻯ
- ﻣﺮﻭﺍﻥ : ﺍﻧﺖ ﺑﺘﻬﺰﺭ ﺻﺢ
- ﻳﻮﺳﻒ : ﻃﻠﻘﺘﻬﺎ ﻋﺸﺎﻥ ﻇﻠﻤﺘﻬﺎ .. ﻫﻲ ﻣﻜﺎﻧﺘﺶ ﺗﺴﺘﺎﻫﻞ ﺍﻟﻠﻲ ﻋﻤﻠﺘﻪ
- ﻣﺮﻭﺍﻥ : ﺃﻧﺎ ﻣﺶ ﻓﺎﻫﻢ ﺣﺎﺟﺔ ؟؟ ﺍﻧﺖ ﺑﺘﻜﻠﻢ ﺟﺪ ؟؟
- ﻳﻮﺳﻒ : ﻃﻠﻘﺘﻬﺎ ﻳﺎ ﻣﺮﻭﺍﻥ ، ﻃﻠﻘﺘﻬﺎ ﻭﺃﻧﺎ ﻧﺪﻣﺎﻥ
- ﻣﺮﻭﺍﻥ : ﻷ ﺍﻫﺪﻯ ﻣﻌﺎﻳﺎ ﺍﻟﻠﻪ ﻳﺨﻠﻴﻚ ﻭﻓﻬﻤﻨﻲ ﺍﻟﻠﻲ ﺣﺼﻞ ﺑﺎﻟﻈﺒﻂ
ﺳﺮﺩ ﻳﻮﺳﻒ ﺑﺄﻋﻴﻦ ﺑﺎﻛﻴﺔ ﺣﺰﻳﻨﺔ ﻣﺎ ﺣﺪﺙ ﺑﻴﻨﻪ ﻭﺑﻴﻦ ﻧﺪﻯ ، ﻟﻢ ﻳﺼﺪﻕ ﻣﺮﻭﺍﻥ ﺃﺫﻧﻴﻪ ﺣﻴﻨﻤﺎ ﺳﻤﻊ ﻣﺎ ﻗﺎﻟﻪ ﻭ ...
- ﻣﺮﻭﺍﻥ : ﺍﻧﺖ ﻣﺠﻨﻮﻥ ﺍﺯﺍﻱ ﺗﻌﻤﻞ ﻛﺪﻩ ؟؟؟؟
- ﻳﻮﺳﻒ : ﻣﻜﻮﻧﺘﺶ ﻓﻲ ﻭﻋﻴﻲ
- ﻣﺮﻭﺍﻥ : ﻻ ﺣﻮﻝ ﻭﻻ ﻗﻮﺓ ﺇﻻ ﺑﺎﻟﻠﻪ ... ﺩﻩ ﻟﻴﻬﺎ ﺣﻖ ﺗﻤﻮﺗﻚ ﻣﺶ ﺑﺲ ﺗﻄﻠﺐ ﻣﻨﻚ ﺍﻟﻄﻼﻕ
- ﻳﻮﺳﻒ : ﺃﻧﺎ ﻫﺎﻣﻮﺕ ﻣﻦ ﻏﻴﺮﻫﺎ
- ﻣﺮﻭﺍﻥ : ﺍﺳﺘﻐﻔﺮ ﺍﻟﻠﻪ ﺍﻟﻌﻈﻴﻢ ﻳﺎ ﺭﺏ .. ﻃﺐ ﻭﻧﺎﻭﻱ ﺗﻌﻤﻞ ﺍﻳﻪ ؟؟
- ﻳﻮﺳﻒ : ﻣﺶ ﻋﺎﺭﻑ
- ﻣﺮﻭﺍﻥ : ﻫﺎﺗﻘﻮﻝ ﻷﺑﻮﻫﺎ ﻭﺍﻣﻬﺎ ؟
- ﻳﻮﺳﻒ : ﺃﻛﻴﺪ ﻫﻴﻌﺮﻓﻮﺍ
- ﻣﺮﻭﺍﻥ : ﺩﻩ ﻋﻢ ﺻﻼﺡ ﻛﺎﻥ ﻣﻌﺘﻤﺪ ﻉ ﺍﻧﻜﻢ ﻣﻮﺟﻮﺩﻳﻦ ﻣﻊ ﺑﻌﺾ ﻓﻲ ﺍﻟﺸﺮﻛﺔ ﻟﺤﺪ ﻣﺎ ﻳﻄﻤﻦ ﻉ ﺍﻟﺒﺖ ﻃﻤﻄﻢ
- ﻳﻮﺳﻒ : ﻫــﺎﻩ .. ﺁﺁﺁ .. . ﺃﻧﺎ .. ﺃﻧﺎ ﻣﺶ ﻓﺎﻫﻢ ﺍﻧﺖ ﻋﺎﻭﺯ ﺍﻳﻪ
ﻗﺺ ﻣﺮﻭﺍﻥ ﻫﻮ ﺍﻷﺧﺮ ﻣﺎ ﺣﺪﺙ ﻟﻔﺎﻃﻴﻤﺎ ﻭﺭﻏﺒﺔ ﺻﻼﺡ ﻓﻲ ﺗﺄﺟﻴﻞ ﺳﻔﺮ ﺍﻟﻌﺎﺋﻠﺔ ﻟﻠﺨﺎﺭﺝ ﺣﺘﻰ ﻳﺘﻢ ﺍﻻﻧﺘﻬﺎﺀ ﻣﻦ ﻋﻼﺝ ﻓﺎﻃﻴﻤﺎ ﺍﻟﻨﻔﺴﻲ
- ﻣﺮﻭﺍﻥ : ﻛﺪﻩ ﺍﺣﻨﺎ ﻭﻗﻌﻨﺎ ﻓﻲ ﺣﻴﺺ ﺑﻴﺺ
- ﻳﻮﺳﻒ : ﻛﻞ ﺣﺎﺟﺔ ﺿﺎﻋﺖ ﻳﺎ ﻣﺮﻭﺍﻥ
ﺃﺧﺬ ﻣﺮﻭﺍﻥ ﻳﻔﻜﺮ ﻓﻲ ﺣﻞ ﺳﺮﻳﻊ ﻟﺘﻠﻚ ﺍﻟﻤﻌﻀﻠﺔ ﺍﻟﺘﻲ ﻫﻤﺎ ﺑﺼﺪﺩﻫﺎ .. ﻭﻫﺪﺍﻩ ﺗﻔﻜﻴﺮﻩ ﺇﻟﻰ ...
- ﻣﺮﻭﺍﻥ ﺑﻠﻬﻔﺔ : ﻃﺐ ﺃﻧﺎ ﻋﻨﺪﻱ ﺍﻗﺘﺮﺍﺡ
- ﻳﻮﺳﻒ ﺑﻌﺪﻡ ﺍﻛﺘﺮﺍﺙ : ﺍﻳﻪ ؟
- ﻣﺮﻭﺍﻥ : ﺍﻧﺖ ﻟﻮ ﺟﺒﺖ ﺳﻴﺮﺓ ﻟﻌﻤﻚ ﺻﻼﺡ ﺑﺎﻟﻠﻲ ﺣﺼﻞ ﻳﻤﻜﻦ ﻳﺠﺮﺍﻟﻪ ﺣﺎﺟﺔ ، ﺩﻩ ﻏﻴﺮ ﺍﻧﻪ ﻫﺎﻳﻀﻄﺮ ﺍﻧﻪ ﻳﺴﺎﻓﺮ ﻟﺪﺑﻲ ﻣﻦ ﻏﻴﺮ ﻣﺎ ﻋﻼﺝ ﻓﺎﻃﻴﻤﺎ ﻳﺒﺪﺃ ﺣﺘﻰ
- ﻳﻮﺳﻒ : ﻭﺍﻧﺎ ﻣﻄﻠﻮﺏ ﻣﻨﻲ ﺍﻳﻪ ؟؟ ﻗﻮﻟﻲ ؟؟ ﺩﻱ ﺭﺍﻓﻀﺔ ﺍﻧﻬﺎ ﺣﺘﻰ ﺗﺒﺺ ﻓﻲ ﻭﺷﻲ
- ﻣﺮﻭﺍﻥ : ﺳﻴﺒﻚ ﻣﻦ ﺍﻟﺒﺺ ﺩﻟﻮﻗﺘﻲ ، ﺍﺣﻨﺎ ﻧﺮﻛﺰ ﻣﻊ ﻋﻤﻚ ﺻﻼﺡ ، ﻧﻘﻮﻟﻪ ﺍﻧﻚ ﺁﺁﺁﺁ .. ﺍﻧﻚ ﻣﺜﻼً ﻋﺎﻭﺯ ﺗﻔﻮﻳﺾ ﻭﻻ ﺗﻮﻛﻴﻞ ﺍﻧﻚ ﺗﺘﻮﻟﻰ ﺃﻣﻮﺭ ﺍﻻﺩﺍﺭﺓ ﻣﻌﺎﻫﺎ ﺃﻭ ﺍﻟﺘﻮﻗﻴﻌﺎﺕ ﺃﻱ ﺣﺎﺟﺔ ﺑﺤﻴﺚ ﺗﻜﻮﻥ ﺟﻤﺒﻬﺎ ﺑﺲ ﺑﻮﺭﻕ ﺭﺳﻤﻲ ، ﺗﻘﻮﻡ ﻫﻲ ﻣﺘﻌﺮﻓﺶ ﺗﺨﻠﺺ ﻣﻨﻚ
- ﻳﻮﺳﻒ : ﻳﺎ ﻋﻢ ﻣﺮﻭﺍﻥ ﺑﻘﻮﻟﻚ ﺍﺣﻨﺎ ﺍﻃﻠﻘﻨﺎ ، ﻳﻌﻨﻲ ﻣﻌﺪﺗﺶ ﻳﻨﻔﻊ ﻧﺮﺟﻊ ﻟﺒﻌﺾ
- ﻣﺮﻭﺍﻥ : ﻣﺎﻓﻴﺶ ﺣﺎﺟﺔ ﺍﺳﻤﻬﺎ ﻣﺴﺘﺤﻴﻞ .. ﺍﻋﻤﻞ ﺑﺲ ﺍﻟﻠﻲ ﻗﻮﻟﺘﻠﻚ ﻋﻠﻴﻪ ﻭﺭﺑﻨﺎ ﻫﻴﺴﻬﻠﻬﺎ
- ﻳﻮﺳﻒ : ﻃﻴﺐ
- ﻣﺮﻭﺍﻥ : ﺑﺲ ﺍﻭﻋﻰ ﺗﺠﻴﺐ ﺳﻴﺮﺓ ﻟﻌﻤﻚ ﺍﻧﻜﻢ ﺍﺗﻄﻠﻘﺘﻮﺍ ، ﻭﺣﺎﻭﻝ ﺗﻮﺻﻠﻬﺎ ﻭﺗﻌﺮﻓﻬﺎ ﺑﺪﻩ ، ﻭﻓﻬﻤﻬﺎ ﻛﺪﻩ ﺑﺎﻟﻤﺤﺴﻮﺱ ﺍﻥ ﻟﻮ ﺃﺑﻮﻫﺎ ﻋﺮﻑ ﻣﻤﻜﻦ ﻳﺠﺮﺍﻟﻪ ﺣﺎﺟﺔ ، ﺍﺿﺤﻚ ﻋﻠﻴﻬﺎ ، ﻫﻮ ﺃﻧﺎ ﺍﻟﻠﻲ ﻫﺎﻗﻮﻟﻚ ، ﻭﺍﺳﺘﻐﻞ ﻣﻮﺿﻮﻉ ﻓﺎﻃﻴﻤﺎ ﺩﻩ ﻟﻤﺼﻠﺤﺘﻚ ..
ﺃﺧﺬ ﻳﻮﺳﻒ ﻳﺪﻳﺮ ﺍﻟﻔﻜﺮﺓ ﺟﻴﺪﺍً ﻓﻲ ﺭﺃﺳﻪ .. ﻫﻲ ﺗﺤﺘﺎﺝ ﻟﺒﻌﺾ ﺍﻟﺼﻘﻞ ﻟﺘﺼﻴﺮ ﻣﻨﻄﻘﻴﺔ ، ﻭﻟﻜﻦ ﻣﺒﺪﺃﻳﺎ ﺭﺑﻤﺎ ﺗﻜﻮﻥ ﻫﻲ ﺍﻟﺴﺒﻴﻞ ﻟﻠﻘﺮﺏ ﻣﻦ ﻧﺪﻯ ، ﻓﻌﻠﻰ ﺍﻷﻗﻞ ﺃﻥ ﻳﻜﻮﻥ ﻫﻨﺎﻙ ﻣﻜﺎﻧﺎً ﻭﺍﺣﺪﺍً ﻳﺠﻤﻌﻬﻤﺎ ﺳﻮﻳﺎ ً .. ﺃﻻ ﻭﻫﻮ ﺍﻟﻌﻤﻞ ...
ﻧﺴﻰ ﻣﺮﻭﺍﻥ ﺃﻥ ﻳﺨﺒﺮ ﻳﻮﺳﻒ ﺑﺄﻣﺮ ﺍﺗﺼﺎﻟﻪ ﺑﻪ ﻣﻦ ﺍﻟﺒﺪﺍﻳﺔ ، ﻓﻤﺎ ﺣﺪﺙ ﻟﻪ ﻭﻟﻨﺪﻯ ﻛﺎﻥ ﺃﺧﻄﺮ ﺑﻜﺜﻴﺮ ﻣﻦ ﻣﺠﺮﺩ ﺷﻚ ﻳﺮﺍﻭﺩ ﻣﺮﻭﺍﻥ ﺑﺴﻜﺮﺗﻴﺮﺓ ﻟﻜﻲ ﻳﺒﻠﻐﻪ ﺑﻪ ...
..........................
ﻓﻲ ﺍﻟﺒﻮﻓﻴﻪ ﺍﻟﻤﻠﺤﻖ ﺑﺸﺮﻛﺔ Two Brothers ،،،،
ﺗﻌﻤﺪﺕ ﻋﻠﻴﺎﺀ ﺃﻥ ﺗﺘﺨﻠﺺ ﻣﻦ ﺭﻳﻬﺎﻡ ، ﻫﻲ ﺗﺘﺨﻮﻑ ﻣﻦ ﺃﻥ ﺗﺼﺮﻓﻬﺎ ﻣﻦ ﺍﻟﻌﻤﻞ ﻗﺒﻞ ﺃﻥ ﺗﻨﺠﺰ ﻣﻬﻤﺘﻬﺎ ﺍﻟﻤﻄﻠﻮﺑﺔ .. ﻟﺬﺍ ﻭﺿﻌﺖ ﻓﻲ ﺭﺃﺳﻬﺎ ﻓﻜﺮﺓ ﺍﻟﺘﺨﻠﺺ ﻣﻦ ﺭﻳﻬﺎﻡ .. ﺃﺧﺬﺕ ﺗﺪﺑﺮ ﻣﻊ ﻧﻔﺴﻬﺎ ﻭﺗﻔﻜﺮ ﻓﻲ ﻃﺮﻳﻘﺔ ﺗﺠﻌﻠﻬﺎ ﺗﺰﻳﺢ ﺭﻳﻬﺎﻡ ﻋﻦ ﻃﺮﻳﻘﻬﺎ .. ﻭﺑﺎﻟﻔﻌﻞ ﺧﻄﺮ ﺑﺒﺎﻟﻬﺎ ﺃﻥ ...
- ﻋﻠﻴﺎﺀ ﻓﻲ ﻧﻔﺴﻬﺎ ﻭﻫﻲ ﺗﻨﻈﺮ ﻟﻌﻠﺒﺔ ﺍﻟﺴﻜﺮ : ﻣﻤﻤﻢ .. ﺑﺲ ﻫﻮ ﺩﻩ .. ﺃﻳﻮﻭﻭﻩ ، ﺃﻧﺎ ﻫﺎﺧﺪ ﺷﻮﻳﺔ ﺳﻜﺮ ﻣﻨﻬﺎ ، ﻭﺃﺭﻣﻴﻬﻢ ﻉ ﺍﻷﺭﺽ ﻓﻲ ﺳﻜﺘﻬﺎ ، ﻭﻫﻲ ﺩﺍﻳﻤﺎً ﺑﺘﻠﺒﺲ ( ﺟﺰﻡ ) ﻭﺍﻃﻴﺔ ﻓﻲ ﺍﻷﺭﺽ ﻭﺑﺘﻤﺸﻲ ﺑﺴﺮﻋﺔ ﻓﺎﻛﻴﺪ ﻣﺶ ﻫﺘﺎﺧﺪ ﺑﺎﻟﻬﺎ ﻭﻫﺘﺰﺣﻠﻖ ﻭﺭﺟﻠﻬﺎ ﺗﺘﻜﺴﺮ .. ﻭﺍﺧﻠﺺ ﺃﻧﺎ ﺑﻘﻰ ﻣﻨﻬﺎ ، ﻭﺃﻓﻀﻰ ﻟﺴﻲ ﻣﺮﻭﺍﻥ ، ﻭﺃﻟﻌﺒﻪ ﻉ ﺍﻟﺸﻨﺎﻛﻞ
ﺑﺎﻟﻔﻌﻞ ﺃﺧﺬﺕ ﻋﻠﻴﺎﺀ ﻣﻨﺸﻔﺔ ﻭﺭﻗﻴﺔ ، ﺛﻢ ﻭﺿﻌﺖ ﺑﻬﺎ ﺑﻌﻀﺎً ﻣﻦ ﺍﻟﺴﻜﺮ ﺍﻟﻨﺎﻋﻢ ، ﻭﺃﺣﻜﻤﺖ ﻏﻠﻘﻬﺎ ،ﻭﻭﺿﻌﺘﻬﺎ ﻓﻲ ﺟﻴﺐ ﺑﻨﻄﺎﻟﻬﺎ ﺍﻟﻀﻴﻖ ، ﺛﻢ ﺩﻟﻔﺖ ﺧﺎﺭﺝ ( ﺍﻟﺒﻮﻓﻴﻪ ) ﻭﻋﻠﻰ ﻭﺟﻬﻬﺎ ﺍﺑﺘﺴﺎﻣﺔ ﺷﻴﻄﺎﻧﻴﺔ ....
.......................
ﻓﻲ ﻣﻜﺘﺐ ﺍﻟﺴﻜﺮﺗﺎﺭﻳﺔ ،،،
ﻛﻌﺎﺩﺗﻬﺎ ﺭﻳﻬﺎﻡ ﺗﺘﺤﺮﻙ ﺫﻫﺎﺑﺎً ﻭﺇﻳﺎﺑﺎً ﻟﺘﻨﺠﺰ ﺍﻟﻜﺜﻴﺮ ﻣﻦ ﺍﻷﻋﻤﺎﻝ ﻓﻲ ﻭﻗﺖ ﻗﺼﻴﺮ .. ﺍﺳﺘﻐﻠﺖ ﻋﻠﻴﺎﺀ ﻋﺪﻡ ﻭﺟﻮﺩﻫﺎ ﺑﺎﻟﻤﻜﺘﺐ ،ﻭﻗﺎﻣﺖ ﺑﻨﺜﺮ ﺍﻟﺴﻜﺮ ﺍﻟﻨﺎﻋﻢ ﻓﻲ ﻃﺮﻳﻘﻬﺎ ، ﻭﺗﺄﻛﺪﺕ ﺃﻧﻪ ﻣﻮﺟﻮﺩ ﺑﻜﻤﻴﺎﺕ ﻛﺒﻴﺮﺓ ﺣﺘﻰ ﺗﻀﻤﻦ ﺍﻧﺰﻻﻗﻬﺎ ...
ﻋﺎﺩﺕ ﺭﻳﻬﺎﻡ ﻣﻦ ﺍﻟﺨﺎﺭﺝ ﻭﻫﻲ ﺗﺤﻤﻞ ﺑﻌﺾ ﺍﻷﻭﺭﺍﻕ ﻓﻲ ﻳﺪﻳﻬﺎ ، ﻛﺎﻧﺖ ﻣﺸﻐﻮﻟﺔ ﺑﻤﻄﺎﻟﻌﺔ ﺍﺣﺪﻯ ﺍﻷﻭﺭﺍﻕ ، ﻭﻟﻢ ﺗﻨﺘﺒﻪ ﻟﻠﺴﻜﺮ ﺍﻟﻤﻨﺜﻮﺭ ﻋﻠﻰ ﺍﻷﺭﺽ ..
ﻛﺎﻧﺖ ﻋﻠﻴﺎﺀ ﺗﺮﺍﻗﺒﻬﺎ ﻣﻦ ﺧﻠﻒ ﻣﻜﺘﺒﻬﺎ ﺑﻜﻞ ﺗﺮﻗﺐ ﻭﺣﺬﺭ .. ﻛﺎﻧﺖ ﺃﻋﻴﻨﻬﺎ ﻛﺄﻋﻴﻦ ﺍﻟﺤﻴﻮﺍﻥ ﺍﻟﻤﻔﺘﺮﺱ ﺍﻟﺬﻱ ﻳﺮﺍﻗﺐ ﺣﺮﻛﺎﺕ ﻓﺮﻳﺴﺘﻪ ﻋﻦ ﻛﺜﺐ ...
ﻭﻣﺎ ﺇﻥ ﻭﻃﺄﺕ ﺭﻳﻬﺎﻡ ﻗﺪﻣﻴﻬﺎ ﻋﻠﻴﻪ ﺣﺘﻰ ﻭﺟﺪﺕ ﺳﺎﻗﻴﻬﺎ ﺗﺒﺘﻌﺪﺍﻥ ﻋﻦ ﺑﻌﻀﻬﻤﺎ ﺍﻟﺒﻌﺾ ﻭﺍﺗﺴﻌﺖ ﺍﻟﻤﺴﺎﻓﺔ ﺑﻴﻨﻬﻤﺎ ﻭﺍﻧﺰﻟﻘﺖ ﺑﺴﺮﻋﺔ ﻟﺘﺴﻘﻂ ﻋﻠﻰ ﻇﻬﺮﻫﺎ ﺑﻜﻞ ﻗﻮﺓ ﻭﺗﺼﺮﺥ ﻣﺘﺂﻟﻤﺔ ...
- ﺭﻳﻬﺎﻡ ﺑﺼﻮﺕ ﻣﺘﺂﻟﻢ : ﺁﺁﺁﺁﺁﺁﺁﺁﺁﺁﺁﺁﺁﺁﺁﺁﻩ
ﺍﺑﺘﺴﻤﺖ ﻋﻠﻴﺎﺀ ﻓﻲ ﻧﻔﺴﻬﺎ ﻟﻨﺠﺎﺡ ﺧﻄﻬﺎ ، ﻭﻟﻜﻨﻬﺎ ﻋﻤﺪﺕ ﺇﻟﻰ ﺻﺒﻎ ﻣﻼﻣﺢ ﻭﺟﻬﻬﺎ ﺑﻤﻼﻣﺢ ﺍﻟﺨﻮﻑ ﻭﺍﻟﻘﻠﻖ ﻭ ..
- ﻋﻠﻴﺎﺀ ﻣﺪﻋﻴﺔ ﺍﻟﻘﻠﻖ : ﺍﻟﻠﻪ ، ﻓﻲ ﺍﻳﻪ ﻳﺎ ﻣﺪﺍﻡ ﺭﻳﻬﺎﻡ
- ﺭﻳﻬﺎﻡ ﺻﺎﺭﺧﺔ : ﺁﺁﺁﺁﻩ ... ﻣﺶ ﻗﺎﺩﺭﺓ .. ﺭﺟﻠﻲ .. ﺁﺁﺁﻩ .. ﺿﻬﺮﻱ
ﺧﺮﺝ ﻣﺮﻭﺍﻥ ﻣﻦ ﻣﻜﺘﺒﻪ ﻋﻠﻰ ﺃﺛﺮ ﺻﺮﺍﺥ ﺭﻳﻬﺎﻡ ﺍﻟﻤﺘﻮﺍﺻﻞ ﻟﻴﺘﻔﺎﺟﻲﺀ ﺑﻬﺎ ﺭﺍﻗﺪﺓ ﻋﻠﻰ ﺍﻷﺭﺽ ﻭﺗﺼﺮﺥ ﻓﻲ ﺁﻟﻢ ..
ﺍﻧﺤﻨﻰ ﻣﺮﻭﺍﻥ ﻗﻠﻴﻼً ﻋﻠﻴﻬﺎ ﻭ ...
- ﻣﺮﻭﺍﻥ ﺑﻘﻠﻖ : ﻓﻲ ﺍﻳﻪ ﺍﻟﻠﻲ ﺣﺼﻞ ﻳﺎ ﻣﺪﺍﻡ ﺭﻳﻬﺎﻡ ؟؟؟؟
- ﺭﻳﻬﺎﻡ ﻣﺘﺂﻟﻤﺔ : ﺭﺟﻠﻲ ﻳﺎ ﻣﺮﻭﺍﻥ ﺑﻴﻪ ، ﻣﺶ ﻗﺎﺩﺭﺓ ﻣﻨﻬﺎ .. ﺁﺁﺁﺁﻩ
- ﻋﻠﻴﺎﺀ : ﺃﻧﺎ .. ﺍﻧﺎ ﻫﺎﻃﻠﺐ ﺍﻻﺳﻌﺎﻑ
- ﻣﺮﻭﺍﻥ : ﺑﺴﺮﻋﺔ ﻳﺎ ﺁﻧﺴﺔ ﻋﻠﻴﺎﺀ
ﺣﺎﻭﻝ ﻣﺮﻭﺍﻥ ﺗﺜﺒﻴﺖ ﺳﺎﻗﻲ ﺭﻳﻬﺎﻡ ، ﻭﻟﻜﻦ ﻛﺎﻥ ﺍﻵﻟﻢ ﺭﻫﻴﺒﺎً ﺑﺎﻟﻨﺴﺒﺔ ﻟﻬﺎ .. ﻓﻠﻢ ﻳﺴﺘﻄﻊ ﺃﻥ ﻳﻘﺘﺮﺏ ﻣﻨﻬﺎ ﻭ ...
- ﻣﺮﻭﺍﻥ : ﺍﻻﺳﻌﺎﻑ ﻓﻲ ﺍﻟﻄﺮﻳﻖ ، ﺍﻃﻤﻨﻲ ﻳﺎ ﻣﺪﺍﻡ ﺭﻳﻬﺎﻡ ، ﻛﻞ ﺣﺎﺟﺔ ﻫﺘﺒﻘﻰ ﻛﻮﻳﺴﺔ
- ﺭﻳﻬﺎﻡ ﻭﻫﻲ ﺗﻌﺎﻧﻲ ﻣﻦ ﺍﻷﻟﻢ : ﺁﺁﺁﺁﻩ ..
ﺣﻀﺮ ﺭﺟﺎﻝ ﺍﻻﺳﻌﺎﻑ ﺇﻟﻰ ﻣﻘﺮ ﺍﻟﺸﺮﻛﺔ ، ﻭﻗﺎﻣﻮﺍ ﺑﺘﺠﺒﻴﺮ ﺳﺎﻕ ﺍﻟﺴﻜﺮﺗﻴﺮﺓ ﺭﻳﻬﺎﻡ ، ﺛﻢ ﺣﻤﻠﻮﻫﺎ ﻋﻠﻰ ﺳﺮﻳﺮ ﻧﻘﺎﻝ ، ﻭﻧﻘﻠﻮﻫﺎ ﻓﻲ ﺍﻟﺴﻴﺎﺭﺓ ﺍﻟﺨﺎﺻﺔ ﺑﻬﻢ ﺇﻟﻰ ﺃﻗﺮﺏ ﻣﺸﻔﻰ ...
[ ﻭﻣﻦ ﺍﻟﻔﺤﺺ ﺍﻟﻤﺒﺪﺋﻲ ﻟﺤﺎﻟﺘﻬﺎ ﺗﺒﻴﻦ ﺃﻥ ﻟﺪﻳﻬﺎ ﻛﺴﺮ ﻓﻲ ﻋﻈﻢ ﺍﻟﺴﺎﻕ ﺍﻟﻴﺴﺮﻯ ﻭﻳﺤﺘﺎﺝ ﺇﻟﻰ ( ﺗﺠﺒﻴﺮﻩ ) ﻭﻋﺪﻡ ﺍﻟﺤﺮﻛﺔ ﻟﻤﺪﺓ ﻻ ﺗﻘﻞ ﻋﻦ ﺷﻬﺮﻳﻦ .. ]
ﻛﺎﻥ ﻫﺬﺍ ﻣﺎ ﺗﻢ ﻛﺘﺎﺑﺘﻪ ﻓﻲ ﺍﻟﺘﻘﺮﻳﺮ ﺍﻟﻄﺒﻲ ﺍﻷﻭﻟﻲ ﺍﻟﺨﺎﺹ ﺑﺤﺎﻟﺔ ﺍﻟﺴﻜﺮﺗﻴﺮﺓ ﺭﻳﻬﺎﻡ ..
ﺍﻋﺘﻠﻰ ﻭﺟﻪ ﻋﻠﻴﺎﺀ ﺍﺑﺘﺴﺎﻣﺔ ﺷﻴﻄﺎﻧﻴﺔ ﺧﺒﻴﺜﺔ ، ﻓﻘﺪ ﻧﺠﺤﺖ ﺧﻄﺘﻬﺎ ﻭﺑﺎﺕ ﺍﻟﻄﺮﻳﻖ ﺃﻣﺎﻣﻬﺎ ﻣﻤﻬﺪﺍً ﻻﻛﻤــﺎﻝ ﺑﺎﻗﻲ ﻣﺨﻄﻄﻬﺎ ...
ﺍﺿﻄﺮ ﻣﺮﻭﺍﻥ ﺃﻥ ﻳﻌﺪﻝ ( ﻣﺆﻗﺘﺎ ) ﻋﻦ ﻗﺮﺍﺭﻩ ﺑﺸﺄﻥ ﺍﻟﺘﺨﻠﺺ ﻣﻦ ﻋﻠﻴﺎﺀ ، ﻭﺧﺎﺻﺔ ﻓﻲ ﺗﻠﻚ ﺍﻟﻔﺘﺮﺓ ﺍﻟﺤﺮﺟﺔ ، ﻭﺫﻟﻚ ﺣﺘﻰ ﻳﺴﺘﻄﻴﻊ ﺃﻥ ﻳﺠﺪ ﺑﺪﻳﻼً ﻋﻨﻬﺎ ﻣﻮﺛﻮﻕ ﺑﻪ ، ﺃﻭ ﻟﺤﻴﻦ ﻋﻮﺩﺓ ﺍﻟﺴﻜﺮﺗﻴﺮﺓ ﺭﻳﻬﺎﻡ ﺇﻟﻰ ﻋﻤﻠﻬﺎ ....
.......................................
ﻳﺒﺪﻭ ﺃﻥ ﺍﻻﻗﺘﺮﺍﺡ ﺍﻟﺬﻱ ﺍﻗﺘﺮﺣﻪ ﻣﺮﻭﺍﻥ ﻗﺪ ﺃﺷﻌﻞ ﺑﺮﻳﻖ ﺍﻷﻣﻞ ﻓﻲ ﻧﻔﺲ ﻳﻮﺳﻒ ﻣﻦ ﺟﺪﻳﺪ ، ﻭﺑﺚ ﻓﻲ ﻧﻔﺴﻪ ﺭﻭﺡ ﺍﻟﺘﻔﺎﺅﻝ ﻭﺍﻟﻌﺰﻳﻤﺔ ﻣﺮﺓ ﺃﺧﺮﻯ ...
ﺃﺧﺬ ﻳﻔﻜﺮ ﻣﻊ ﻧﻔﺴﻪ ، ﻭﻳﺮﺳﻢ ﺍﻟﺨﻄﻮﻁ ﺍﻟﻌﺮﻳﻀﺔ ، ﻭﻳﺪﻭﻥ ﻣﻼﺣﻈﺎﺗﻪ ، ﺛﻢ ﺭﺗﺐ ﺃﻓﻜﺎﺭﻩ ، ﻭﻣﺎ ﺇﻥ ﺗﺄﻛﺪ ﻣﻦ ﺍﻋﺪﺍﺩ ﻛﻞ ﺷﻲﺀ .. ﺣﺘﻰ ﻗﺮﺭ ﺃﻥ ﻳﻄﻠﺐ ﺣﻤــﺎﻩ ﻭﻭﺍﻟﺪ ﺣﺒﻴﺒﺘﻪ ﺍﻻﺳﺘﺎﺫ ﺻﻼﺡ ...
.................................
ﻓﻲ ﻣﻨﺰﻝ ﺻﻼﺡ ﺍﻟﺪﺳﻮﻗﻲ ،،،،،
ﺭﻥ ﻫﺎﺗﻒ ﺻﻼﺡ ﺍﻟﺪﺳﻮﻗﻲ ﺑﺮﻗﻢ ﻳﻮﺳﻒ ، ﺍﺑﺘﺴﻢ ﺻﻼﺡ ﺣﻴﻨﻤﺎ ﺭﺃﻯ ﺍﻟﺮﻗﻢ ﻳﺰﻳﻦ ﺷﺎﺷﺘﻪ ، ﻓﺠﺎﻝ ﺑﺒﺎﻟﻪ ﺃﻧﻪ ﻳﺮﻳﺪ ﺃﻥ ﻳﻄﻤﺌﻨﻪ ﻋﻠﻴﻪ ﻭﻋﻠﻰ ﺃﺣﻮﺍﻝ ﺯﻭﺟﺘﻪ ﻭ ...
- ﺻﻼﺡ ﻫﺎﺗﻔﻴﺎً : ﺍﺯﻳﻚ ﻳﺎ ﺑﻨﻲ ﻭﺍﺯﻱ ﻧﺪﻯ ، ﻭﺣﺸﺘﻨﺎ ﻭﺍﻟﻠﻪ
- ﻳﻮﺳﻒ ﻫﺎﺗﻔﻴﺎ : ﺍﻟﺤﻤﺪﻟﻠﻪ ﻳﺎ ﻋﻤﻲ ، ﺍﺣﻨﺎ ﺑﺨﻴﺮ
- ﺻﻼﺡ : ﻳﺴﺘﺎﻫﻞ ﺍﻟﺤﻤﺪ ﻋﻠﻰ ﻛﻞ ﺣﺎﻝ
- ﻳﻮﺳﻒ : ﺃﻧﺎ ﺳﻤﻌﺖ ﺑﺎﻟﻠﻲ ﺣﺼﻞ ﻟﻔﺎﻃﻴﻤﺎ ، ﻭﺃﻟﻒ ﺳﻼﻣﺔ ﻋﻠﻴﻬﺎ ، ﺍﻥ ﺷﺎﺀ ﺍﻟﻠﻪ ﺗﻌﺪﻱ ﺍﻟﻠﻲ ﺣﺼﻠﻬﺎ ﺩﻩ ﻋﻠﻰ ﺧﻴﺮ
- ﺻﻼﺡ : ﻳﺎ ﺭﺏ ﺃﻣﻴﻦ
- ﻳﻮﺳﻒ : ﺃﻧﺎ ﻛﺎﻥ ﻣﺮﻭﺍﻥ ﺑﻠﻐﻨﻲ ﺍﻥ ﺣﻀﺮﺗﻚ ﻧﻮﻳﺖ ﺗﺄﺟﻞ ﺍﻟﺴﻔﺮ ﺷﻮﻳﺔ ، ﻓﻬﻞ ﺍﻟﻜﻼﻡ ﺩﻩ ﺣﻘﻴﻘﻲ ؟
- ﺻﻼﺡ : ﺍﻩ ﻓﻌﻼً ، ﻣﺶ ﻫﺎﻳﻨﻔﻊ ﻧﺴﺎﻓﺮ ﻭﻧﺴﻴﺐ ﺗﻮﺗﺎ ﻣﻦ ﻏﻴﺮ ﻣﺎ ﺗﻜﻤﻞ ﻋﻼﺟﻬﺎ
- ﻳﻮﺳﻒ : ﻷ ﻋﻨﺪﻙ ﺣﻖ .. ﻭﺧﺼﻮﺻﺎً ﺍﻥ ﺩﻩ ﻣﻬﻢ ﺟﺪﺍً ﻟﻴﻬﺎ
- ﺻﻼﺡ : ﻣﺰﺑﻮﻁ ﻳﺎ ﺑﻨﻲ
- ﻳﻮﺳﻒ ﺑﺘﺮﺩﺩ : ﻃﺐ ... ﺁﺁﺁﺁ
- ﺻﻼﺡ : ﻓﻲ ﺍﻳﻪ ﻳﺎ ﻳﻮﺳﻒ ﻳﺎ ﺑﻨﻲ ؟
- ﻳﻮﺳﻒ : ﻛﺪﻩ ﻫﺎﻳﺤﺼﻞ ﻋﻄﻠﺔ ﻓﻲ ﺍﻟﺸﻐﻞ ﻫﻨﺎ ﻓﻲ ﺩﺑﻲ
- ﺻﻼﺡ : ﻣﻤﻤﻢ .. ﻣﺎ ﺃﻧﺎ ﻣﺶ ﻋﺎﺭﻑ ﻭﺍﻟﻠﻪ ﻫﺎﻋﻤﻞ ﺍﻳﻪ ، ﺑﺲ ﺑﺤﺎﻭﻝ ﺃﻓﻜﺮ ﻓﻲ ﺣﺎﺟﺔ ﻭﺁﺁﺁ ...
- ﻳﻮﺳﻒ ﻣﻘﺎﻃﻌﺎً : ﻳﺎ ﻋﻤﻲ ﺃﻧﺎ ﻣﺶ ﻋﺎﻭﺯﻙ ﺗﺸﻴﻞ ﻫﻢ ﺃﻱ ﺣﺎﺟﺔ ، ﺃﻧﺎ ﻭﻧﺪﻯ ﻣﻮﺟﻮﺩﻳﻦ
- ﺻﻼﺡ : ﺭﺑﻨﺎ ﻳﺒﺎﺭﻛﻠﻲ ﻓﻴﻜﻢ ، ﻣﺎﻫﻮ ﺩﻩ ﺍﻟﻠﻲ ﻣﻄﻤﻨﻲ
- ﻳﻮﺳﻒ : ﺑﺲ ﺃﻧﺎ .. ﺃﻧﺎ ﻛﺪﻩ ﻫﺘﻘﺎﺑﻠﻨﻲ ﻣﺸﻜﻠﺔ
- ﺻﻼﺡ : ﻣﺸﻜﻠﺔ ﺍﻳﻪ ؟
- ﻳﻮﺳﻒ : ﻟﻮ ﻓﻲ ﺃﻭﺭﺍﻕ ﻣﺤﺘﺎﺟﺔ ﺗﻮﻗﻴﻊ ﺣﻀﺮﺗﻚ ، ﺃﻭ ﺻﻔﻘﺎﺕ ﻣﺤﺘﺎﺟﺔ ﺍﻟﺘﺄﺷﻴﺮﺓ ﻋﻠﻴﻬﺎ ، ﺇﺯﺍﻱ ﺃﻧﺎ ﻫﺎﻋﻤﻞ ﺩﻩ ﺑﺪﻭﻥ ﺗﻔﻮﻳﺾ ﺭﺳﻤﻲ ﻣﻦ ﺣﻀﺮﺗﻚ
- ﺻﻼﺡ : ﺃﻫــﺎ ... ﺍﻧﺖ ﻓﺘﺤﺖ ﻣﺨﻲ ﻉ ﺟﺰﺋﻴﺔ ﻣﻬﻤﺔ
- ﻳﻮﺳﻒ : ﻣﺼﻠﺤﺔ ﺍﻟﺸﻐﻞ ﻣﻬﻤﺔ ﺑﺎﻟﻨﺴﺒﺎﻟﻲ
- ﺻﻼﺡ : ﻃﺐ .. ﺍﻧﺖ .. ﺍﻧﺖ ﺗﻘﺘﺮﺡ ﺍﻳﻪ ﻋﻠﻴﺎ ؟؟
- ﻳﻮﺳﻒ : ﻣﻤﻤﻢ ... ﺣﻀﺮﺗﻚ ﻣﻤﻜﻦ ﻣﺜﻼً ﺗﻌﻤﻠﻲ ﺗﻔﻮﻳﺾ ﺑﺘﻮﻟﻲ ﺍﻟﺘﻮﻗﻴﻌﺎﺕ ﺍﻟﻠﻲ ﺗﺨﺺ ﺍﺗﻔﺎﻗﻴﺎﺕ ﺍﻟﺸﺮﻛﺔ ﻭﺃﻧﺎ ﻫﺎﻋﻤﻞ ﻛﻞ ﺣﺎﺟﺔ ﻭﻛﺄﻥ ﺣﻀﺮﺗﻚ ﻣﻮﺟﻮﺩ
- ﺻﻼﺡ : ﻣﻤﻤﻢ .. ﻭﺍﻟﻠﻪ ﺍﻗﺘﺮﺍﺡ ﻣﺶ ﺑﻄﺎﻝ .. ﺑﺲ ﻫﺴﺄﻝ ﺍﻟﻤﺤﺎﻣﻲ ﺍﻷﻭﻝ
- ﻳﻮﺳﻒ : ﺃﻩ ﻃﺒﻌﺎً .. ﺷﻮﻑ ﺍﻟﻤﻄﻠﻮﺏ ﺍﻳﻪ ﻭﺃﻧﺎ ﺗﺤﺖ ﺃﻣﺮﻙ .. ﺑﺲ ﻳﺎ ﺭﻳﺖ ﻟﻮ ﺣﻀﺮﺗﻚ ﻭﺍﻓﻘﺖ ﺗﺒﻠﻐﻨﻲ ﻓﻲ ﺃﺳﺮﻉ ﻭﻗﺖ ﻋﺸﺎﻥ ﺃﻟﺤﻖ ﺃﻇﺒﻂ ﺍﻟﺪﻧﻴﺎ .. ﻭﺑﻌﺪﻳﻦ ﺣﻀﺮﺗﻚ ﻋﺎﺭﻑ ﺍﻥ ﻫﻤﺎ ﻫﻨﺎ ﻣﺶ ﺑﻴﻬﺰﺭﻭﺍ
- ﺻﻼﺡ : ﺃﻳﻮﻩ .. ﻋﺎﺭﻑ ﻳﺎ ﺑﻨﻲ .. ﺍﻟﻤﻬﻢ ﻃﻤﻨﻲ ﻉ ﻧﺪﻯ ، ﺍﺧﺒﺎﺭﻫﺎ ﺍﻳﻪ ؟؟
- ﻳﻮﺳﻒ : ﺑﺨﻴﺮ ﺍﻟﺤﻤﺪﻟﻠﻪ
- ﺻﻼﺡ : ﻧﻔﺴﻲ ﺍﺳﻤﻊ ﺻﻮﺗﻬﺎ
- ﻳﻮﺳﻒ ﺑﻘﻠﻖ : ﺁﺁﺁ ... ﻫﻲ ﺍﻟﻮﻗﺘﻲ ﻓﻲ ﺍﻟﺤﻤﺎﻡ ﺑﺘﺎﺧﺪ ﺷﺎﻭﺭ ، ﺗـ .. ﺁﺁﺁ ... ﺗﺤﺐ ﺃﻧﺪﻫﺎﻟﻚ ؟؟
- ﺻﻼﺡ : ﻷ ﻣﺶ ﻣﻬﻢ ، ﺧﻠﻴﻬﺎ ﻉ ﺭﺍﺣﺘﻬﺎ ، ﺍﻧﺖ ﺑﺲ ﻗﻮﻟﻬﺎ ﺍﻧﻲ ﺑﺴﻠﻢ ﻋﻠﻴﻬﺎ
- ﻳﻮﺳﻒ : ﺣﺎﺿﺮ ﻳﺎ ﻋﻤﻲ ، ﻳﻮﺻﻞ ﺑﺄﻣﺮ ﺍﻟﻠﻪ
- ﺻﻼﺡ : ﺭﺑﻨﺎ ﻳﺒﺎﺭﻛﻠﻚ ﻳﺎ ﺑﻨﻲ ، ﻭﻳﻜﺮﻣﻚ ﺍﻧﺖ ﻭﻫﻲ ﻳﺎﺍﺍ ﺭﺏ
- ﻳﻮﺳﻒ : ﺍﻟﻠﻬﻢ ﺃﻣﻴﻴﻴﻦ
ﺃﻧﻬﻰ ﻳﻮﺳﻒ ﺍﻟﻤﻜﺎﻟﻤﺔ ﻣﻊ ﺻﻼﺡ ، ﻭﺗﻬﻠﻠﺖ ﺃﺳﺎﺭﻳﺮﻩ ، ﻭﺑﺪﺃﺕ ﺍﻟﺒﺴﻤﺔ ﺗﻌﺮﻑ ﻃﺮﻳﻘﻬﺎ ﺇﻟﻰ ﺷﻔﺘﻴﻪ .. ﻓﻘﺪ ﺃﺛﻤﺮ ﺍﻗﺘﺮﺍﺡ ﻣﺮﻭﺍﻥ ﻣﻊ ﺻﻼﺡ ﻭﺳﻮﻑ ﻳﺆﺗﻲ ﻧﺘﺎﺋﺠﻪ ﻗﺮﻳﺒﺎً ﻭ ...
- ﻳﻮﺳﻒ ﺑﺴﻌﺎﺩﺓ : ﺳﺒﺤﺎﻥ ﺍﻟﻠﻪ ! ﺍﻧﺘﻲ ﺑﺘﺤﺎﻭﻟﻲ ﺗﺒﻌﺪﻱ ﻋﻨﻲ ، ﺑﺲ ﺭﺑﻨﺎ ﺑﻴﺴﺒﺐ ﺍﻷﺳﺒﺎﺏ ، ﻭﺑﻴﺪﺑﺮﻫﺎ ﻣﻦ ﻋﻨﺪﻩ ﻋﺸﺎﻥ ﻧﻜﻮﻥ ﻗﺮﺏ ﺑﻌﺾ ﻳﺎ .. ﻳﺎ ﻧﺪﻯ ، ﻭﺍﻟﻤﺮﺍﺩﻱ ﺃﻧﺎ .. ﺃﻧﺎ ﻫﺎﻛﺴﺐ ﻗﻠﺒﻚ ﺑﺠﺪ ﻣﺶ ﻣﺠﺮﺩ ﻛﻼﻡ
