Business and Pleasure (COMPLETED/Published Under Red Room)

First Kiss

NALAMAN ni Nina na isinuot niya ang revealing na damit na iniregalo nito sa kanya dati kaya naman binigyan siya nito ng mga bago. Disente naman ang mga pinadala nito, tama sa mga sizes at length ng damit na pinapanukala ng kompanya. Pero lahat ng mga iyon ay hapit at kumukurba ng matindi sa katawan niya. Lahat rin ay nasa uso. Sinubukan muli ni Ice na magsuot ng ganoong klase ng damit. May iba pa rin na nagulat pero marami na ang nakita niyang paghanga.

Isang linggo na ginawa ni Ice ang ganoon sa sarili at nawala na rin ang pagkagulat ng mga tao. Nasanay na ang mga ito. Ang iba rin ay sinimulan na siyang bigyan ng papuri. May tinatago raw naman pala talaga siyang ganda. Kaunting ayos pa raw sa kanyang mukha ay magiging isa na siya sa mga babaeng head turners ng Limitations.

"Pumayag ka na kasi sa total make-over!" giit sa kanya ni Nina nang minsang katagpuin niya ito pagkatapos ng trabaho niya sa opisina.

"Gastos pa iyon."

"Ako ang gagastos! Ikaw na mismo ang nagsabi na kaya mo ginawa ito ay gusto mo na maramdaman na maganda ka 'di ba? I-spoil mo naman ang sarili mo paminsan-minsan."

Napangiwi si Ice. "Hanggang ngayon, hindi ko pa rin makita ang dahilan kung bakit nagkakaganito. I wanted to see myself beautiful."

"Its the sex, darling!" malakas na deklara ni Nina. "Nagkakaroon tayo ng urge na maging maganda dahil sa sex. That's the effect of it! We feel that we are beautiful and we truly want to feel it!"

Tinakpan ni Ice ang bibig ng kaibigan. "Maghulis-dili ka nga, Nina. Nasa public place tayo." Kasalukuyan silang nasa isang coffee shop.

"So what? I'm just stating facts. O siya, ha? Papadalhan na lamang kita ng ilang comestics ko na hindi ko pa nagagamit. Ise-send ko rin 'yung mga link sa youtube ng mga tutorials about make-up. Matalino ka. Matutunan mo rin ang pag-aayos from there."

Sinubukan ni Ice na gawin ang mga payo ni Nina. Nang kuhanan niya ng larawan ang sarili sa ginawa at ipadala kay Nina ay aprubado nito ang gawa niya. Ganoon rin naman ang mga tao sa opisina. Naging malaki ang pagbabago sa buhay ni Ice simula nang matutunan niyang mag-ayos sa uso.

Tuluyan ng naging head turner si Ice sa Limitations. Ang mga dating lalaki na nginingiwian lamang siya kapag nakikita siya ay napakaganda ng ngiti kapag nakikita siya. Palagi siyang binabati ng mga ito at may isa pa nga na inantay pa siya sa entrance ng building para lamang makasabay siya sa pagpasok. Dalawang beses na rin na may nagbigay sa kanya ng stemmed roses. At ngayong araw, ang isa sa mga iyon ay kinukulit siya na makipag-date rito sa Linggo. Kahit oras ng trabaho ay talagang pinuntahan pa siya nito sa table niya.

"Hindi talaga kita mapapagbigyan, Dennis. Hindi ko puwedeng i-cancel ang lakad ko..." wala naman talagang pupuntahan si Ice. Ang totoo ay magsusulat lamang siya sa weekends. Kahapon ay nag-send sa kanya si Miss Bridgette ng possible plot para sa gusto nitong ipaggawa sa kanya na libro. Nagustuhan niya ang suggestion nito at pumayag na siya na magsulat para sa erotic imprint ng LRP. Nararamdaman na niya ang kahandaan niya. Sa totoo lamang ay kahit hindi niya pa sana gustong simulan ay nakapagtapos na siya ng isang chapter kagabi. Kung hindi nga lamang siya masyadong abala sa trabaho ngayon na kailangan pang kainin noon ang lunch time niya na free time sana niya para makapagsulat, malamang ay nakatapos na siya ng isa. Sumisigaw ang mga salita sa utak niya.

Napapalatak si Dennis. "How about Friday night?"

"Hindi rin puwede."

"Come on, Ice. Lets go bar hopping. I'll make sure you'll have fun."