ظلمة جهل أفسدت عشق

الحلقة الحادية والثلاثون

الحلقة الحادية والثلاثون

إلتف (قاسم) ليجد (سراج) أمامه ووجهه غاضب فأنتهزت (قمر) تلك الفرصة وأغلقت درج المكتب برفق شديد ثم أغلقت سماعة الهاتف فوجدت (قاسم) يقول
-ات كيف تدخل إكده بيتى ؟
فى تلك اللحظة أتى الغفير وهو يركض ويقول
-حاولت يا سعادة البيه امنعه بس زجنى ودخل بالجوة
صر (قاسم) على اسنانه واتجه نحو (سراج) وقبل أن يمسكه من تلابيب قميصة مسك (سراج) يده مانعاً إياه قائلاً
-إياك تفكر بس تعملها ٠٠ انا مش زيك يا جبان اخد اللى يخصنى فى الدرى كأنى بسرق انا بحب اواجه
اشتعلت عينان (قاسم) غضباً ثم قال
-يخصك كيف يعنى ؟!
ابتلعت (قمر) ريقها ثم قالت
-يا (قاسم) استاذ (سراج) ميقصدش حاجة كل الموضوع ان مدير المستشفى موصيه عليا وقاله انى امانة فى رقبته فهو بيحافظ ع وعده وانا وانت مفيش لسه بينا حاجة رسمى و ٠٠
قاطعها (قاسم)  بحدة
-انتى هتبجى مرتى وانا ليا حكم عليكى من دلوجيتى
ضم (سراج) قبضة يده وهم ليضربه بقوة فقالت (قمر) مسرعة
-ط٠٠ طبعاً ٠٠ بس قبل ما ده ما يحصل انا هسافر لعمى كمان يومين عشان اقوله وتيجى تتكلم معاه ماهو مش معقول هتجوز من ورا عمى ولحد ده ما يحصل أستاذ (سراج) لسه انا مسئولة منه بحكم التوصية بتاعت مدير المستشفى اصله كان معرفة ببابا ٠٠ عموماً انا لازم امشى دلوقتى
كان (سراج) يقف امام (قاسم) لا يريد التحرك فقالت (قمر)
-استاذ (سراج) يلا نمشى
تحدث (سراج) بصوت أچش
-قدامى
سبقته (قمر) سريعاً نحو الخارج فسار هو خلفها بينما رمقه (قاسم) وهو يسير امامه ثم قال
-شكلك مش هتچبها البر وبتحرب ع موتك ٠٠
******************
وصل (سراج) إلى المنزل مع (قمر) التى كانت صامتة تماماً بينما هو لا يستطيع النظر إليها فأبتلعت هى ريقها ثم قالت
-انت زعلان منى ؟!
نظر لها ثم هز رأسه نافياً وقال
-مقدرش ازعل منك ٠٠ بس حاسس انى مش راجل قدامك
رفعت (قمر) حاجبيها بذهول
-ليه بتقول كده ؟! اوعى تقول كده اصلاً
اعطاها ظهره ثم تحدث قائلاً
-مش عارف ازاى سمعت كلامك ونفذت الخطة المهببة دى ازاى اودى قلبى بأيدى لواحد زى (قاسم)
لم تفهم (قمر) حديثه فقالت
-تقصد (قوت) ؟
إلتف وهو ينظر فى عيناها
-انتى يا (قمر) ٠٠ انتى وبس اللى ب٠٠
ابتلع ريقه ثم غير حديثه قائلاً
-اللى عاوز اتجوزها وبس
اتسعت أعين (قمر) من الصدمة وقالت
-ايه ؟
-ايه يا (قمر) مش معقول تكونى مش فااهمة ٠٠ خوفى وقلقى عليكى ونرفزتى من (قاسم) مش معناه غير شئ واحد
-طب و (قوت) ؟
-(قوت) مسئولة منى وبس المشاعر اللى بينى وبينها ماتت من زمان انا قلبى كان فيه شرخ ومحدش عالج الشرخ ده غيرك انتى ٠٠ انا مش عارف ازاى يجيلى عين اقولك انى عاوز اتجوزك بعد اللى عملته مش عارف ازاى وافقت انك تروحى ل (قاسم) انا ٠٠ انا اسوء ما يكون انا معند٠٠
قاطعته (قمر) قائلاً
-لا ٠٠ متقولش ولا كلمة انا اللى روحت غصب عنك انا اللي مسمعتش منك ولولا الضيف اللى جالك متأكدة انك مكنتش هتسبنى اروح
-ده مش مبرر ٠٠ كان لازم امنعك بالقوة و ٠٠
-اللى حصل حصل بس ده مش هيقلل منك فى نظرى ٠٠ انت واثق فيا عارف انى مش هخليه يعمل شئ ؟
زفر (سراج) بضيق ولم يجب فكررت (قمر) سؤالها
-انت واثق فيا مش كده ؟
هز رأسه بالإيجاب وهو ينظر لأسفل ابتسمت هى قليلاً فتابعت هى
-صدقنى انا معملتش شئ اندم عليه واتعاملت معاه بحدود انا لاقيته بيشرب خمرا استغلت بس الموقف وفهمته انى خايفة عليه وقولتله يقول للخدامة تعملنا كوبايتين لبن ويجبهم
نظر لها بطرف عينه فقالت
-صدقنى ده اللى حصل ٠٠ حتى مكنتش بتكلم بدلع عشان انت زعلت منى اخر مرة كلمته عادى
ابتسم (سراج) قليلاً فتابعت هى
-بس موضوع جوازنا انا مش مهيئة ليه نفسياً دلوقتي خاالص ٠٠ وانا خارجة من تجربة ووالدى و ٠٠
اخذ (سراج) نفس عميق وابتسم بسخرية على حاله فقد فهم حديثها هى لا تكن له أى مشاعر ولكنها اجلاً ام عاجلاً ستتزوج ابتلع ريقه وصمت قليلاً ولكن على الأقل هى لم ترفضه فنظر لها ثم قال
-زى ما تحبى ٠٠ انا هستناكى لحد ما تبقى مهيئة ولو مش عاوزنى او ٠٠
ابتلع ريقه ثم قال
-او عاوزة (ياسين) اللى شبه ابن عمك ٠٠ دى حرية طبعاً واوعى تفتكرى انى هتجوزك غصب عنك
ابتلعت (قمر) ريقها ثم قالت
-عارفة ٠٠ بس صدقنى مشاعرى مش مظبوطة خاالص والوقت مش مناسب
هز رأسه بتفهم ثم قالت هى
-بالمناسبة
-ايه ؟
-لما فتحت عنده درج مكتبه لاقيت فيه قطعة اثار صغيرة ٠٠
هز (سراج) رأسه بتفهم ثم قال
-زى ما (فتحى) ما قال ٠٠ روحى اوضتك انتى يا (قمر)
هزت رأسها بالإيجاب ثم صعدت الأعلى وهو ظل عيناه معلقة عليها ٠٠
*****************
مر يومان لم يحدث بهم أي شئ سوا أن استعدت (قمر) للرحيل فى صباح يوم الجمعة كانت تبكى طوال الليل فلم تكن تريد أن تترك العائلة ولكن لكل شئ نهاية كما انها لن تستطع معرفة مشاعرها تجاه (سراج) فهى ليست مقتنعة بأنها تحبه من الأساس كيف نست (أنور) بتلك السهولة (أنور) الذى عاشت عمرها كله تنتظر يوم زواجها منه لابد وانه يوجد خطب ما ولكنها أن قررت أن تتزوج فلن تتزوج غير (سراج) لما ؟! ٠٠ لا تعرف إجابة على سؤالها ذاك ربما لأنه رجل نادر فى أخلاقه هذا فقط فبالتأكيد لا يوجد سبب اخر مسحت دموعها ثم ذهبت تجاه غرفة (آمنة) كى تودعها  ووجدت (حكمت) معها احتضنتهم سوياً وهى تبكى ثم قالت
-هتوحشونى اوووووى
فقالت (حكمت)
-مينفعش تجعدى ويانا ع طول؟
ابتسمت (قمر) بمرارة ثم ابتعدت عنهم وقالت
-كل شئ وله نهاية
فتحدثت (آمنة) قائلة
-فراجك صعب جوى جوى يا بتى
ابتلعت (قمر) ريقها ثم قالت
-لو مش يضايقكوا هبقى اجى اشوفكوا
أجابتها (آمنة) مسرعة
-تنورى يا بتى فى اى وجت
ابتسمت هى بسعادة شديدة وهزت رأسها بالإيجاب وجدت (سراج) يطرق باب الغرفة فقالت والداته
-ادخل يا ولدى
دلف (سراج) للداخل ثم قال
-مش يلا عشان اوصلك للقطر
هز رأسها بالإيجاب ثم قالت
-مع السلامة
وإلتفت مسرعة حتى لا تنظر فى وجوههم وهمت لتحمل حقيبتها ولكن يد (سراج) كانت اسرع منها وإلتقط الحقيبة وسار امامها أبتلعت ريقها وانتظرت أن تعرف ماهو شعوره ولكنها لم تعرف هبطوا بالأسفل سوياً فوضع (سراج) الحقيبة على الأرض ثم اخرج من جيب بنطاله ظرف واعطاه لها وهو يقول
-ده ٠٠ ده مرتبك الأخير
شعرت (قمر) بحزن شديد ينهش قلبها فلولا حاجتها الشديدة للمال لما اخذت تلك النقود فأنهمرت دموعها كالشلال فأبتلع (سراج) ريقه ثم قال
-(قمر) ان٠٠ انا اسف يا (قمر) مقصدش بس ٠٠
مسحت هى دموعها ثم قالت
-صدقنى انا عشت هنا احلى ايام حياتى ومش سهل عليا اخد فلوس مقابل اللى عملته ٠٠ بس للأسف مضطرة اخد مينفعش ماخدش الفلوس دى
ابتلع هو ريقه ولم يرد احرجها أكثر من ذلك فقام بفتح حقيبة يدها التى تحملها ووضع بها المظروف ثم حمل حقيبة ملابسها وسار أمامها تبعته وهى صامتة ثم ذهبا معاً إلى محطة القطار صعد معها القطار ووضع لها الحقيبة واطمئن انها تجلس فى مكان آمان ثم نظر لها وقال
-لما تروحى اتصلى بيا ارجوكى
فهزت رأسها بالإيجاب تنهد هو قليلاً ثم هبط من القطار وظل واقف أمام نافذة القطار التى تجلس هى بجوارها صامت لا يقول شئ بينما هى نظرت له وكانت تودعه بعينها ابتسم قليلاً قبل أن يتحرك القطار وبعد ان تحرك عاد إلى المنزل وهو يحاول أن يخفى الدموع التى تتلألأ فى عينه ٠٠
******************
اثناء صلاة الجمعة بدء (سراج) فى قول الخطبة التى اعدها من اجل تكأن يكفوا عن اللجوء للدجل ذاك الذى اخذ منهم الكثير ولم يعطيهم حتى شئ واحد ٠٠
بدء (سراج) فى الحديث
-فالنبي صلى الله عليه وسلم يقول: من أتى عرافاً فسأله عن شيء لم تقبل له صلاة أربعين يوماً ٠٠
وفى حديث تانى بيقول من أتى عرافاً أو كاهناً فصدقه بما يقول فقد كفر بما أنزل على محمد
يعنى اللى راح بس لدجال ومصدقش كلامه صلاته متتقبلش 40 يوم واللى صدق كفر بقى كافر ٠٠ مش كل حد فيكوا هنا يروح للى اسمه (شاهين) وامثاله اعتقد كلنا شوفنا اللى حصل ل (كمال) الله يرحمه و ٠٠
قاطعه شخص من الجالسين
-(كمال) مماتشى إلا لما راح للضكتور اللى جولت عليه
زفر (سراج) بضيق ثم قال
-خلينى معاكوا وافرض فرض ساذج انه مات بسبب الدكتور متحسنش ليه ع ايد (شاهين) يعنى واحدة عاوزة تتجوز تروح ل (شاهين) تحمل تروح ل (شاهين) اتوقف حالها تروح ل (شاهين) ربنا موجود يا جماعة ومينفعش نلجأ لغيره
فتحدث شخص آخر قائلاً
-يبجى نلچئ ليه للضكتور ع حد كلامك يعنى ومعنته اننا منلچئش لحد
-لا طبعاً الطب ده علم وماشيين ع اسس علمية لكن اللى زى (شاهين) ده بيعمل ايه !! ولا حاجة غير انه يضحك عليكوا وياخدوا فلوسكوا وربنا قال بسم الله الرحمن الرحيم (وَمَا يُعَلِّمَانِ مِنْ أَحَدٍ حَتَّى يَقُولا إِنَّمَا نَحْنُ فِتْنَةٌ فَلا تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُمْ بِضَارِّينَ بِهِ مِنْ أَحَدٍ إِلا بِإِذْنِ اللَّهِ وَيَتَعَلَّمُونَ مَا يَضُرُّهُمْ وَلا يَنْفَعُهُمْ وَلَقَدْ عَلِمُوا لَمَنِ اشْتَرَاهُ مَا لَهُ فِي الْآخِرَةِ مِنْ خَلاقٍ وَلَبِئْسَ مَا شَرَوْا بِهِ أَنْفُسَهُمْ لَوْ كَانُوا يَعْلَمُونَ ) والآية دى بتدل ع ان السحر كفر وكمان ان السحر فى حد ذاته لا بيضر ولا بينفع إلا بمشيئة ربنا
فتدخل واحد منهم
-بس ربنا چعل لكل شئ سبب ٠٠ و (شاهين) عالچ ناس كَتير وفى ناس كانوا فجدوا الأمل فى الخلف مخلفوشى إلا لما رحوله
-استغفر ربنا بسم الله الرحمن الرحيم (قل لا يعلم من في السموات والأرض الغيب إلا الله) محدش يعرف الغيب إلا الله ولا الشفا والعلاج يجى إلا بأذنه وقال عليه افضل الصلاة والسلام "اجتنبوا السبع الموبقات قيل وما هن يا رسول الله فقال: "الشرك بالله، والسحر، وقتل النفس التي حرم الله إلا بالحق، وأكل الربا، وأكل مال اليتيم، والتولي يوم الزحف، وقذف المحصنات الغافلات المؤمنات"
بسم الله الرحمن الرحيم (وَلا يُفْلِحُ السَّاحِرُ حَيْثُ أَتَى) وقال سبحانه ايضا (وَلا يُفْلِحُ السَّاحِرُونَ)  كله بأذن ربنا
نظر الجميع إلى بعضهم البعض فذهب (ياسين) بجوار (سراج)
-انى معاك فى ان (شاهين) وچوده ملوش لازمة بينتنا
وذهب والد (كمال) بجواره وهو يقول
-وانى كمان
بينما قال والد الفتاة المريضة
-لاه بتى ابتديت تتحسن لما راحت ل (شاهين) ٠٠ ربنا بيسبب الأسباب
ثم تركهم وذهب وذهب خلفه رجل رجل حتى اختفوا من امامهم فنظر لهم (سراج) وشعر بالحزن على حالهم فربت (ياسين) و (حمدى) على كتف (سراج) ٠٠
**********************
كانت (قوت) تنظر  فى شرفة غرفتها وهى تشتم رائحة الهواء النقى بجوارها ابنها (جواد) فهى منذ تلك اللحظة ستعيش من أجله فقط تذكرت من يومان حين أتى (سراج) ليأخذ (قمر) كانت بالطابق العلوى وعندما استمعت لضوضاء هبطت بهدوء شديد ووقفت خارج الغرفة واستمعت لحديث (قاسم) مع (سراج) وعلمت ان (سراج) اصبح متيماً ب (قمر) بكت بشدة فى ذلك اليوم فلم تتخيل انها ستفقده هكذا للأبد اصبحت ذكرى فى حياته هى تعلم لقد اخطئت كثيراً فى حقه ولكن لما لما وعدها بأنه لن يتخلى عنها مادام قد احب اخرى مسحت (قوت) دموعها التى لاحظها (جواد) فقال
-اتى بتعيطى يا أمى؟
هزت رأسها نافية
-لاه يا حبيبى ٠٠ انى بس دخلت فى عينى ترابة صِغيرة
دلف (قاسم) الغرفة لكى يبدل ملابسه وجد (قوت) تجلس فى الشرفة فقالت (قوت) لطفلها
-روح ات يا حبيبى ع اوضتك
-حاضر يا أمى
خرج (جواد) إلى الخارج ثم اقتربت (قوت) من (قاسم) وقالت
-هتخرچ ؟!
-إيوة ٠٠
-تحب احضرلك لبس
ابتسم (قاسم) بسخرية ثم قال
-ومن ميتى الحنان ده كله يا ست (جوت) ؟
زفرت (قوت) بضيق ثم قالت
-انى سئلتك سوال متردش بسوال تانى
-مش عاوز حاچة من وشك ٠٠ حتى مبجتش طايج ابص فى وشك واصل
ابتلعت (قوت) ريقها ولم تجب عليه فذهبت لتجلس على مقعد ما بالجوار وظلت تذكر الله وهى جالسة بصوت خافت فنظر لها (قاسم) ثم قال
-من ميتى التجوى اللى نزلت عليكى دى !!
ابتلعت (قوت) ريقها ثم قالت
-ات السبب يا (جاسم) ات اللى خلتنى امشى فى الطريج اللى كت ماشية فيه ات اللى دخلت فى حياتى وزينت ليا الحرام
نظر لها (قاسم) نظرة طويلة ثم قال
-خلاص دلوجيتى انا اللى بجيت شيطان !! وانا اللى مشيتك فى الطريج العوچ ٠٠ اتى اكيييد مچنونة او ناسية انى مضرُبتكيش ع يدك يا (جوت) يمكن اكون اتچوزتك بطريجة غلط من البداية ولكن ٠٠
-كيف ديه؟
زفر (قاسم) بضيق ثم قال
-إيوة يا (جوت) انا اللى خليت (لواحظ) تجنعك بأن (سراچ) مش مناسب ليكى و ٠٠
وقفت (قوت) وهى تشعر بإنكسار فى قلبها ثم قالت بذهول
-إيه ؟! ٠٠ يعنى مكانش فيه واحدة تانية هتخطفه منى
ابتسم (قاسم) بسخرية فذهبت هى تجاهه وظلت تقوم بضربه على كتفه وهى تقول
-انى ٠٠ انى مش عارفة ازاى صدجتك وصدجت اللى اتجال ات ٠٠ ات خربت حياتى كِلها بكدبك ديه
امسك هو يدها مانعاً إياها من ضربه ثم قال
-جولتلك انى مضرُبتوكيش ع يدك ٠٠ اتى اللى سبتى (سراچ) بأرادتك الفلوس هى اللى زغللت عينك واللبس ولا اتى نسيتى ٠٠ اوعاكى تكونى مفكرة انه غلطى لوحدى يا (جوت) اتى حتى حجى الشرعى كتى بتاخدى جصاده اللى اتى رايداه مكنتيش الزوچة الكومل يعنى ٠٠ اتى حتى عمرك ما چربتى انك تجوليلى او تبينيلى خوفك علي وچودى چنبك كان زى عدمه اهم شئ الفلوس والسفر واللبس اللى اتى رايده يوم ما كت بتعب حتى عمرك ما سهرتى چنبيى تمرضينى حتى ولو بالكدب ٠٠ اتى طول عمرك انانية ميهمكيش غير نفسك وبس حتى ابنك كتى مستعدة تستغنى عنيه مادام هتجعدى مع حبيب الجلب فمتعمليش نفسك ضحية وانى الچانى انى جدمتلك كَتير جوى جدمتلك ومكانش فيه اى مجابل انى حتى لما خنتك جدام عينك خنتك لأچل ما تحسى ع دمك لكن كان إيه ردك ولا حاچة اهتمتى بشكلك ومظهرك جدام الكل عشان إكده انا كت بضرُبك ومتتهمنيش بأنى انى اللى كت بلبسك عريان اتى اللى كان عچبك اللبس ديه  اتى اللى بتحبى الكل ياخد باله من چمالك
-لاه لاه مش صوح
إلقاها على الفراش بقوة فهوت على الفراش فقال هو بغضب
-اجعدى فكرى إكده مين اللى خرب البيت ديه انى اللى كت بچبلك اللى تتمنيه ولا اتى اللى مجدمتيش ليا اى حاچة واصل
ثم تركها وخرج خااارج الغرفة فوضعت يدها على وجهها وظلت تبكى بشدة وهى تقول
-مش معجول ٠٠ مش معجول إكون كت إكده ٠٠ ب٠٠ بس بس فى الاول والأخر عيشتنا كات كلها حرام والحرام مفيهوش بركة ٠٠
******************
بعد العصر ذهب (رأفت) إلى منزل (سوسن) وهو يشعر بتوتر بالغ جلس بالداخل فجلس معه (أدهم) وهو ينظر بالساعة ينتظر (هارون) ابتسم له (أدهم) قليلاً ثم قال بهدوء
-معلش اخوها التانى مصمم يحضر
ابتلع (رأفت) ريقه فيعرف انه و (هارون) لن يكونوا على وفاق ابداً قاطع شروده ذاك صوت جرس الباب فذهب (أدهم) تجاه الباب ثم قال
-ايه يا بنى كل ده تأخير ؟
-معلش عقبال ما خلصت شوية ورق براجعه
دلف (هارون) للداخل ووجد (رأفت) يجلس بالداخل نظر له مشمئزاً ثم جلس بجواره لم يستطع ان يكتم ما بداخله عن (أدهم)  فقال بإنفعال
-انت ايه اللي جابك يا (رأفت)  !!
نظر لهم (أدهم) ثم قال
-تعرفوا بعض
جلس (هارون) وهو يبتسم بسخرية ثم قال
-عز المعرفة ٠٠ يا ترى شغال ولا لسه عاطل ؟
ابتلع (رأفت) ريقه وضم قبضة يده حتى لا يتهور على (هارون) ذاك ثم قال بهدوء
-شغال فى شركة (٠٠٠٠٠) محاسب هناك
نظر له (هارون) بسخرية ثم قال
-وناوى طبعاً تسيب الشغل بعد الجواز
ثم نظر إلى نفسه وإلى (أدهم)
-مانت عندك بدل الواحد اتنين يصرفوا عليك
شعر (رأفت) بأهانة كبيرة ثم قال
-انا ليا شغلى وشقتى مع والداتى
-وانا اختى لازم يبقى ليها شقة خاصة لوحدها
تلعثم (رأفت) قائلاً
-بس ٠٠
قاطعه (هارون) ثم قال
-انا قلت اللى عندى ٠٠ ومتحلمش انك اجبلك شقة
نظر (أدهم) ل (هارون) الذى يحدثه بتلك الطريقة فلم يتحمل (رأفت) اسلوبه ذاك فنهض وقال
-عن اذنكوا
ولم ينتظر رد أى منهم وتوجه نحو الخارج بينما نظر (أدهم) إلى (هارون) مستفهماً
-ايه اللى حصل لده كله !! ليه كده
-ده واد صايع سيبك منه ميلقش ب (سوسن) اصلاً
خرجت (سوسن) من الغرفة وهى تبكى بعد ان استمعت لحديث (هارون) مع (رأفت) وقالت
-حراام عليك يا (هارون) ٠٠ ليه كده !! قولتلك (رأفت) اتغير عن زمان ومش معنى انه كان بيستغل (حكمت) انه هيعمل معايا كده
تحدث (أدهم) بنبرة منفعلة
-ممكن اعرف مين ده ؟!
تحدث (هارون) بضيق
-قولتلك واد صايع وميلقش ب (سوسن) ويبقى ابن عم مراتى كان عاوز يتجوزها عشان تصرف عليه بقى .. ده شخص مستهتر
نظر (أدهم) إلى شقيقته وقال بإنفعال
-وانتى تعرفيه منين ؟
تلعثمت (سوسن) ثم قالت
-ك٠٠ كنت بشوفه لما ببقى مع (حكمت) ٠٠ بس بس هو لما طلب منى رقم تليفون البيت قالى انه اتغير و ٠٠
زعق بها (أدهم) ثم قال
-ادخلى ع اوضتك
-بس ٠٠
-قلت ادخلى ع اوضتك
فدلفت (سوسن) إلى غرفتها واغلقت الباب بالمفتاح ثم ارتمت على الفراش وهى تبكى ٠٠
فى الخارج تحدث (هارون) قائلاً
-بت غبية ومش عارفة مصلحتها
-لسه صغيرة
-لا مهياش صغيرة ٠٠ هى كبرت خلاص متضحكش ع نفسك بكلمتين المفروض اللى تكبر تعقل لكن دى بتجنن اكتر
زفر (أدهم) بضيق وشعر بألم فى رأسه بينما غادر (هارون) وهو يستشيط غضباً ٠٠
*******************
دخلت فتاة إلى منزل (شاهين) وشعرت بالخوف من منزله ذاك فقد كان يحتوى على اوجه كثيرة لحيوانات محنطة وعظام معلقة على الجدران واضاءة المكان خافتة ترددت فى الدخول حيث يجلس ولكنها أستجمعت شجاعتها ودلفت للداخل فنظر لها (شاهين) ثم قال
-خير
ابتلعت الفتاة ريقها ثم قالت
-تجدر تعملى عمل تخلى اللى بحبه يتچوزنى !!
ابتسم (شاهين) بفخر
-وفى ظرف يَمين بس هتلاجيه چاى يخطبك
ابتسمت الفتاة بسعادة ثم قالت
-طلباتك يا سيد الناس
ابتسم (شاهين) ثم قال
-إسمه إيه ؟!
ابتلعت الفتاة ريقها ثم بدئت فى قول اسمها له ومعرفة ما يطلبه كى ينفذ ذاك العمل ٠٠

#ظلمة_جهل_أفسدت_عشق

#علا_السعدني