ظلمة جهل أفسدت عشق

الحلقة الخامسة والثلاثون (الأخيرة) الجزء الأول

الحلقة الخامسة والثلاثون (الأخيرة)
الجزء الأول

فى عصر اليوم التالى كان قد عاد (سراج) مع (هارون) و (قوت) و ابنها إلى المنزل الخاص بهم فتحت لهم (قمر) الباب وجدته قد عاد معها فشعرت بضيق شديد فقالت (قوت)
-انا عاوزة اطلع لخالتى يا سى (سراچ)
-كلنا هنطلع يا (قوت)
لم يسلم حتى على (قمر) فشعرت بالضيق فصعد الجميع للأعلى وظلت (قمر) تشاهدهم وشعرت بنغزة فى قلبها ولكنها قررت أن تنتقم منه على طريقتها صعدت غرفتها ثم أحضرت خيط رفيع وقطعت منه قطعة طويلة ثم اخذتها وذهبت إلى غرفة (سراج) دقت مسمار فى الأسفل بجانب باب الغرفة ودقت مسمار اخر فى الجهة المقابلة لها ثم قامت بلف الخيط على المسمارين حتى حينما يدخل (سراج) يتعركل به ثم ابتسمت بخبث وقالت
-تستاهل
بينما كانت (قوت) تحتضن (آمنة) و (حكمت) وظلا يهونا عليها وهى تبكى بشدة و (هارون) يسترق النظر لحبيبته فنظرت (قوت) إلى (سراج) و قالت
-انا عاوزة اشتغل يا سى (سراچ) مهصرفشى على ابنى من فلوس حرام ابداً
أبتسم (سراج) ثم قال
-هنكلم فى كل ده بعدين يا (قوت)
ثم نظر (سراج) إلى (جواد)
-ها يا بطل مش ننام بقى شوية وبعدين نقوم نلعب زى مانت عاوز
-إيوة
ابتسم الجميع فأقترب (سراج) من (جواد) وحمله ليذهب معه إلى غرفته كانت (قمر) تقف بعيداً لكى تشاهد (سراج) وهو يتعركل فعندما وجدت الطفل معه شعرت بالخوف من أن يتأذى لذا قالت بصوت مرتفع قبل ان يفتح باب الغرفة
-يا ٠٠ يا انت استنى
إلتف لها (سراج) ثم نظر فى عيناها التى بشتاق إليها وقال
-هتحنى عليا امتى وتقولى ليا بأسمى .. بس لما بتتنرفزي بتقوليه
زفرت (قمر) بضيق ثم قالت
-ممكن تخلى (جواد) ينام معايا عشان احكيله حدوتة ويسلينى بدل مانا قعدة لوحدى
ابتسم (سراج) ثم قال
-وانتى تطلبى شئ وانا ارفضه !!
ثم أعطى لها (جواد) فحملته وهى تزم شفتاها وقالت
-عشان كده سلمت عليا لما شوفتنى ٠٠ ولا خايف حبيبة القلب تزعل
ضحك (سراج) ثم قال
-ماهو (سراج) اللى انتى شايفاه دلوقتى محدش يشوفه غيرك انتى وبس ٠٠ دى حاجة خاصة بينا بس
شعرت (قمر) بالخجل كثيراً وأدارت ظهرها لتتجه إلى غرفتها وهى خجلة فنظر لها هو هائما ثم استعد ليفتح الباب فتذكرت (قمر) أن تمنعه قبل أن يسقط بسبب الخيط ذلك فألتفت لكى تقول
-(سراج) استنى
ولكن تعركل (سراج) وكاد أن يسقط وعندما سمع صوتها اصطنع انه سقط وأمسك مشط قدمه فتركت هى الصغير على الأرض وذهبت لتراه فأصطنع هو التألم ورأى الخيط بعينه ثم قال
-رجلى شكلها اتلوت
نظرت (قمر) له وهى تشعر بالحزن
-يقطعنى انا السبب ٠٠ انا اسفة
ثم أمسكت قدمه وخلعت حذائه مسرعة وهى تتحسس المكان الذى كان يمسكه وقالت
-بتوجعك ؟
فشعر (سراج) بالخجل فوقف سريعاً ثم قال
-يعنى انتى اللى حطيتى الخيط
نظرت له وهو يدوس على قدمه كأن شئ لم يكن
-بتضحك عليا !!
فقال (جواد)
-اتوا بتلعبوا مع بعض صُح ؟
ضحك كلا من (قمر) و (سراج) فقال (سراج)
-دى لعبة مشهورة اوووى اسمها يقطعنى انا السبب
-انى اول مرة اسمع اللعبة دى
-ماهو يا حبيبى اللعبة دى هتلعبها بس مش دلوقتى
عقد الصغير حاجبيه بعدم فهم بينما دهست (قمر) ارجل (سراج) فقال (جواد)
-طب طنط اللى چو دى اللى عينها حلوة اووووى عاوزها تلعب معايا اللعبة دى
ابتسم (سراج) وقال
-(حكمت) !! ٠٠ لا ده شكل (هارون) هيلعبك ع الشناكل
ضحكت (قمر) بشدة وقالت
-يلا يا (جواد) عشان ننام
-ماشى يلا
ثم نظر فى عيناها
-هو كلتكوا هنيه عينكوا ملونة ؟ اتى عينك چميلة اووى
فأمسك (سراج) (جواد) من اعلى قميصه
-ولاه ابعد عن اللى يخصنى يالاه
ثم قالت (قمر)
-ابن (قاسم) عاوزه يطلع ايه ٠٠ لازم عينه تندب فيها رصاصة
-تعالى نام معايا
-بس انا عاوز انام مع (جمر)
-بلا (جمر) بلا هباب ادخل عندى يالاه
ثم امسكه من قميصه وحمله بيد واحدة فقالت (قمر)
-حرام عليك يا (سراج)
-امشى ع اوضتك يا حنينة
ضحك (قمر) ونسى (سراج) الخيط فوقع هو و (جواد) معاً فضحك ثلاثتهم وقال (سراج) وهو نائم على الأرض على جانبه الأيمن ويسند رأسه بيده وقال وهو يشر للخيط
-اديك لعبت معانا يقطعنى انا السبب
-دى لعبة چميلة جووى
-قوم يالا ننام ٠٠ انت شكلك هتبقى مصيبة وهتتعبنا
ثم نظر إلى (قمر)
-ع اوضتك
ركضت (قمر) على غرفتها بينما ضحك (سراج)  و (جواد) وذهبا ليناما سوياً ٠٠
*******************
فى المشفى سار (فتحى) فى ممر طويل وهو يرتدى بذلة كحولية  ومعه باقة من الورود ممسك بها بيده السليمة ويده الأخرى معلقة برباط يتدلى من رقبته طرق باب الغرفة فسمع صوتها وهى تقول
-ادخل
ففتح (فتحى) الباب ودلف للداخل وجدها ممدة على الفراش وهى تنظر للسقف فقال
-مساء الخير
أستمعت (رقية) لصوت شخص غريب فقد كانت تظن ان ذاك والداها أو والداتها فشهقت عندما رأت شاباً وسيماً أمامها وأخذت حجابها من جانبها على الفراش ووضعته على رأسها مسرعة وخبئت وجهها فقال (فتحى)
-انا اسف بس انتى اللى قلتى ادخل
-ات مين ؟!
-انتى مش فاكرانى؟
-وانى كت شفتك فين يعنى ؟
فى تلك اللحظة دلف والداها فوجد ذاك الظابط الذى انقذ ابنته فرحب به قائلاً
-اهلا يا سعادة البيه ؟
ابتسم (فتحى) قليلا ثم قال
-بيه ايه بس يا حج ٠٠ حضرتك تقولى يا (فتحى) وبس
-بس ٠٠
-مبسش
ثم أقترب من فراش (رقية) واعطاها باقة الورود وهو يقول
-حمد الله ع سلامتك
فنظرت (رقية) إلى والداها فقال والداها
-خديها يا بتى ده الظابط اللى انقذ حياتك
انزلت (رقية) الحجاب من على وجهها ثم اخذت منه باقة الورد وهى تشعر بالخجل فأبتسم (فتحى) ثم قال
-اسف انى جيت من غير ميعاد ٠٠ بس كنت عاوز اطمن ع انسة (رقية)
-تنور يا ابنى فى اى وجت
شعر (فتحى) بالخجل من نفسه ثم قال
-طب استأذن انا يا عمى ٠٠ وإن شاء الله هجيلك تانى
-ماشى يا ولدى
استرق (فتحى) نظرة اخيرة إلى (رقية) التى لاحظت نظراته لها فنظرت لأسفل بخجل فعض (فتحى) شفتاه وهو يقول بصوت خافت
-اهى .. هى دى
ثم خرج خارج الغرفة وقرر  ان يتقدم لخطبتها عندما تعود لمنزلها ٠٠
**********************
فى المساء بعد صلاة العشاء كان (سراج) أمام للجميع بعد ان انتهى من الصلاة طلب من الجميع ان يظلوا لأنه يريد الحديث معهم اخذ نفس عميق ثم بدء بالحديث
-لما اتكلمت المرة اللى فاتت وهاجمت (شاهين) كلكوا قلتوا انى كداب وبغشكوا انا بس عاوزة اخد رائيكوا فى حاجة اديكوا شوفتوا هو مات ازاى !! ودى مش نهايته ع فكرة ٠٠ ده لسه فى القبر و الحياة الآخرة وفوق ده كلوا شوفتوا (كمال) اللى مات بسبب انه مريض بالصرع ومتعالجش ٠٠ و (رقية) كل اللى كان عامل فيها كده اكتئاب مرت بيه بسبب برده (شاهين) انه اقنعها انه معملوها عمل بوقف الحال ٠٠ ده غير العامل النفسى اللى هى مرت بيه ويا عالم كان ممكن تموت وتبقى ضحية ل (شاهين) هى كمان للأسف دول مكنوش بس الضحايا كان فى كتيير اوووى واعتقد اديكوا شوفتوا ممنوع الخروج بليل لا فى نداهة ولا حد بيخطف ولا أى حاجة كتييير راحوا ضحايا لمجرد انهم عرفوا سر (قاسم) وسر (شاهين) وهو التجارة بالسلاح اعتقد راح كتير مننا بسبب الجهل والخرافات اللى اتربيتوا عليها ٠٠
نظر أحدهم له وقال
-بس الچن والسحر مذكوريين بالجرآن
-لو ع السحر فأحسن دوا ليه القرآن كما قال تعالى( وننزل من القرآن ما هو شفاء ورحمة للمؤمنين) ومش لازم يعنى تروح لحد عشان يطلعلك العمل او يقرالك قرآن انت ممكن انت تقرا وتتدبر معانيه ولو مبتعرفش تقرا ومش حافظ ممكن تقول لحد يكتب لك ايات من القرآن على ورق وتبلها وتشرب منها او تغتسل منها بس طبعاً مش فى الخلاء ٠٠ الموضوع مش صعب ومش محتاج اكتر من انك تبقى مع ربنا وكما قال تعالى  ( قُلْ لَنْ يُصِيبَنَا إِلَّا مَا كَتَبَ اللَّهُ لَنَا هُوَ مَوْلانَا وَعَلَى اللَّهِ فَلْيَتَوَكَّلِ الْمُؤْمِنُونَ ) وكما قال المصطفى ( يَا غُلَامُ إِنِّي أُعَلِّمُكَ كَلِمَاتٍ ، احْفَظِ اللَّهَ يَحْفَظْكَ ، احْفَظِ اللَّهَ تَجِدْهُ تُجَاهَكَ ، إِذَا سَأَلْتَ فَاسْأَلِ اللَّهَ ، وَإِذَا اسْتَعَنْتَ فَاسْتَعِنْ بِاللَّهِ ، وَاعْلَمْ أَنَّ الأُمَّةَ لَوْ اجْتَمَعَتْ عَلَى أَنْ يَنْفَعُوكَ بِشَيْءٍ لَمْ يَنْفَعُوكَ إِلَّا بِشَيْءٍ قَدْ كَتَبَهُ اللَّهُ لَكَ ، وَلَوْ اجْتَمَعُوا عَلَى أَنْ يَضُرُّوكَ بِشَيْءٍ لَمْ يَضُرُّوكَ إِلَّا بِشَيْءٍ قَدْ كَتَبَهُ اللَّهُ عَلَيْكَ ، رُفِعَتِ الأَقْلَامُ وَجَفَّتْ الصُّحُفُ ) اما الجن فموجود طبعاً لانه مذكور فى القرآن بس محدش بيشوف هيئته الحقيقية والاتصال بيهم اصلاً حرام لأن عشان يخدموك لازم تكفر بربنا وبآياته ورسله فهتدوا دماغكوا لواحد كافر اصلاً ٠٠ هو كده كده فى النار مش يهمه يأذيكوا ولا لأ قد ما هو يهمه انه يستغلكوا
اخذ (سراج) نفساً طويلاً ثم قال
-عارفين ان (قمر) اللى جت معايا للبلد هنا هى بتشتغل ممرضة برده (شاهين) قالها ان اى حد بيتقدم ليهم بيموت لانها معمولها عمل بكده بس هى مصدقتش لان مات خطيبها ومات اللى اتقدملها من البلد هنا و ده كله بسبب (شاهين) اقنعوه يروح يتقدم ل (قمر) مقابل فلوس وقتلوه فى النهاية عشان بس (قاسم) عاوز يتجوزها ٠٠ المستشفى والمدرسة بيتبنوا وإن شاء الله التعليم هيبقى بفلوس رمزية واللى مش قادر هيبقى مجانى ليه وكذلك المستشفى ياريت انتوا بس تفكروا فى مستقبل احسن لولادكوا
شعر الجميع براحة بعد حديث (سراج) فبدء احداهم قائلاً
-احنا معاك
وبدء واحد تلو الأخر يقتنع بحديث (سراج)ّ ويريده فشعر (سراج) بسعادة كبيرة فربت (هارون) على كتفه ثم خرجا سوياً وذهبوا إلى المنزل ٠٠
*********************
فى ظهيرة اليوم التالى ٠٠
أستمع (سراج) لصوت أحد ما يطرق باب المنزل فذهب ليفتح الباب ووجد (ياسين) أمامه شعر بتوتر كبير فقال (ياسين) وهو يبدو عليه الفرحة
-ايه مش هتجولى ادخل ولا إيه ؟
-لا ازاى اتفضل طبعاً
دلف (ياسين) للداخل وجلس على مقعد ما ثم قال
-انا چاى لاچل ما اعزمك ع فرحى باكر
اتسعت أعين (سراج) وهو لا يصدق ثم قال
-فرحك !! ٠٠ بمين ؟!
-هرچع ل (مهرة) خلاص اتأدبت وانى حاسس انها اتغيرت بچد المرة دى
ضحك (سراج) كثيرا ثم قال
-الف الف مبروك ٠٠ انا كمان قررت اتجوز
-بچد ؟! يا ترى مين ؟
-(قمر)
صمت (ياسين) قليلاً ولكنه سرعان ما ابتسم ثم قال
-الف مبروووك ات تستاهل كل خير يا (سراچ)
بادله (سراج) ابتسامة هادئة ثم ظلا يتحدثان سوياً وبعدها انصرف (ياسين) وقرر أن يصعد لغرفته ولكنه وجد (قوت) أمامه ظلوا ينظرون إلى بعضهم البعض نظرات صامتة لم يتحدث أى منهم للأخر ٠٠
عندما استمعت (قمر) لصوت (سراج) يغلق الباب همت من الخروج من المطبخ حيث أحتبست داخل المطبخ عندما وجدت (ياسين) بالخارج ولم ترد اغضاب (سراج) بخروجها أمامه خرجت من المطبخ ووجدت كلا من (سراج) و (قوت) ينظران إلى بعضهم البعض شعرت بحزن شديد داخل قلبها فهاهى لم ترد اغضابه وهو يقف امام محبوبته الأولى وينظر داخل عيناها بكل وقاحة لم يشعر (سراج) او (قوت) بوجود (قمر) فقالت (قوت)
-ا٠٠ انى أسفة ٠٠ انى اللى عملت فينا إكده ٠٠ دلوجتى بس متأكدة انى عيشتى معاك كت هتبجى حاچة تانية خالص بس ٠٠ بس بعد ايه ؟
شعر (سراج) بالحزن قليلاً وقال
-الماضى راح لحاله يا (قوت)
-بس انى ضايعة انا لا عرفت اكسبك ات ولا (جاسم) انى دمرت كل حاچة
لم تستطع (قمر) سماع المزيد فهمت لصعود الدرج وكأنها لا تراهم فقال (سراج)
-(قمر)
لم تعيره انتباهها وظلت تصعد الدرج فردد مرة آخري
-(قمررررررر)
وقفت (قمر) عن الصعود وحاولت ان تكتم حزنها ودموعها ولا تظهرهم ظلت معطية له ظهرها فقال (سراج)
-تعالى اقفى جنبى
-مش عاوزة
تحدث (سراج) بلهجة آمرة
-هى كلمة واحدة يا (قمر)
إلتفت (قمر) وهبطت الدرج فلاحظ انها كانت ستبكى فكتم بسمته ثم نظر إلى (قوت)
-انا كلامى كله قدام (قمر) ٠٠ انا كده كده مش بخبى حاجة عليها ٠٠ عموماً يا (قوت) انا صحيح حبيتك وحبيتك اوى وفضلت 11 سنة ونص مش عارف اعيش حياتى كويس
شعرت (قمر) بحزن يتسرب إلى قلبها فتابع (سراج)
-من 11 سنة انتى سببتى ليا جرح فى قلبى سبتى الجرح يكبر ويكبر ويكبر ولما قابلتينى من تانى بدل ما تلمى الجرح زودتيه شفت ان فى فروق بانت كتيييير انا مكنتش شايفاها زمان يمكن حبى ليكى كان بيقل مع الوقت وده خلانى الاحظ  الفروق دى ٠٠  (قمر) هى البنت الوحيدة اللى عرفت تسرق قلبى عرفت تطلع منى شخص انا معرفوش عرفت  تلم الجرح اللي جوايا
ثم نظر إلى (قوت) وابتسم قليلاً وقال
-منكرش يا (قوت) انك كنتى جزء من احلامى بس ٠٠ بس انا دلوقتى بحب (قمر) وصدقينى لو كنا اتجوزنا من زمان مكنش فى ست تقدر تخطى الجدار اللى حاطه على قلبى ٠٠ مش عاوزك تفهمى علاقتى ب (قمر) غلط وانى لو كنت متجوزك كانت هى دى اللى خطفتك منى مقدرش اجزم كان ايه اللى هيحصل لو اتجوزنا بس متأكد من شئ واحد ان عمرى ما كنت هخونك ٠٠ وحطى فى دماغك كويس ان(قمر) دخلت حياتى وانتى مش فيها اصلاً بتمنى انك تعيشى حياتك وتبقى سعيدة اللى باقى من عمرك مع شخص يفهمك وتفهميه
ابتسمت (قوت) بمرارة ثم قالت
-چواز تانى !! لاه يا سى (سراچ) انى هعيش الباجى من عمرى لابنى وبس
ثم صعدت إلى غرفتها وهى تبكى بشدة فشعر (سراج) بالحزن على حالها فنظرت له (قمر) وهى تقول بغضب واضح
-اصلى كنت بحبك ٠٠ اصلى كنت بتزفت ٠٠ اصلك لو معايا مكنتش هبص لغيرك ٠٠ فاكر نفسك دانچون ولا ايه وانت مين اصلاً دى اللى تبصلك
ابتسم (سراج) ثم قال
-انتى
صرت (قمر) على اسنانها ثم قالت
-لاااا مبحبكش يا ساااتر انا ٠٠ انا بكرهك بكرهك عامل نفسك امور وانت مش امور مش حلو انت ٠٠ انت وحش
ابتسم (سراج) ثم قال
-ولما انا وحش كده زعلانة ليه ؟
-يووووه
-مش هتوافقى عليا بقى
تنهدت (قمر) قليلاً ثم قالت
-انت لغبطت حياتى ٠٠ ازاى نستنى (أنور) بالسرعة دى
-زى مانتى نستينى واحدة قعدت 11 سنة مش شايف غيرها وكنت فاكر انى عمرى ما هتجوز غيرها ٠٠ بس اهى بقت فاضية دلوقتى وقلبى انشغل بغيرها
-بس انت قعدت 11 سنة مخلص ليها ٠٠ لكن لكن (أنور) لسه ميت
-الله يرحمه يا ستى عمل فيا معروف كبير ٠٠ خلينا فى نفسنا
هزت (قمر) رأسها بأسى
-انت بتغير منه ؟
-ومن اى راجل يلمحك بس ٠٠
ضحكت (قمر) ثم قالت
-طب طب لسه مفتش مدة عشان نتجوز حتى عشان بابا
-الحزن فى القلب
-لااا انت اتجننت
-قلتى ايه؟
-طب كمان 3 شهور
-كتير اووى
-شهرين
-كتييير برده
-شهر ونص طيب ٠٠ ده عمى هيتبرى منى
-انا كلمت عمك
وضعت (قمر) يدها على فمها فقال
-ومرجح انك تتجوزى ٠٠ بدل مانتى قعدة لوحدك
ابتسمت (قمر) بخجل
-بس صدقنى جواز دلوقتى مش هقدر
ثم ركضت للأعلى دون ان تستمع إلى رده فقال (سراج)
-وماله يا بنت (سلامة)
***********************
فى مساء اليوم التالى ٠٠
جلس الجميع يهنئ (ياسين) بمناسبة زواجه حلم (سراج) باليوم الذى سيجمعه ب (قمر) فها هى قد وافقت اخيراً بينما (هارون) ينتظر يوم زواجه منذ أن رأى (حكمت) فظل مبتسم وهو يتذكرها ويتذكر خجلها الذى عشقه بها منذ ان اغلقت الباب فى وجهه فى اول مرة يراها ٠٠
جلس الفتيات يغنين ويرقصن وكانت (قمر) تحلم بذلك اليوم الذى سيجمعها بالسراج الذى انار حياتها فتحدثت مع (حكمت) التى كانت بجوارها
-هو انا ليه حاسة انه يوم فرحى مش فرحها هى
ضحكت (حكمت) ثم قالت
-هانت يا جمر
-انا بتكلم بجد ٠٠ انا كل ما ابقى مع اخوكى فى مكان ببقى مكسوفة
-هو الحب إكده
-بس المفروض مكسفش منه هو ٠٠
-الحياء ده زينة البنت يا (جمر) ده بيحليكى فى عينه أكتر وأكتر
-انتى بتحبى (هارون) ده برده ؟ ولا هتتجوزيه عشان هو شاب كويس
ابتسمت (حكمت) ثم قالت
-معرفتش الحب إلا لما هو دخل حياتى
-لااااا ده انتى تقعدى طول الليل تحكيلى بقى
هزت (حكمت) رأسها بالإيجاب ٠٠
بعد انتهاء حفل الزفاف اتجه (ياسين) و (مهرة) إلى منزلهم الخاص فنظرت له (مهرة) وهى تشعر بالخجل فأبتسم (ياسين) ثم قال
-اتى لساتك بتكسفى منى يا (مهرة) ؟
هزت رأسها بالإيجاب ولكنها توجهت نحو صينية الطعام وجلست أمامها فزم (ياسين) شفتاه ثم قال
-اتى هتجعدى تاكلى يا (مهرة)
-چعانة يا (ياسين) من امبارح محطتش حاچة فى بوجى وبعدين انى اللى عملت كل الوكل ده محدش رضى يساعدنى واصل جال ايه يجولولى واتى فاكرة نفسك عروسة بصحيح ولا إيه
ثم وضعت يدها فى خصرها وقالت
-إيوة عروسة اومال إيه ٠٠ إلهى ينشكوا فى معامعيهم بس انى مهمنيش روحت عملت كل الوكل ده لينا
ثم جلست امام الصينية وبدئت فى أن تأكل ونظرت له قائلة
-تعال متكسفيشى يا (ياسين) ٠٠ موحشكش اكلى ولا ايه
ابتسم (ياسين) ثم قال
-اتى واكلك وحشتونى يا (مهرة)
ابتسمت (مهرة) قليلا ثم قالت
-بحبك يا سمسم
ابتسم هو لها ثم جلس يجوارها فبدئت هى بأطعامه فى فمه فأطعمها هو الأخر ولكن فجاءة تحولت معالم وجهه للعبوث
-بصحيح يا (ياسين) كان فى بت ملونة إكده شفتك واجف معاها مين ديه
ابتلع (ياسين) ريقه ثم قال
-ديه ديه ٠٠ ممرضة شغالة عند (سراچ) و ٠٠ وهو هيتچوزها
نظرت له بريبة ثم قال
-مع ان اللى شفته يجول انك كت معچب بيها ٠٠ بس هعديها
-مخك كبير يا (مهرة)
-بس تبص تانى بارة هخزقلك عينيك التنين ولا ات عشان محلو بزيادة هتشوف حالك عليا
ابتسم قليلاً ثم قال
-عينيكى هما الحلوين
-عارفة ٠٠ انى كلى حلوة اصلاً ٠٠ ده وانى فى العدة چالى 5 رايدين يتچوزنى بس انى مكنش ليا مزاچ كت بطرجهم
نظر لها (ياسين) بغضب فقالت
-بتبصلى ليه إكده اومال لو وافجت هتبصلى كيف
ضحك (ياسين) كثيراً
-مهتتغيريش ابداً يا (مهرة)
ابتسمت هى قليلاً ثم قالت
-يعنى مهتبصش لغيرى !!
-ابداً
أبتسمت هى بخجل ثم قالت
-طب مش هنصلى زى المرة اللى جبل ديه
ابتسم (ياسين) ثم وضع يده على رأسها بحنان وقال
-يلا نصلى
وتوجها سوياً لكى يصلى بها ويبدئوا ليلتهم الأولى ٠٠

#ظلمة_جهل_أفسدت_عشق

#علا_السعدني