Glossary Of Alive (Completed)

Part-30 ( a try to be a villain)

Unicode

"Morning နေရောင်...
ညကကောင်းကောင်းအိပ်ပျော်ရဲ့လား..."

ဘယ်အချိန်ကတည်းကရောက်နေမှန်းမသိတဲ့ကောင်းကင်က မနက်စာဝိုင်းမှာ သူ့ကိုစီးကြိုနေသည်။

"ဘုန်းရှိန်ဝါထက် မနိုးသေးဘူးလား..."

သူအန်တီမြကိုမေးလိုက်တော့ ကောင်းကင်မျက်နှှာညှိုးသွားသည်။

"မနိုးသေးပါဘူး အစ်ကိုလေး..."
"အဖျားတက်သေးလား..."
"အဖျားကကျသွားပါပြီ..."
"တော်သေးတာပေါ့.... "

မနက်စာကသူ့အကြိုက်မုန့်ဟင်းခါး...

အန်တီမြထည့်ပေးတာကိုသာ သူစားနေရင်း ကောင်းကင်ကို လျစ်လျူရှုထားမိသည်။

"ဒီနေ့စာကြည့်တိုက်မှာ ငါတို့ group B presentation အစမ်းလုပ်ရမှာမမေ့နဲ့ဦးနော် နေရောင်...."
"အင်း..."
"ငါသွားတော့မယ်.... "

ထွက်ခွာသွားသည့် ကျောပြင်ကိုကြည့်ရင်း သလင်းမြူ သက်ပြင်းချမိပါသည်။

"အစ်ကိုလေး စစ်ကောင်းကင်က ဒီနေ့အစောကြီး မုန့်ဟင်းခါးတွေဝယ်လာပြီး အစ်ကိုလေးနိုးတဲ့အထိ ထိုင်စောင့်နေတာ..."
"သူစားသွားလား...."
"မစားသွားဘူး...
အစ်ကိုလေးနိုးလာမှအတူတူစားမယ်ဆိုပြီး..."

သလင်းမြူ ခံတွင်းထဲမှမုန့်ဟင်းခါးပင် အရသာမရှိတော့....

အမြဲမုန့်ဟင်းခါးဆို အနည်းဆုံး နှစ်ပွဲစားတတ်သူက တစ်ပွဲတောင် မကုန်ဘဲ ထသွားသောကြောင့် အန်တီမြတို့က အံ့ဩသလို...

"တောင်းပန်ပါတယ်..... ကောင်းကင်....."

အရုပ်ကြီးရင်ခွင်ထဲတိုးဝင်ဖက်ရင်း သူခပ်တိုးတိုးဆိုမိပါသည်။

Power Point တွေနှင့် print ထုတ်ထားသည့် စာရွက်တွေကိုသေချာစစ်ဆေးကာ သူအောက်ထပ်ကိုဆင်းခဲ့တော့သည်။

"နန်း!...
နှင်းဆီတွေကိုမထိပါနဲ့လို့ ကိုယ်ဘယ်နှခါပြောရမလဲ...."
"ကိုဘုန်းစိုက်ထားတာတွေကို နန်းကဘာလို့ထိလို့မရရမှာလဲ...."
"ကိုယ်စိုက်ထားတာ ငယ့်အတွက်....
နန်းအတွက်မဟုတ်ဘူးလေ...."

လှေကားကဆင်းကတည်းကကြားရသည့် ခပ်မာမာအသံတွေ....

ဧည့်ခန်းစားပွဲပေါ်မှ ဖြတ်ယူထားသည့် နှင်းဆီဖြူတွေကို မြင်လိုက်ရတော့ ထိုမိန်းမသူ့ကို တမင် တိုက်ခိုက်နေမှန်းသိလိုက်သည်။