3rd Person's POV
Tahimik na naglalakad ang mag-asawag Jackie at Vice sa dalampasigan ng San Juan beach sa La Union habang magkahawak kamay. Nagkukulay kahel ang kalangitan sa dahan dahang paglubog ng araw sa kanluran.
Maya maya ay huminto sila at humarap sa dagat dahilan para pareho silang tamaan ng liwanag ng papalubog na araw.
Nilingon ni Vice si Jackie bago ito napangiti. Dinala nito ang kamay ng huli sa mga labi niya para gawaran ng mumunting mga halik.
"Finally, natapos din yung kasal natin."
Sabi ng lalaki sa asawa niya na ngumiti lang din bago yumakap dito. Nakangiti si Jackie habang nakayakap sa dibdib ni Vice.
Nakangiti pero may mga luhang tumutulo mula sa mga mata niya.
May saya pero may kasamang lungkot.
Ramdam man ni Vice ang mga luha ng asawa na siyang bumabasa sa suot nitong puting cotton na polo ay hindi na ito nagtanong pa.
Yumakap lang din ito ng mahigpit kay Jackie tapos ay humalik sa tuktok ng ulo nito.
"Parang kailan lang no? Parang kailan lang yung una nating pagkikita. Ay mali! Pagkakakilala pala."
Sabi ni Vice habang nakamasid sa malawak na karagatan.
Para bang nag-babalik tanaw sa nakaraan nilang mag-asawa.
"Yung mga pinakamasasayang araw ng buhay ko, Jackie, lahat andun ka. Mapa-gala man natin, mapa-food trips o kahit pa nga yung mga away eh. Andun ka. Kasi ikaw yung naglalagay ng saya sa mga araw na yun."
Dugtong nito sa unang sinabi. Lalo lang namang naiyak si Jackie at ngayon ay humihikbi na. Bahagya siyang lumayo sa asawa upang pagmasdan ito.
Hinaplos niya ang mukha ni Vice at tahimik na tinitigan na parang minimemorya ang bawat detalye nun.
Hindi mapagkakaila ng makakakita na sa pagitan ng dalawang taong nakatayo sa dalampasigan ay ang isang pagmamahalan na sinubok na ng panahon.
"Mahal na mahal kita, Vice. Alam mo naman yun di ba?"
Sabi ni Jackie. Tumango lang si Vice bago pinunasan ang mga luha sa pisngi ng kabiyak. Humalik ito sa noo ni Jackie pagkatapo ay sa dulo ng ilong nito tsaka tumitig sa mga mata ng asawa bago hinalikan ng tuluyan ang mga labi nito.
Flashback....
Unang nagkakilala ang dalawa sa isang social media platform. 3rd year college si Jackie ng mga panahong. Hindi sinasadya at hindi pinagplanuhan.
"Sira madali lang naman yan! Ano ka taga kuweba. Jusko naman Jackie. Akina yang phone mo, igagawa kita ng twitter account."
Si Madc yun. Kasalukuyan silang nakaupo sa loob ng isang fastfood chain na malapit lang sa school nila. Para manahimik ang kaibigan na kanina pa siya kinukulit ay inabot nalang ni Jackie ang phone niya na agad namang hinablot ni Madc.
"Ano bang gusto mong username? Uhm. Alam ko na!"
Sabi ni Madc habang tumitipa sa phone ni Jackie. Napabuntong hininga nalang ang huli bago nangalumbaba at tumingin sa labas ng bintana.
"Nagtanong ka pa eh. Bilis na nga, maglalaro pa ako ng ML."
Naaasar na sabi ni Jackie matapos ang ilang minutong pagbubutingting ni Madc sa phone niya. Nakangiti namang iniabot iyon ni Madc sakaniya bago ito ngiting ngiting nagsalita.
"Welcome to the twitterverse! Makakalimutan mo ang ML dito. Malay mo makahanap ka pa ng majojowa!"
Sabi nito. Nag-roll lang ng mata si Jackie bago kinuha ang phone mula sa kaibigan at tinignan yung ginawa ni Madc na profile niya. May isa na siyang follower, malamang, si Madc.
