اصابه خدر الحب لهجة عراقية وتوجد فصحى على مكتبة نور

الفصل التاسع

شلونكم بنات اني شفت كل تعليقاتكم وان شاء الله راح انشر فصلين كل مرة لخاطركم رغم انو اني شفت اغلبية الكاتبات فصولهم مو هواي اكبر من فصولي وينشرون مرة بالاسبوع . وبالنسبة للنشر حبيباتي مثل ما نوهت هو اثنين وخميس فقط. اتمنى يزيد تفاعلكم وية زيادة الفصول ولا تنسون من يسالون بالفيس بوك عن قصص حلوة ترشحون قصصي وسوولي تاك حتى اشكركم على الترشيح

#اصابه_خدر_الحب

كتابه رؤى صباح مهدي

الفصل التاسع

العراق كعد محترك كل القنوات تذيع باخبار الانفجارات وكلسا اكو تحديث بعدد الشهداء والجرحى. سلسلة انفجارات هزت العراق من الشمال للجنوب ب 7 محافظات ما فرق الإرهابيين ين مكانها على الخريطة ومنو يسكنها. بدت ببغداد. جانت زهرة بفراشها بعدها نايمة بفراشها ورة ما رجعت متاخرة بالليل وطبت بهدوء حتى متوعي احد؟ اهتز بيتهم كانما لعبة من الورق وكمزت زهرة بشكل لا ارادي مثل ما متعودة وقت ما يهتز البيت وبخطوتين راحت الى غرفة زين اللي جان هو هم خايف وكالت دطمنه:

"لتخاف حبيبي بردا وسلاما"

حضنها بقوة ورغم هي حاولت تطمنة بس ظل جسمة يرجف ومحد يعرف بس الله شنو اللي براسه من يرجف بخوف هلشكل.

طبت عواطف للغرفة وشافت زهرة وزين كاعدين على الفراش واحد حاضن الثاني فصاحت:

"انفجار بالكرادة"

كالت زهرة وهي تبجي:

"لا حول ولا قوة الا بالله"

وكملت :

"هذولة الانذال مراح يعوفونه بحالنة حسبي الله عليهم"

ورة ما هدأت الاهتزازات همة هم هدأو ا وتجمعوا بالمطبخ حضرت الهم عواطف بيض مكلة للريوك. اكلو شوية من الماعون فصاحت بيهم:

"اكلوا ترة الجوع ميفيد"

باعت الها زهرة وهي دتكمل حجي:

"البارحة بيش الساعه رجعتي خاتون؟"

جاوبتها زهرة مرتبكة:

"متأخرة. التاير طك بالطريق وتاخرنة من وراه"

صرخت عواطف بيها:

"لتكولين لزامل ابد افتهمتي ترة اذا عرف يموتنا"

هزت زهرة راسها وخلت لكمة اكل بحلكها وهمة يباوعون على الاخبار اللي نقلتها قناة العراقية الإخبارية.

(العدد الاولي لضحايا انفجار الكرادة في تزايد حيث بلغ عدد الضحايا 9 شهداء و21 جريح بعضهم في حالة خطرة.. بينما ضحايا شهداء تفجيرات المدائن والمحمودية وتقاطع النهروان والكاظمية والسيدية وطريق معسكر الرشيد وأبو غريب في تزايد.. )