اصابه خدر الحب لهجة عراقية وتوجد فصحى على مكتبة نور

الجزء 15

السلام عليكم حبايب.

حيا الله كل المتظاهرين بكل مكان بالعراق. قوة العراق بيكم الله يحميكم وينصركم وقلبنا كلنا وياكم

بنات اليوم كتبت فصل واحد بس الوضع الصراحة ميساعد وبلدنا يعاني ويتألم بالي كلة يمهم وماكدرت اكتب اكثر. الاسبوع الجاي هم مراح اكتب تضامنا وية المظاهرات والمتظاهرين واتمنى انتو هم تتضامنون وية اخوانكم

وهسة اتمنالكم قضاء وقت جيد وية ثائر عراقي ما يختلف عن الالاف اللي طلعوا بالمظاهرات اللي همهم بلدهم ولاؤهم اله مطلق واليوم يوم مميز اله.. 

#اصابه_خدر_الحب

كتابة رؤى صباح مهدي

الفصل 15

انغمست زهرة بشغلها بالمستشفى وية أسماء اللي جانت تتصل بذيج اللحظة وبعدين باوعت على زهرة وضحكت. ما اهتمت زهرة كالت يجوز ديتخايل الها ومتدر يان الاتصال جان من امير اللي اتلقى أوامر صارمة من طه قبل شوية. ومتدري ان أسماء من نوعية البنات الفضوليات الى ابعد الحدود واكيد ما عافت امير الى ان عرفت بالضبط سبب حاجته لوقت طلعت زهرة من المستشفى. طبعا اول ما عرفت بطه طالبها رأسها ظلت تمدح بزهرة وكالت:

"زهرة من احسن البنات اللي تعرفت عليهن وهاي اول معلومة لازم تكولها لصديقك الصدوق"

وورة ما اكد الها امير ا ن هاي اول معلومة راح ينقلها وانتهى الاتصال اقتربت أسماء من زهرة وسألتها:

"شوكت اليوم تخلصين؟"

كالت زهرة وهي تفكر:

"زوج عمتي طلب مني اداوم بس4 ساعات بحجة ارجع للبيت اساعد عمتي .. بس اني راح اظل لحد ما اخلص شغل واليصير خل يصير"

جاوبتها أسماء:

"يجوز يخاف عليج زهرة .... الدنيا مو امان "

بحلقت بيها زهرة وسألتها:

"انت تقولين هذا الكلام؟ وانت يمكن ما تشوفين البيت من مكان لمكان"

ضحكت أسماء وردت:

"انت ما تعرفين؟ ابوية مايفارقني لحظة وحدة ويجي وياية لكل مكان اروحلة. واذا ما يقدر فاخوية الجبير."

تعجبت زهرة من الي سمعته و كالت:

"معقولة؟ "

هزت أسماء راسها وقالت لزهرة:

"ابوية ما يمنعني من أي شيء. وبالذات من أقول اريد اساعد الناس.. دائما يشجعني ومستعد يوصلني باي وقت لاي مكان المهم احقق ذاتي واسوي الشي الي يرضي ضميري"

تبسمت زهرة وحبست دمعه بعينها. لو جان والدها حي ما جان كدر زامل يتحكم بيها. كل ذكرياتها عنه حلوة عمره ما نهرها او ضربها ودائما واجه عنادها بصبر شديد حتى من أمها جانت ترفض طلب من طلباتها الغريبة بطفولتها او مراهقتها جانت تروح لابوها بالبسكوت فيسويلها اللي هي تريده ويكو نبينهم سر ميكولوه لامها. كال الها مرة من المرات كلام مستحيل تنساه: