اصابه خدر الحب لهجة عراقية وتوجد فصحى على مكتبة نور

الفصل 11

دا اكتب بفصل الثاني مال اليوم ان شاء من اكمله انزله صوتوا حبايب 

#اصابه_خدر_الحب

كتابه رؤى صباح مهدي

الفصل ال11

كعدت بيبيته يم راسة ولزمته بكل قوتها الواهنة ولسانها ما سكت يردد ايات قرانية وبنفس الوقت ايد زهرة رجفت وبدت تشكك بنفسها والة شوية وتتراجع عن قرارها بس أخيرا تشجعت وقبل لا تحط السجين على جلده كالت:

""طه.. ماعندي أي حل اخر... هذا لمصلحتك"

بعدين خلتها على لده وسمعت صوت ازيز وريحة لحم محروك وصراخ طه اللي صم الاذان بجت بيبيته وكالت بصوت متالم:

"عين وصابتك يا بعد جبدي"

وبجت زهرة لا اراديا من سمعت صوت صراخه المتالم واللي ماكدر يسيطر عليه هالمرة. بلع ريجة وفاق من الاغماءه وبس فتح عينه التقت عينه بعين زهرة الباجية وكالت زهرة:

"طه اسفة....."

قاطعها بصوت وهنان وتعبان:

"شكرا.. شكرا"

حاولت هي وبيبيته يشيلوه ويحطوه على الفراش مالته وبالكوة كدرن يحطنه على الفراش نايم على ظهره صدره عاري ومحروك والعرق ينزل من كل مكان بجسمه. كالت زهرة لبيبي:

"خل نسويله كمادات حتى تنخفض شوية حرارته"

راحت ام محمد وجابت مي وخاولي نظيف اخذتهن زهرة منها من شافتها منهكة وتلهث وكالت:

"انطيني بيبي انت اكعدي شوية استراحي"

اخذتهن منها وبدت تسوي كمادات لطه وهو يهذي من الحمى والالم:

"لا.. لا ... كلشي ضاع .. واني ضعيت حياتي.. انتهيت مابقى شي يستاهل أعيش لخاطرة..""

حست زهرة بالالم لحالته وهي تشوف ولد مثل الورد هيج مشمور على الفراش يهذي ولحد الان متعرف هذا الجرح العنيد شلون صابه وهاي الرصاصة منين اجته. بهذا البلد الرصاص بكل مكان بس .. تذكرت الفلاش ميموري اللي لكته بأول لقاء بينهم. شنو سره؟ ليش هذا الولد ظاهرة بسيط بس هو بالحقيقة معقد كلش وغامض. وليش سايق تكسي يملك جسم رياضي وبنية قوية ويمشي وية صحفي ويروح لمخيمات واسرار هواي داير مدايرة وميروح للمستشفى ..ووووو.. هواي شغلات خلتها تفكر ان طه لو حرامي لو مجرم والا شنو هو التفسير المنطقي لكل هالاشياء؟

من ربطت طه بعالم الاجرام تذكرت الليلة المشئومة اللي ولا تنساها. بس بعدين رجعت وفكرت مستحيل طه حرامي او مجرم. مواقفة وياها تثبت هذا الشي. هذا الولد قلبه مو قلب قاسي لا قلبه قلب مابي أي شر.

سمعت رنة تليفونها وجانت عمتها:

"انت وين؟"

ردت زهرة: