اصابه خدر الحب لهجة عراقية وتوجد فصحى على مكتبة نور

الفصل14

#اصابه_خدر_الحب

كتابة رؤى صباح مهدي

الفصل 14

امير جان دينتظر طه اللي اجة عليه بسيارته التكسي عبالك ماسح كل الحزن من قلبه وماكو أي هم بي. جان يربط اليشماغ داير مديار ركبته ومبين عليه جدي كلش ومنتبه فقال امير اله ديتشاقة:

"على كيفك ترة ماداخلين حرب"

كال طه متبسما:

"احنة بنص الحرب امير لو نسيت الديصير بالبلد"

هز امير رأسه موافق وجاوب:

"عندي معلومات طه.. حصلتها اليوم من مصادري.. اكو شخص ديدور عليك.. بالأحرى يدور على الملثم اللي دخل السفارة الامريكية. الظاهر الفلاش ميموري اللي ضاعت منك بيها معلومات خطيرة جدا وتفضح هواي ناس .. حرامات ضاعت"

ضرب طه ستيرن السيارة متعصب وبكل غل قال:

"افففففففففففففف"

وصلوا لأول موقع حصلوا عليه الموافقات علمود الحراسة الليلية وجان اكو 3 شباب كاعدين يم عمود كهرباس يشربون جاي ويسولفون بصوت عالي نوعا ما وراسا وكفوا عن الكلام اول ما وكفت السيارة قريبه عليهم وظلوا صافنين عليها متنبهين لحد ما نزل امير نها وويا طه فاستراحوا.

سلم عليهم امير وعرفهم ب طه فعرضوا عليهم جاي بس طه رفض بادب بنفس الوقت امير اخذ جاي وظل امير يحجي بس طه جان ساكت. أخيرا قرر الصديقان يروحون يستطلعون المحطة الجاية بالحي واللي تبعد عن هاي المحطة كم زقاق. كاموا وظلوا يمشون بطريقهم وعيونهم منتبهة لكل شيء يصير.

--

كعدت زهرة الصبح ساعه 6 وكل اللي بالبيت جانو نايمين وا هيج عبالها. دخلت المطبخ سوت شوية اكل خلت بالماعون تاكل منه ولفت الباقي تاخذة وياها وما انتبهت زامل دخل للمطبخ من جانت مشغولة تحضر الاكل. جان يباوع عليها بنظرات طويلة ويفكر . كال الها:

"زهرة اريد احجي وياج"

التفتت عليه وكلبه يرجف تتذكر الصار البارحة جانت تباوع عليه وهو مدخل ايده بفانيلته يلعب بشعر صدره . ما نطقت باي حرف ظلت تباوع عليه خايفة لا يكول الها ما تروحين للشغل . أخيرا فتح حلكة وحجة:

"محتاج شئ من المستشفى تقدرين تجيبي الي؟"

تلاشت نظرة الرعب على ملامحها وظهرت مكانها نظرة الاستغراب. قالت له:

"أي دكتور ممكن يكتب الك أي دوة تريده"

هز رأسه وقال لها:

"لا لا ما افتهمتيني.. ماريد دوة.. شوفي.. اكو شخص تصوب بحادث وهذا الشخص مو زين .. حرامي يعني وسرق شغله مهمة وبنفس الوقت انضرب بايده او صدره برصاصة.. هو اكيد احد ساعده والا مستحيل يظل عايش ورصاصة بجسمه.. اريدج تسالين بطريقة غير مباشرة اذا احد من الأطباء التعرفيهم او اللي يشتغلون بالمستشفى ساعد شخص .. خارج المستشفى. يعني راح لبيت المريض وعالجه"