(Unicode)
အခန်း - ၄၀
ထွက်လမ်းမရှိတော့သည့် အတွက် စက္ကပါလတို့ လူစုက အလယ်၌ ရပ်နေကြသည်။ သူတို့က တစ်ယောက်ကိုတစ်ယောက် ကျောချင်းကပ်ထားကြပြီး တစ်ဖက်မှ ရန်သူကို တိုက်ခိုက်နေသည်။ ရာဇတိုင်းမှ စစ်သည်များသည် အလုံးအရင်း ဝင်ရောက်လာပြီး သူတို့အား တိုက်ခိုက်နေသည်။
မြေခွေးစစ်တပ်မှ ဖြစ်စေ ကျားစစ်တပ်မှ ဖြစ်စေ အကျအဆုံး များလှသည်။ နန်းတော်၏ ပတ်ပတ်လည်အတွင်း တိုက်ပွဲများ ဖြစ်နေသည့်အတွက် အခြားသော အုပ်စုမှ စစ်သည်များသည်လည်း သူတို့အား လာရောက် မကူညီနိုင်ပေ။ ကျားစစ်တပ်၏ ခြင်္သေ့တပ်မှုးသည်တော့ အုပ်စုမှ ဖောက်ထွက်ကာ သူတို့ဆီသို့ လာနေသည်။ သို့သော် တစ်ဖက်ရန်သူများက ခြင်္သေ့တပ်မှုးအား သူတို့အား သွားရောက် မကယ်ဆယ်နိုင်ရေးအတွက် ဖိအားပေးကာ တိုက်ခိုက်နေသည်။
" စက္ကပါလ နင်က လက်နက်ချပြီး နင့်စစ်သည်တွေကိုရပ်ခိုင်းလိုက် ဒါဆိုရင် ဒီမိဖုရားက နင့်ကို အသက်ချမ်းသာခွင့် ပေးမယ် "
မိဖုရားကြီးသည် နန်းတော်ညီလာခံ ရင်ပြင်ထက်မှ ခါးထောက်ကာ ပြောလိုက်သည်။ စက္ကပါလသည် သူ၏ စကားကို လျစ်လျူရှူ့ကာ မသိကျိုးနွံ ပြု၍ နေသည်။ ဤကဲ့သို့သော အခက်အခဲနှင့် ကြုံတွေ့နေရသော အချိန်၌ သူက ဝေဠုမဏိကို သတိရမိသည်။ အခက်အခဲများနှင့် ရင်ဆိုင်ကြုံတွေ့ရသည့် အခါတိုင်း ဝေဠုမဏိက သူ့ရှေ့၌ အမြဲတမ်းရှိခဲ့သည်။ ထို့အတူ အသက်ဘေးနှင့် ရင်ဆိုင် လာခဲ့သည့် အခါတိုင်းလည်း သူ့ရှေ့၌ မားမား မတ်မတ်ရပ်ကာ ကာကွယ်ပေးခဲ့သည်။
ထို့အတွက် သူက ဝေဠုမဏိအား များစွာ သတိရမိသည်။
' ငါက ဘာကြောင့် သူ့ကို သတိရနေရတာလဲ သူက ငါ့အနားက ထွက်ခွာသွားခဲ့ပြီပဲ ငါက သတိရနေစရာ မလိုဘူး '
စက္ကပါလက စိတ်ထဲမှ ထွေးလိုက်သည်။ ထို့နောက်တွင် သူက လက်ထဲမှ နေသူရိန်ဓားကို ကိုင်ကာ ရန်သူများအကြား ဝင်ရောက်သွားသည်။ သူက ကာကွယ်သူများနှင့် ဝေးသွားသည့်အတွက် တစ်ဖက်ရန်သူများက သူ့အား ဖိအားပေး၍ တိုက်ခိုက်ကြသည်။
YOU ARE READING
The Story Of A Prince (Complete - BL)
Fantasyမင်းသားတစ်ပါး၏ ပုံပြင် ဆိုသည့်အတိုင်း ဒီဇာတ်လမ်းပါ အကြောင်းအရာအားလုံးက ကျွန်တော့်ရဲ့ စိတ်ကူးယဥ် သပ်သပ်သာ ဖြစ်ပါတယ်။ ဒါဆိုရင် ဇာတ်လမ်းလေးကို စပြီး မိတ်ဆက်ပေးပါ့မယ်။ မဏိရောဂတိုင်း၊ စေသုဒ္ဓါပြည်ထောင်၏ ပြည့်ရှင် မရိန်ဓတွင် သားတော် ကိုးပါးရှိ၏။ ယင်းသားတ...
