အခန်း ( ၃ )
မိုးရိပ် အိမ်ကို ပြန်ရောက်တော့ ဆယ့်တစ်နာရီပင် ထိုးပြီ ။ အိမ်တံခါးကို သေချာပိတ်နေတုန်း မေမေ့ အသံကြားလိုက်ရသည် ။
"သား ဒီနေ့ ပြန်လာတာ နောက်ကျလှချည်လား "
"ဟုတ်တယ် မေမေ ။ ဘတ်စ်ကားစောင့်နေရလို့ ။ မေမေ ခုထိ မအိပ်သေးဘူးလား "
မိုးရိပ် အလုပ်စဆင်းသည့်နေ့ထဲက သည်နေ့ထိတိုင် အလုပ်မှ ပြန်ရောက်မည့်အချိန်ထိ မေမေက အမြဲစောင့်ပေးသည် ။ မိုးရိပ်ကို ထမင်း၊ဟင်း ထည့်ကျွေးပြီးမှ အိပ်ရာဝင်လေ့ရှိသည်။
"သားကို စိတ်ပူလို့လေ ။ သား ပြန်လာတဲ့လမ်းမှာ တစ်ခုခုများ ဖြစ်မလားလို့တွေးမိပြီး စိုးရိမ်စိတ်နဲ့ အိပ်လို့မရပါဘူးကွယ် "
"မေမေရယ် ။ သား အရွယ်ရောက်နေပါပြီ ။ ဘာမှမဖြစ်ဘူး ။ ကိုယ့်ကိုယ်ကို ကာကွယ်နိုင်ပါတယ် "
"အေးပါကွယ် ။ လာ...ထမင်းစားရအောင် ။ ဗိုက်ဆာနေပြီမဟုတ်လား "
"ဟုတ် "
မေမေ ယခုရက်ပိုင်း ကျန်းမာရေး ကောင်းလာတာကြောင့် မိုးရိပ် နည်းနည်းတော့ စိတ်သက်သာရာရမိသည်။
" ညီညီရော ၊ မေမေ "
"မင်းညီ ဒီအချိန်ဆို အိပ်ပျော်နေပြီပေါ့ "
"အဟင်း....ဟုတ်သားပဲ "
"သား "
"ဗျာ...မေမေ "
"အမေလည်း နေကောင်းနေပြီဆိုတော့ အလုပ်လေးပြန်စမလားလို့ "
"ဟာ မေမေကလည်း မလုပ်ပါနဲ့ဗျာ ။ သား အလုပ်ဆင်းနေပြီပဲ ။ မေမေ အေးအေးဆေးဆေးနားပါတော့ "
"အေးပါကွယ် ။ ငါ့သားလေး ပင်ပန်းနေမှာစိုးလို့ပါ "
"ရပါတယ် ။ သား အဆင်ပြေတယ် ။ မေမေသာ နေကောင်းအောင်ဂရုစိုက်ပါ "
"အေးပါကွယ် ။ မြန်မြန်စားတော့ ။ ဟင်းတွေအေးကုန်တော့မယ် "
"ဟုတ်ကဲ့ "
မိုးရိပ် ညစာစားပြီးနောက် စာနည်းနည်းပြန်ကြည့်ပြီးမှ အိပ်ရာဝင်သည်။ ဘေးမှာ အိပ်နေသည့် မေမေနှင့် ညီလေးကို ကြည့်ပြီး သက်ပြင်းချမိသည်။ သည်လို ဆင်းရဲသည့် အခြေအနေက လွတ်မြောက်ချင်သည် ။ ကြိုးစားရင်တစ်နေ့တော့ ဖြစ်လာမှာပါလေ။ မိုးရိပ် မျက်လုံးမှိတ်ပြီး အိပ်ပျော်အောင် ကြိုးစားတော့သည်။
YOU ARE READING
အမုန်းခ အချစ်ခြွေ < Completed >
Romanceဤဇာတ်လမ်းပါ အကြောင်းအရာများသည် စာရေးသူ၏ စိတ်ကူးသက်သက်သာ ဖြစ်ပါသည် ။ Boy's Love Story Own Creation. M_pregnant Photo crd.