ကုဋေ ဘန်ကောက်ကို mallကိစ္စနှင့်ရောက်လာရင်း ရောက်တုန်းရောက်ခိုက် ဆေးရုံကိုဝင်လာလိုက်သည်။
ကားပါကင်ဝန်းထဲတွင် ကားကိုရပ်နားလိုက်ပြီး ဆေးရုံထဲသို့ လမ်းလျှောက်ဝင်လာရာ
မလှမ်းမကန်းကတစ်နေရာတွင် လမ်းဘက်ကိုကျောပေးထားကာ ငြိမ်ငြိမ်သက်သက်လေးထိုင်နေသော ကျောပြင်ငယ်လေးကိုအမှတ်မထင် တွေ့လိုက်ရသည်။
ဖြူဖြူလွှလွှကျောပြင်ငယ်လေးကိုကြည့်ပြီး ရင်ထဲတစ်မျိုးလေးဖြစ်နေသဖြင့် ထိုနားတင်ရပ်ပြီး ကြည့်နေမိသည်။
လူတစ်ယောက်ရဲ့ကျောပြင်ကိုခုလိုရပ်ငေးဖူးတာ ခုလိုခံစားချက်မျိုးဖြစ်ပေါ်လာဖူးသည်က မင်းမြတ်ကုဋေဟန်၏ ဘဝတွင် ပထမဆုံးအကြိမ်ဖြစ်သည်။
မြင်နေရသည့် ကျောပြင်သေးသေးလေးကတောင် နွေးထွေးနေလေ၏။
"နေပါဦး ....ခု ကိုယ်ကဘာတွေများတွေးနေမိပါလိမ့်...ဒီခံစားချက်ကြီးကရော ဘာပါလိမ့်...အဟက်..ပေါက်ကရတွေ..."
ကုဋေ သူ့စိတ်၏ ဖြစ်ပေါ်နေမှုများကို နားမလည်နိုင်သလို ဖြစ်နေခိုက် မြင်နေရသည့် ကျောပြင်ငယ်လေးက တသိမ့်သိမ့်တုန်လာသည်ကိုတွေ့လိုက်ရသည်။
"ဟင်...ငိုနေတာလား...."
ကုဋေ နောက်မှာရပ်ကြည့်နေရင်း မြင်နေရသည်မှာ စိတ်ထဲအဆင်မပြေတော့။
ထိုကောင်ငယ်လေး ငိုနေသည်က ဘာအတွက်ကြောင့် သူ့ပါလာမွန်းကြပ်နေရပါသလဲ...။
အိတ်ထောင်ထဲမှာ မာမီအမြဲထည့်ပေးထားတက်သည့် လက်ကိုင်ပဝါလေးကိုထုတ်လိုက်ပြီး ထိုကောင်ငယ်လေး နဘေးသို့သွားပြီး ပေးလိုက်သည်။ကုဋေက ပုဝါဘာညာမဆောင်တက်သော်လည်း မာမီကတော့ အမြဲထည့်ပေးထားလေ့ရှိသည်က ခုလိုချိန်မှာ အရန်သင့်ဖြစ်သွားသည်။
"အဆင်ပြေရဲ့လား..."
ဟူ၍ ခပ်ကြည်ကြည်မေးသံနှင့်အတူ ပုခုံးနားရောက်လာသည့် လက်ကိုင်ပဝါလေးတစ်ထည်။
ဦးညို မော့မကြည့်ပဲ ယူလိုက်ပြီး
"ကျေးဇူးတင်ပါတယ်ဗျ...."ဟူ၍ ခပ်တိုးတိုးပြောလိုက်သည်။
ကုဋေ အစကတော့ လက်ကိုင်ပဝါပေးပြီးရင် လှည့်ပြန်မည်ဟုစိတ်ကူးထားသော်လည်း
ခြေထောက်များကတော့ သူ့စိတ်ကို ဆန့်ကျင်စွာ ကောင်ငယ်လေးဘေးကိုဝင်ထိုင်လိုက်လေပြီ။
ဘေးတိုက်မြင်နေရသည့် မျက်လွှာချထားသောဖြူနုနေသောမျက်နှာငယ်လေး၊ငိုထားတာကြာပြီဖြစ်၍ ရဲရဲနီနေသော နှာဖျားလေးနှင့် မျက်ခုံးနားတစ်ဝိုက်ထိ ဝေ့ဝဲကျနေသော ဆံပင်ကောက်ကောက်ခွေခွေလေးများ..
ကုဋေ အနီးကပ် စိတ်ထဲမှာ ဖော်ကြူးမိနေခိုက် ကိုယ်ငယ်လေးဟာ တစ်သိမ့်သိမ့်တုန်လာပြန်၏။
*ဘာတွေများ ဒီလောက်ထိတောင် ဝမ်းနည်းနေရတာလဲ ကလေးရယ်...*
ကုဋေ ပုခုံးကိုပုတ်ပေးပြီး နှစ်သိမ့်ပေးလိုက်ချင်ပေမယ့် လက်ကိုပြန်ရုတ်လိုက်သည်။ခုမတွေ့သည့် သူစိမ်းတစ်ယောက်က ထိုမျှထိလုပ်ဖို့ရန် မသင့်ဟု သူတွေးလိုက်မိသည်။
သူလုပ်လိုက်သည့်အပြူအမူကို ထိုကောင်ငယ်လေး မကြိုက်ရင် သူ့ဘာသာဝမ်းနည်းနေသည့်ကလေးကို ပို၍ စိတ်ရှုပ်သွားအောင် မလုပ်ချင်သဖြင့်
"တကယ် အဆင်ပြေတယ်နော်...အာ့ဆိုကိုယ်သွားပြီ....အရမ်းကြီးမငိုပါနဲ့ မျက်လုံးတွေနာနေလိမ့်မယ်..."
