Nakatalikod si Keanna at nakatigilid ng higa. Nakayakap sa kaniya si Cale. Tulog na ito, pero siya, hindi niya makuha ang tulog niya dahil maraming tumatakbo sa isip niya.
Aware naman siya sa posibleng pagpunta ni Cale sa New York. Hindi pa sila, nagre-review na ito para sa exam na kukunin para sa master's degree. Noong mga panahong iyon, magka-video call pa sila hanggang madaling-araw habang nagbabasa ito ng notes.
Si Keanna rin ang unang sinabihan ni Cale tungkol sa pagpasa nito sa New York University. She was proud of him, she was happy, but scared.
Being an overthinker was one of Keanna's unwanted traits. May tiwala siya kay Cale, pero may pagkakataong nagkakaroon siya ng takot.
Ramdam niya ang higpit ng yakap ni Cale mula sa likuran. Nakatingin lang siya sa liwanag na nanggagaling sa balcony ng kwarto at iniisip ang ilang posibilidad.
Naisip din naman niya na habang mas lalayo pa si Cale, mas magiging focused na lang si Keanna sa business ng pamilya nila. Mas tutulungan na lang niya si Sarki para hindi na siya gaanong mag-isip pa.
Keanna also decided not to tell Cale what she felt. Ayaw niyang magdalawang-isip na naman ito sa pagtanggap o pag-enroll sa America dahil sa kaniya.
Bata pa naman silang dalawa kaya marami pang opportunities lalo sa parte ni Cale. Simula pa lang din naman, alam na ni Keanna ang pinasok niya.
Being with Sean Caleigh Karev was a risk Keanna took, and she had no regrets. She loved him and would always support him, that was for sure.
Bumangon si Keanna nang makita ang kaunting liwanag na nanggagaling sa bintana. Inipitan niya ang buhok bago pumasok sa loob ng banyo para maghilamos at mag-toothbrush.
Naisip ni Keanna na magluto ng almusal.
Paglabas niya ng bathroom, nakadapa si Cale at mahimbing pa rin na natutulog. Hinalikan muna niya ito sa pisngi bago bumaba.
Bumati sa kaniya ang mga helper ng bahay. Nasa hagdan pa lang siya, panay na ang tanong ng mga ito kung may gusto ba siyang kainin.
"Ako na po ang magluluto," prisinta ni Keanna. "Wala pa po ba sina Tita Niana at Tito Cavin?" tanong niya.
"Wala pa, e. Wala rin kaming alam kung kailan sila babalik," sagot ni Celia, ang nakatoka sa kusina. "Ano'ng lulutuin mo, Kea?"
Sumandal si Keanna sa counter hawak ang mainit na mug na mayroong lamang kape. Iniisip niya kung ano ba ang puwedeng iluto nang maalalang nabanggit sa kaniya ni Cale na gusto nitong kumain ng tapsilog.
"May beef po ba kayo na stock, Ate?" tanong ni Keanna.
Tumango si Celia at sinamahan si Keanna na magpunta sa pantry. Mayroong malaking freezer doon na may may iba't ibang meat. Nasa loob din ng pantry ang ref ng mga gulay, shelves na puno ng stock, at kung ano pa.
"Ate, wala po bang lamig na kanin?"
Umiling si Celia. "Magsaing na lang ako. Mabilis lang naman tapos 'yun na lang ang gawin nating sinangag?"
Tumango si Keanna at nagsimulang kumuha ng mga ingredient dahil para siyang nasa mini convenient store na kumpleto lahat ng kailangan niya.
Nakakuha siya ng strip loin para gawing tapa. Hindi na magiging malasang-malasa dahil sandali lang niya maibababad. Kumuha rin siya ng maraming bawang para sa sinangag at itlog.
Mahilig din sila ni Cale sa suka na maanghang kaya siya na rin ang gagawa. Paborito nilang lagyan iyon ng cucumber, maraming sibuyas, sili, at calamansi pa.
Masayang nakikipagkuwentuhan si Keanna sa mga helper na kasama niya sa dirty kitchen. Tumutulong ang mga ito dahil nagpabalat din siya ng mga patatas para gawing side dish lang.
