𝕸𝖔𝖓𝖆𝖗𝖈𝖍

Episode: 8

ပြိုင်ပွဲအပြီး အနိုင်ရရှိသူတို့သည် နန်းတော်ထဲရှိ အမှုထမ်းအဆောင်တွင် နေထိုင်ခွင့်ပါရရှိသည်ကြောင့် နန်းတော်ထဲဝင်ရန် အကြောင်းဖန်နေခဲ့သူ မျက်ဝန်းစိမ်းပိုင်ရှင် alphaအတွက် အခွင့်အရေးဖြစ်ခဲ့လေသည်။

"ခမ်းနားလှချည်လား။ ဒါကြောင့်လည်း မာနက မိုးထိုးနေတာကိုး"

ပြောင်ယောင်သော နန်းတော်၏ အဆောင်အယောင်တို့ကို ကြည့်ရင်း တီးတိုးပြောဆိုလိုက်သော စကား။ ရုပ်ဖျက်၍ ပုန်းနေခဲ့စဥ်က မျက်မြင်တွေ့ခဲ့ရသည့် သာယာဝပြောသော Eldoraပြည်၏ အနေအထားသည် အရှင်လာဗင်ဒါ​လေး၏ အုပ်ချုပ်မှုကောင်းမွန်ပုံကို ဖော်ကျူးနေခဲ့သည်လေ။

"မင်းတို့ သုံးယောက်ထဲက တစ်ယောက်ကို အရှင့်ကိုယ်ရံတော်အဖြစ် ပြန်ရွေးလိမ့်မယ်။ ကျန်တဲ့ နှစ်​ယောက်ကတော့ နန်းတော်အစောင့်လည်း ဖြစ်နိုင်တယ်။ ဒါက အရှင့်အလိုကျ ဖြစ်တာမို့ ဒါတော့ ငါတို့လည်း ဆုံးဖြတ်လို့မရတဲ့ကိစ္စပဲ"

ခန်းမဆောင်တွင်းတွင် စောင့်ဆိုင်းနေသော အနိုင်ရရှိသူ သုံးဦးထံ တာဝန်ခံတို့က လာရောက်အကြောင်းကြားလေသည့် စကားပင်။ ကိုယ်ရံတော်ရာထူးကြောင့် သည်လောက်ထိ သည်းသည်းမည်းမည်းပြိုင်ပြီးကာမှ နန်းတော်အစောင့်လည်း ဖြစ်သွားနိုင်သည်ဆိုသည်ကြောင့် မျက်နှာတို့ပျက်ယွင်းကာ လှုပ်လှုပ်ရှားရှားဖြစ်လာကြလေသည်။

သို့သော်လည်း မျက်နှာပျက်ယွင်းသူထဲတွင် ထယ်ဟျောင်းမပါဝင်ခဲ့။ အစကတည်းက လာဗင်ဒါလေး၏ စိန်ခေါ်မှုအား အနိုင်ပိုင်းကာ ဝတ်ရုံပြန်ယူရန်သာ စိတ်ကူးရှိခဲ့သည်မို့ ကိုယ်ရံတော်၊ နန်းတော်အစောင့် စသည့် ရာထူးများကိုလည်း စိတ်မဝင်စားပါလေ။

မူလအစီအစဥ်အား အကောင်အထည်ဖော်ရန် နန်းတွင်းထဲ မျက်စိကစားမိတော့ ပြိုင်ပွဲကြောင့်ပင်လား အစောင့်များက ထင်သည်ထက် အလုပ်ရှုပ်၍နေကြသည်။ ထိုအချက်က သူ့အတွက် အခွင့်ကောင်းပင်လေ။ ဝတ်ရုံလေးအား ပြန်ယူရန် အချိန်ကောင်းဖြစ်သလို မာနခဲလေးထံမှ အလျော်အစားကိုလည်း အရယူရပါဦးမည်။

ထို့ကြောင့် နန်းဆောင်နေရာအတိအကျ မသိသော်လည်း လာဗင်ဒါလေး၏ နန်းဆောင်ကို အရောက်သွားရန် ဆုံးဖြတ်လိုက်သည်။ နန်းတွင်းထဲတောင် ရောက်ခဲ့ပြီးနေမှတော့ သိပ်မခက်ခဲနိုင်တော့ပါလေ။