انا مش عارفه اقولك اي يا منه... بس شادي طلع بيحبني انا
حسيت إن الدنيا بتلف بيا مبقتش عارفه اقولها اي
بيحبها انا سمعت صح ولا انا بيتهيألي ولا ايه
بصلتها وانا مش فاهمه حاجه وقولتها: بتقولي اي يا بسمة
بصلتي بحزن وقالت: انا اسفه بس شادي اعترفلي انه بيحبني وطلب ايدي من بابا وخطوبتنا الخميس الجاي
عيني اتملت دموع بس ابتسمت وقولتلها: مبروك يا حبيبتي ربنا يتمملك بخير يارب
ابتسمت وقالت: يعني انتي مش زعلانه مني
ضحكت ورديت: وانا هزعل ليه
اتلجلجت في الكلام وقالت: اصل.. يعني انتي.. يعني
كنتي بتحبيه
هزيت دماغي ورسمت ابتسامه باهته وقولت: لا مبحبوش ولا حاجه.....يا بنتي هو انا اي حد اكراش عليه واقول وسيم وأمور يبقا بحبه واقطع شرايني عشانه دا كلام يا بسمة... يا حبيبتي كله هزار وكلام فاضي.... ما تقلقيش مبحبوش ولا حاجه
ابتسمت وحضنتني وقالت: الحمدلله طمنتي قلبي يبقا لازم تيجي الخطوبه هزعل منك لو مجتيش انتي اقرب صاحبه ليا واكتر من اختي
طبطبت عليها وهي بتحضني قولتلها: اكيد هاجي طبعا.... بس انا لازم امشي عشان اتأخرت وماما رنت عليا
ابتسمت وقالت: خلاص ماشي.. يلا سلام وهستناكي في الخطوبه
شاورتلها ومشيت وانا مش عارفه اضحك ولا اعيط ولا اعمل اي
بسمة اعز صاحبه ليا وشادي اللي انا كنت فكراه بيحبني طب ازاي؟..... كل دا كنت بتخيل اهتمامه بيا ونظراته واي حجه كانت بيعملها عشان يتكلم معايا دي بسمة اول واحده قالتلي انه معجب بيا... كل دا وهم... عقلي اتخيل حاجات مش حقيقية وصدقها طب ليه... انا ناقصه وجع قلب.....وكل وجع اقوى من اللي قبله... يمكن انا اللي مديتلوش فرصه... طب كنت هعمل اي انا مكنتش عاوزه اعمل حاجه حرام ولا غلط عشان كدا عمري ما جاريته في الكلام ولا قربت منه... حبيته ايوا بس من بعيد لبعيد... بس خلاص مش هفكر فيه تاني... صفحه واتقفلت.. وبسمه ربنا يسعدها... خلاص هقفل على قلبي واقول مش نصيبي زي كل ضاعت وقولت مش نصيبي بس كل حاجه كدا مش نصيبي اومال نصيبي فين وهفرح امتى زي باقي الناس ولا انا مكتوب عليا الحزن وبس.
جه يوم الخطوبه طبعا هتقولولي متروحيش... بس لا هروح اصل انا بعشق المعاناه لازم اتوجع لحد الآخر عشان احتفظ بوجعي وافضل فكراه عشان مديش لنفسي فرصه تانية إني افكر... لبست فستان بيبي بلو وطرحه من نفس اللون وروحت... كانت خطوبه عائلية في البيت كوشه صغيره للعروسة شكلها لطيف وهو قاعد جنبها رسمت ابتسامه سعيدة مع انها لا تمت للسعادة بِصله بس ما علينا... قربت منهم وسلمت على بسمه اللي قالت: اتبسطت اوى إنك جيتي
ضحكت ومردتش.. وبصيت ناحيه شادي فأبتسم وقالي : عقبالك
اول مرة احس إن كلمة عقبالك بتوجع اوي كدا... يمكن عشان آخر واحد كنت افكر إنه يقولهالي.. لدرجه دي انا عشمت نفسي بحاجه مستحيله انا ليه عملت كدا... فضلت واقفه مش عارفه اعمل ايه امشي ولا استنى... انا مش عارفه اندمج في الفرح ولا عارفه امثل إني فرحانه وفي عز الدوامة دي حد قرب مني.
من اول ما دَخلت وهو عينه عليها رقيقة وهادية وحلوه اوي تخطف القلب من جمالها وهو ما صدق قرب منها وقال بغرور : الدكتور فارس سيف الدين
بَصلته بلامبالاه ومردتش... ابتسم وحس بالإحراج بس قال تاني: نتعرف
نفخت بضيق وردت : مبتعرفش... واوعى من قدامي
ومشيت وسابته
فضل باصص لها وهو مش مصدق اول مره واحده تكلمه بالأسلوب دا... قرب منه صاحبه وهو بيضحك جامد وقال: عنيفه اوي مش كدا
ضحك جامد وسأل: تعرفها
هز رأسه ورد: ايوا دي منة صاحبة بسمة اختي
ابتسم فارس وقال: طب كويس قولي بقا تعرف اي عنها
