بين وصالك أوصاف

9

بيـــن وصـــالك أوصاف ؛
أستغفر الله العظيم وأتوب اليه 🩶
*
يوم جديد وصباح جديد , صباح صحت فيه وهي كسلانه ولا لها خلق تسوي شيء ومع ذلك صحت تتروش لجل تصحصح , وخرجت بعد دقايق تلف الروب الحريري حول رين جسدها وتفتح جوالها تعقد حواجبها بنزعاج من كثر رسايل امها اللي كلها تسفيل في تسفيل وعلى الرغم من كل الرسايل تجاهلتها تقرأ رسالته " دنو انا رايح المطار اشحن شنطنا وترا لقيت رحله المغرب حجزتها واذا ماتبينها كنسلتها " ابتسمت من رساله وديم خلفه " وحشتيني ترا " ومشت لتسريحه ترفض فكره أخبارها انهم راجعين المغرب وتفضل تكون سبرايز لها , جفتت شعرها تسويه ويفي ولفت بعد دقايق على دخوله الهادئ لجل لو تكون نايمه مايزعجها لكنه ضحك من شافها صاحيه : صح النوم !
فكت الخصله من الجهاز تبتسم بدون رد , وتقدم لها يقبّل خدها ويكمل طريقه لسرير : مارديتي تبين الرحله ولا لا ؟
دانه : الا خلاص خل نرجع طفشت
عبدالعزيز : هذا وانا اسمع سواليفك السامجه طفشتي لو ماسمعها وش بتسوين ؟
نزلت الجهاز تفكك شعرها : اقول احمد ربك اني لحد الحين ماهجيت انت وشهر عسلك الخايس هذا , اول يوم السيارة نسرقت وممسُكين بجريمه وهذا كله بأول يوم , وثالث يوم صاحين على سمك قرش بغا يبلعنا وخامس يوم متسممين ومتسدحين بالمستشفى يومين
عبدالعزيز : ايه متسممين من طبخ مين ؟
ضحكت بدون , ورفع حاجبه يضحك : ايه الحين ماعندك رد
لفت عليه : ترا انا قلت لك اني ماعرف اطبخ بس انت تحب تعاند
عبدالعزيز : اها الغلط مني يعني ؟
هزت راسها بايجاب : اكيد اجل مني ؟
تمدد على ضهره يضحك بسخريه : لا ابد موب منك
تمددت بجانبه تاخذ جوالها ترد على رسايل وديم : قلت لوديم ؟
عبدالعزيز : لا تسأل متى تجون قلت مطولين
ابتسمت بتساع : ياخي انت كفو تفهمني !
ضحك يغطي وجهه بالمخده : كفو بس قومي سكري الستاير بالله
دانه : مانمت ؟
هز راسه بنفي : نمت بس مو كثير رحت اشيل اغراضك حضرتك
ابتسمت غصب : زوج صالح
عبدالعزيز : وليتني متزوج زوجه صالحه عاد
دانه : اقول تراني قايمه اسكر عنك الستاير
ضحك بنُعاس , واغلقت الستاير ترجع تمدد بجنبه لكن هالمره ميل جسده لها ينام بحضنها دافن وجهه مابين صدرها وعُنقها , ورفعت كفها لشعره تُداعب اناملها خُصلاته تجعله يرتخي بحضنها دلالاً على نومه , واغلقت عينها تشعر بدفاء أنفاسه وحضنه لها كون يده تلتف حول خصرها ونصف جسده يُغطي جسدها , ماتوقعت بحياتها تسمح لرجُل يدخل حياتها ويتوسط حضنها لجل يرتاح وتسمح له بقربها ووصلها وهي انُثى معروف عنها أنها انسانه ماتواطن الرجال , لا هو ولا توامته تدري كيف دخلوا حياتها من اوسع بيبان قلبها , انحنت تهمس بحده : بس هالمره ترا بتركك ترتاح بنومتك ولا انا انسانه تكره التواصل والتلامس الجسدي .
همس وسط نومه : بس هالمره ؟ كريمه الله يسعدك .
عضت شفايفها تضحك بصدمه لانه بعده ماغرق بنومه إنما كان على اطراف غفوته وسمعها سمعها واستجاب لها بسخريه تلزمها الصمت وتحرجها !

« بيــت ابـو سعـود »

مُنتصف اليل وبغرفه وديم تحديداً وقت كانت متمدده تتابع مسلسلها التُركي بصمت وبوسط هدوء المنزل ووحشته الدائمه في اليل كانت هي وحدها صاحيه , عينها تتامل الشاشه وفكرها غارق في عالم آخر ومع ذلك شعرت بصوت محاوله فتح الباب ورفعت جسدها تناظره بستغراب لأنها متيقنه ان أهلها كلهم نايمين ! , لكن دخل شخص ماكانت تتوقعه يدخل وضحكت بصدمه تشوفها : دنو !
دخل عبدالعزيز خلفها يحمل بيده كوبين قهوه وحلا يسكر الباب برجله على صوتها : كنت داريه انك صاحيه
مشت لها تحضنها بقوه , وابتسمت دانه تحاوطها بشوق : وحشتيني !
اكمل عبدالعزيز طريقه ينزل الاكل على الطاوله , وضحك من تقدمت له تحضنه بعدها : خير ماقلت لي !
عبدالعزيز : سبرايز
مررت انظارها بينهم وضحكت دانه من : شفيك !
وديم : متى جيتو اساساً !
عبدالعزيز : ابد تونا داخلين اقولها خل ننام تقول لا ننزل لوديم هي صاحيه الحين
دانه : وش تنام ! من الصباح وهو نايم ماشبع , ولا بعد حتى بطياره نايم
عبدالعزيز : انام على حسابك انا ؟
دانه : النوم مايملى روس الذيابه
ضحك بصدمه : شدخل !
وديم : طيب الله يقلعكم وحشتوني قسم بالله !
عبدالعزيز : ترا كلها عشر ايام رحنا وجينا
دانه : وليتنا مارحنا
عبدالعزيز : قسم بالله لو رايحين الطايف احسن
دانه : شهر العسل مع القرود ؟ اوف
عبدالعزيز : ازين من الأسماك
دانه : تخيلي وديم صحينا على صياح وصراخ ويوم طلعنا لقينا صيادين صايدين سمك قرش اكبر من بيتكم بعشر مرات
عبدالعزيز : المشكله انهم ورا البيت الي حنا فيه يعني لو تحرك شوي بلعنا حنا والبيت
وديم : اشوفكم ليش رجعتو بدري طلعتوا مخروشين
دانه : والله كويس بعد جلسنا ١٠ ايام
عبدالعزيز : من اول يوم وحنا كنا ناوين نرجع اساساً بس مالقينا تذاكر , او بالأحرى لقينا بس الشيخه هاذي موب عاجبتها الأوقات
دانه : وديم يحجز الساعه 2 الظهر ! 7 الفجر ! اوقات غلط غلط !
وديم : اوقات نومك المعوق وانتي الصادقه
عبدالعزيز : مصروعه قسم بالله ٥ رحلات تاجلها عشان نومها
وديم : وتقولك النوم مايملى روس الذيابه
لف عليها يناظرها , وابتسمت بتساع : تفرق ! انا مانام كثيير
عبدالعزيز : قسم بالله كذابه , اخر ثلاث ايام كلها ماطلعناها عشان نومها
دانه : لا والله ماكنت نايمه كنت وجعانه
عبدالعزيز : تخيلي وديم جت الساعه ٢ اليل وتو صحيت وجوعان ومافيه شي فاتح قلت لها تعرفين تطبخين قالت مـ..
دانه : لا تكذب قلت ماعرف اطبخ
عبدالعزيز : مابعد قلت شي انا طيب !
دانه : بتقول
عبدالعزيز : انطمي , المهم قالت ماعرف الا اندومي ورحت للبقاله اجيب لها اندومي وسوته , نص ساعه بس و لقينا نفسنا متسدحين بالمستشفى
دانه : والله البلا منهم مو من طبخي
وديم : لا والله واضح كتابكم من عنوانه
تمدد على ظهره يضحك , واشرت عليه وديم : عطيه خمس دقايق وتلقينه نايم
دانه : عزوز ان نمت قسم بالله لكب عليك مويه
عبدالعزيز : بس برتاح
وديم : نشوف
كانت اقل من خمس دقايق الي سولفو فيها ولفو عليه لقوه فعلاً نايم ! , وديم : شفتي ؟
دانه : مستحيل كذاب !
رفعت يدها تصفق وجهه تتأكد من نومه , وضحكت وديم : والله نايم
ناظرتها بصدمه : وديم قسم بالله من الصباح نايم !
وديم : بس مانام باليل صح
حكت حاجبها تتذكر ليله الامس الي كانت ليله وصلهم !وهزت راسها تسمعها : اذا مانام اليل بينام النهار كله ولا بيشبع
قاموا من الكنب يتركونه ينام وطلعت وديم تجيب بطانيته من غرفته تغطيه وتطلع لعلى سريرها بجانبها تسولف معها , وتأخذهم السوالف للفجر بدون لا يشعرون تأخذهم بشكل اعتيادي هي اعتادته معاها ماتشعر بالوقت الي مر من سوالفها الي تضحكها بشكل مو عادي , لحتى ماغفت بدون شعور بلحظه مانزلت وديم تجيب لهم مويه نامت ! , وضحكت وديم تغطيها بالبطانيه وتسكر الابجوره بجانبها : تطقطقين على عزوز ونمتي معه !
تركتهم ينامون ويرتاحون من تعب السفر الي عاشوه قبل ساعات ومع ذلك نزلو لها قبل كل شي يسلمون عليها ويسولفون معها رغم ارهاقهم وتعبهم بذات انهم ماناموا براحه هناك بسبب المواقف الي عاشوها , وبعد شروق الشمس الحاره وقت صحى الأغلب , طلعت ام سعود للاعلى لغرفتها تطرق الباب وتدخل : وديم
سرعان ماعقدت حواجبها بذهول تشوف عبدالعزيز نايم على الكنب , ورفعت نظرها لوديم تشوف دانه نايم بجنبها : متى جو !
ضحكت وديم بعدم معرفه : على الساعه ٢ تقريباً
ابتسمت بقل حيله لأنهم تاركين جناحهم وجايين ينامون عندها ! : صحيهم طيب بنفطر
وديم : وشو الفطور ؟
ام سعود : كُلا مالذ وطاب
رمت لها بوسه تبتسم : تسلم يدك !
ابتسمت بخفه : الله يسلمك
طلعت تتركها تصحيهم رغماً من انها واجهت صعوبه عضيمه لجل يصحون لكنهم بنهايه صحو , وديم : ماشاءالله ذولي الي شبعانين نوم , اخلصوا غسلوا وانزلوا ترا ننتظركم
نزلت لتحت لتحديداً صاله الطعام وطاولتها الي تجتمع عائلتها الكبيره جميعاً حولها , وهاذي هيا طقوس يوم الجمعه عندهم اذا قضوها برياض بعيداً عن حائل يجتمعون حول وجباتها سوياً وباقي الاسبوع ؟ تقضيه كل عائله لوحدها , فايز : ديمي تعالي جنبي
وديم : طيب بس بغسل يدي
دخلت للمطبخ تغسل يدها , وابتسمت ام سعود تشوفهم نازلين : يامرحبا
ضحك فهد بصدمه : دقيقه الشهر ماخلص !
عبدالعزيز : يارجال هو زين صار اسبوع حتى
اقترب من ابوه يسلم عليه وهي خلفه تسلم على امه , وسلموا بعدها على الجميع ومن انتهوا جلسوا ولفت عليه من جلس جنبها تتكلم بصوت يصل لمسامعه فقط : عزوز قوم خل وديم تجي بجنبي
عبدالعزيز : احلفي بس
دانه : والله روح جنب فايز
عبدالعزيز : روحي انتي , انا من عرفت الدنيا وديم بجنبي
دانه : والله ان تقوم
عبدالعزيز : والله ماقوم , حلوه ذي هذا مكاني من وانا وغد !
دانه : وش اسمه ؟
عبدالعزيز : منهو !
دانه : البزر
لف عليها يرفع حاجبه وضحكت لانه يضحكها بكل مره يتكلم شمالي ! , وضحك يصد عنها مايبي يضحك زود قدام اهله , وصله صوتها الضاحك : امانه قوم ياخي انا وش ابي بك جنبي !
عبدالعزيز : حتى انا وش ابي بك جنبي ؟
دانه : خلاص روح عني وخل وديم تجي جنبي
عبدالعزيز : افطري واسكتي
دانه : مابي فطور
عبدالعزيز : احسن
ام سعود : ها كيف كانت كاليفورنيا ؟
رفعوا انظارهم لها وضحكو ! يمكن لانه اخس شهر عسل ممكن يقضيه الزوج مع زوجته , ولا فيه ايء شيء زين ينذكر فيه , اديام : انا من دريت ان عزوز حاجزها عشان دزني لاند وانا غاسله يدي
سعود : عساكم لعبتوا عاد
عبدالعزيز : بس يوم واحد
رفع نظره ابو سعود له ينطق : وش سالفه الجريمه ؟
حك حاجبه يسرد لهم قصتها بشكل يبري ذمتهم من الجريمه , ثامر : احمدوا ربكم انكم سلمتو ولاكان انرميتو بالعن السجون
لفت لاراء على دانه : كيف كان شعورك وقتها ؟
دانه : اصدق ؟ والله كان اكشن مره
هيفاء : ماخفتي
دانه : وقتها لا , بس بعدها بثلاث ايام ايه
ضحكت شادن بستغراب : ليش توك استوعبتيها يعني ؟
دانه : لا كان علي حراره وهلوست زياده عن الزوم .
اكملوا فطورهم وسطهم ضجيج اصواتهم واختلاف سوالفهم وحديثهم , وقف ابو سعود وناظرته ام سعود : افطر
هز راسه يمسح طرف شنبه : الحمدلله , عبدالعزيز
رفع نظره له يبلع لقمته : تعالي المكتب .
لف عليها يناظرها , وعضت شفايفها تضحك لانها تدري انه يسترجع ذكرياته وأفعاله : يويلك
وقف ينفظ يدينه من فُتات الخبز : اسكتي
مشى خلف ابوه داري انه بيتهزى بس على ايش ؟ مايدري , دخل المكتب يسكر الباب خلفه تنفيذاً لـ أمره , ابو سعود : ترا مازوجتك عشان تنهبل من اول يوم
عبدالعزيز : ابوي قسم بالله مالي دخل بالجريمه والله !
ابو سعود : مالك دخل بالجريمه , بس لك دخل بالي جالسه جنبك وفي ذمتك , انت مستوعب انها في رقبتك وفي شنبك ان مسها ضر انت المسؤول ! وانت الحمار الي مدري شلون تفكر تاركها لحالها في حواري ماتدل فيها !
عبدالعزيز : رحت اجيب ماء
ابو سعود : ياشيخ بتموت ان ماشربت ماء , بالله لو جتها الشرطه وانت بالبقاله بالله لو جاها القاتل نفسه وكمل عليها ؟ من المسؤول
عبدالعزيز : ابوي لا تكبر الموضوع
صرخ يقاطعه : جاوبني من المسؤول !
تنهد بهدوء : انا
ابو سعود : وانا وش اقول لبوها واخوانها ؟ اقول والله ولدي غبي ماكان قد الامانه ولا هو قادر يحفظها ! عبدالعزيز افتح عقلك واستوعب يرحم ثنين جابوك تراك معد انت وغد تمشي على هواك ! في ذمتك روح هي في ذمتك ماعد هي في ذمه أهلها ولا في ذمه غيرك انكانك منت قدها طلقها من البدايه ولا تضيعها معاك .
طلع تاركه وحده يستوعب كلامه ويستشعر مدى غلطته الي فعلاً كانت قادره على سلبها منه بلحظه ماكان راح يتوقعها لكن لطف الله بهم وعدت ببسط الأضرار , سمعوا صرخته بلحظه مانطق " من المسؤول !" كونهم أصبحوا بصاله بقرب المكتب , يكملون سوالفهم بشكل اعتيادي اعتادوه على صرخات والدهم بكل مره يطلب احد منهم لوحده في مكتبه , واما بالمطبخ وقت وقفوا وديم ودانه يغسلون يدهم وسمعوا صرخته لفت عليها : ابوك عصبي ؟
وديم : موب مره
ضحكت تلف لها : بس الصدق على عزوز ايه
دانه : احسن , لي ساعتين اقوله يقوم عشان تجلسين جنبي وماقام
وديم : خلاص على الغدا تعالي جنبي واسحبي عليه
دانه : تم
ضحكت تخرج من المطبخ وخرجت خلفها : متى تنامين انتي ؟
وديم : الحين
دانه : تمزحين
وديم : لا
دانه : بتروحين تنامين ؟
وديم : اجل ؟
دانه : تستعبيطن انتي مسويه لك فعاليات انا مافيه نوم
وديم : ياشيخه روحي كملي نومتك بس , فعاليات الساعه ٨ الصباح !
دانه : ترا انتي الي مصحيتني !
وديم : صحيتك عشان الفطور والمشكله انك مافطرتي
دانه : ماحب الفطور
وديم : ولا انا , بس اهلي عندهم لازم كلنا نجتمع بالجمعه وناكله وكويس انك جيتي يمكن تكسرين ذا النظام
دانه : تتحدين اكسره ؟
وديم : اكسري ابوه
دانه : تم
وديم : عشتي
دخلت غرفتها وتكت دانه على الباب تشوفها ترتمي على سريرها : امانه بتنامين ؟
وديم : والله بنام من امس وانا صاحيه
دانه : مافيه مجال تقعدين ولو ساعه نسولف ؟
وديم : ابداً
دانه : ولو اخلي عزوز يطلعنا ؟
وديم : عزوز بعد تهزيى ابوي لا تدورينه ولا تكلمينه لانه بينفجر فيك
دانه : وديم قومي
وديم : وربي ماقدر فيني نوم , معليك كلها ٤ ساعات واصحى
دانه : ٤ ساعات كثير !
وديم : انقلعي وسكري الباب بس
زفرت بملل تطفي الانوار عنها وتغلق الباب خلفها تتركها تنام وطلعت للعلى لجناحها تدخله وتشوفه امامها متمدد على الكنبه وسط ظلام الصاله كونه مسكر الستاير وكل الانوار : بسم الله صدق متى جيت انت
اطفى سجارته بدون رد , وتقلبت ملامحها تفتح الستاير والشبابيك رغماً من انها تحب رائحته لكنه يكتم نفسها , رفع نظره لها من جلست امامه على الطاوله تسحب البكت منه تترك له وحده : عن الخاطر بس
أخذها يشعلها ويتركها بين ثنايا اسنانه , دانه : اختك نامت وانت نفست وانا وش اسوي !
عبدالعزيز : نامي
دانه : مافيني نوم
عبدالعزيز : نفس أمس مافيك نوم ويوم لفيت لقيتك نايمه
دانه : نمت بالغلط
عبدالعزيز : جربي الحين بعد ممكن تنامين بالغلط
دانه : اقول اسكت بس وقوم وديني لهلي انت واختك مامنكم فايده , ليتني ماتزوجتكم
عبدالعزيز : لا انتي ماتزوجتي اختي انتي تزوجتيني انا , وبعدين اهلك الساعه ٨ ؟
دانه : كلها واحد , واهلي اجيهم بايء وقت ابيه آداب الزياره ماتمشي علي
عبدالعزيز : على من أجل ؟
دانه : عليك انت
عبدالعزيز : ومن بيوديك ؟
دانه : انت
عبدالعزيز : المفروض يعني اني ماجيهم بذا الوقت
دانه : مافهمت شدخل ؟
عبدالعزيز : شلونك انتي ؟
دانه : برضو شدخل !
صد يهز راسه بقل حيله , وعقدت حواجبها : انت تتكلم عربي ؟
عبدالعزيز : انتي الي صاحيه ؟
دانه : لا , بروح اجيب عبايتي
رفع حاجبه يتليه صوته من دخلت للغرفه تجيب عبايتها : ماني موديك
طلعت بعد دقايق تلبس عبايتها , ونفث دخانه من لون عبايتها الازرق : خايسه العبايه
دانه : محد طلب رايك
عبدالعزيز : غيريها
رفعت نظرها عليه : على غيري والله دافعه فيها نص قلبي
عبدالعزيز : طيب دافعه فيها دم قلبك لا تلبسينها
دانه : لا بلبسها وبحلل كل ريال فيها
عبدالعزيز : عناد هي ؟
دانه : تبيني اغيرها ؟ جد ؟
هز راسه بايجاب , واشرت على عيونها ورفع حواجبه يسمعها : اقدر غيرتك الخايسه الي تو تطلع عزوزي , One minute
دخلت الغرفه وتكى على يده ينتظرها , تخرج له بعد دقايق بعبايه بُرتقاليه يتمتم بـ : ياشيخه ؟
هزت راسها بايجاب تاخذ جوالها ومفتاح سيارته : انتظرك بسياره خمس دقايق ان ماجيت قسم بالله لدق على ابوي واقوله انك رجال مو كفو
عبدالعزيز : وش تقولين له
دانه : انك رجال مو كفو
عبدالعزيز : يصير خير ان شاء الله
دانه : بسررعه عزوز والله احس لازم اروح لهم
طلعت لسيارته تنتظره يبدل ملابسه ويخرج لها , وابتسمت بتساع تقرأ رساله اسيا "والله ناقصنا انتي بس" : شفت عندي بُعد نظر انا خواتي كلهم هناك وصاحين يتقهون بدوني !
حرك سيارته يناظر طريقه : صدقيني ان حياتهم بدونك حلوه
دانه : تخسي , محد حياته حلوه بدوني
عبدالعزيز : الا , انا حياتي قبلك كانت حلوه تجنن بعد
دانه : ومعي ؟
عبدالعزيز : مبداياً ؟ خايسه
دانه : انت الخايس والله
عبدالعزيز : ليش الزعل صيري ديمقراطيه وتقبلي الرائي الواقعي !
دانه : ديمقراطيتك خلها لك , حياتك معي وحياتي معك تمشي بمزاجي انا
عبدالعزيز : احلفي بس
دانه : ايه والله , قايله لك القواعد منزمان
عبدالعزيز : قواعدك مايمشي عليها المجنون موب عاد العاقل
دانه : عساك انت العاقل ؟
رفع حاجبه : اجل المجنون ؟
دانه : لا , انت الجني براسه
عبدالعزيز : حبيبتي والله الله يسلمك
لف عليها : وبعدين انا بعد عندي قواعد لازم تطبقينها
دانه : من متى ؟
عبدالعزيز : من اليوم
دانه : على غيري مشها
عبدالعزيز : لا عليك
دانه : لا موب على كيفك
عبدالعزيز : اجل على كيف ؟
دانه : موب على كيف احد
عبدالعزيز : اولاً
دانه : لا تعب نفسك ولا شيء راح يتطبق
عبدالعزيز : بيتبطق , قولي ليه ؟
دانه : ليه ؟
عبدالعزيز : لان طاعه الزوج واجبه
دانه : واجبه بشيء ثانيه
هز راسه يضحك : لا مو بشيء ثانيه ! , بكل الأشياء
دانه : ياشيخ انا ماطعت امي وابوي عشان اطيعك
عبدالعزيز : ازيدك من الشعر بيت ؟ والله مقدمه على طاعه الوالدين بعد
لفت عليه تناظره بذهول : احلف بس , بايء دين هذا ؟
عض شفايفه يضحك : وقسم بالله اني صادق ! واذا مانتي مصدقتن اسألي امك وشوفي
دانه : بسالها
وقف أمام البيت من وصلو , وفتحت الباب تلف عليه : انزل ياقليل الادب سلم على ابوي , انا مسلمه إلى ابوك
عبدالعزيز : لا مهوب تحديد هو الله يصلحك , بعدين قسم بالله محد يزور الصبح حتى ام سعيد ماتجي ذا الوقت
دانه : اما ام سعيد
ابتسمت بتساع : تدري اني اعرفها ؟
ضحك يهز راسه : ادري وديم ماخلت شي ماقالته لك عشان كذا تزوجتك تحفظاً على اسرار عائلتنا الي بقت
دانه : الله والأسرار عاد , المهم انزل والله ابوي بيشره عليك دايم يسفل بماجد عشان مايسلم عليه
عبدالعزيز : من ماجد بعد
دانه : زوج اختي , يبابا انت مطول ؟
عبدالعزيز : قسم بالله احراج
دخلت الحوش وهو خلفها : والله الاحراج اذا دق يهزئاك ليش تجي وماتسلم عليه
عبدالعزيز : يرحم اهلك انتي تدرين انه هينا اساساً ولا لا ؟
دانه : I expect سيارته موجوده
عبدالعزيز : احلفي بس
طلع يوسف يدندن بروقان لكن مدام هالروقان من شافها : يادبل كبدي دبلاه ! ليش تجين !
دانه : وجع !
مشى لعبدالعزيز يسلم عليها ويهمس : ليش تجيبها كان خليتها والله مانبيها
دانه : ماجيت عشانك ياورع البارح
يوسف : عدال ياورع اليوم انتي
دانه : فارقني بس
دخلت لداخل تتمتم بـ : انـا جيـت !
اوتار : الله يحـييك
دانه : حياتي I missed you !
انحنت تبوسه بشوق ونظرات اوتار تتاملها بقل حيله من عُمق حضنها لنياف : والله كان عندي امل شوي تقصدني !
اسيا : اما تقصدك
اوتار : كان عندي امل !
رفعت نياف لحضنها تناظرهم : بابا وين ؟
اوتار : بغرفته
دخل يوسف يرمقها بنظراته ويطلع لفوق , دانه : تنفقع عيونك ان شاءالله , ناد ابوي
يوسف : تنفقع عيونك انتي , وانا ليش رايح فوق !
دانه : اول مره يجي منك فايده
مشت لها اسيا تحضنها : اصدق اصدق ؟ والله وحشتيني بيت اهلي من دونك ماله طعم
دانه : احسن , حسو بقيمتي
ضحكت بصدمه : دنو بلا نرجسيه عاد !
دانه : حياتي والله حتى انا اشتقت لك
اوتار : وانا ؟
دانه : اشتقت لولدك اكثر منك
اوتار : هذا شيء مايبي له واحد ثنين , لأننا قاضين منه منزمان
ابتسمت بوسع تفتقدها : الماس نايمه ؟
اسيا : الماس نايمه
لفت تبوس نياف وتنزله : دقيقه ياعيوني بجيك
ابتسم لها يجلس بلكنب مستعد ينتظرها , من نزلت عبايتها تجري لفوق , اوتار : تموت لو ماصحت احد تموت
اسيا : وليتها تصحي زين عاد , مسكينه والله الماس بتصحى على جيك مويه
وبينما بالأعلى وقت انتشر صراخ الماس بالبيت لأنها صحت على كأس مويه منكب على وجها ! رفعت يدها لصدرها تشهق بصدمه , دانه : الساعه صارت ٩ لمتى بتنامين ؟ مو يعني اليوم ويكند تنامين قومي
صرخت تبكي : دانه حرام عليك حرام !
عضت شفايفها تضحك من دموعها ومن هلعها : انا اسفه قومي
قامت ترمي المخاد عليها وتصرخ باسم ابوها , فزت بورطه : تكفين الا ابوي
طلعت من الغرفه وطلعت خلفها تشوفها تمشي لغرفه امها وابوها : الماس يرحم اهلك لا !
الماس : والله ماخليك والله
دانه : ياحيوانه اختك انا جايه من سفر مفروض تستقبليني بالاحضان !
الماس : استقبلك بنعال والله
كل هالاحداث أنتهت من دقايق , من توسطت المجلس تحديداً تجلس بجنبه ناطقاً : اجلسي بحضني احسن
عضت اظافيرها : اسكت
لف عليها بذهول : دنو تستهبلين انتي لي ساعه جالس هينا وانتي واخوك مدري وين ذلفتوا ! ابوك وين !
بلعت ريقها بصعوبه من صرخ بسمها : جاك الموت ياتارك الصلاه
لفت عليه تبتسم بتساع : شكلنا بننطرد
ناظرها بصدمه : وش مسويه انتي !
استقاموا بوقوفهم من دخل يصرخ : مجنــونه انتــي مجنونــه ! تبين تذبحينها ! كــــم مــره اقــول تقويمــك الخايــس هــذا يذبــح !
طال تهزيئه وطال صوته وكلامه وكانت النهايه لها كف وطرده مثل ماكان المتوقع لـ اب مجنون ينتظر الزله وجاته على ماتمنى , رفعت شعرها تضحك من خرج تاركهم وحدهم , ناظرها بذهول تضحك ! ماكانها بلعت كف ترك خدها يزرق الون : مجنونه انتي ؟
دانه : No انا مو مجنونه , هم مجانين
تقدم لها يحاوط وجها ويتامل احمرار خدها وعيونها : وش سويتي ؟
دانه : اصدق ؟ كبيت على الماس مويه وهي نايمه وصحت مخروشه بس
عقد حواجبه بستغراب : بس !
دانه : بس
عبدالعزيز : غلطانه كان ذبحتيها بالمره على هالكف
عضت شفايفها تضحك : المره الجايه !
ضحك بغرابه من نزلت يده من على وجها : بجيب عبايتي واجيك
انسحبت تترك يتنهد تنهيده استنزفت طاقته كلها لانه توقع ان ابوها افضل من امها , يكون حنون عليها مثلاً ؟ لكن فكره انه يضرب بنته عشان بنته الاخرى فكره جداً سيئه وفكره جداً تهلكه , رغماً من انها ماشكت لها لكن هو عرف وبناء سوء افكاره من عائلتها على احداث كثيره صارت له وقت الملكه مثل الصراخ العالي باسماها دائماً مثلاً ؟ مثل سحب جوالها المُستمر من والدتها الي كانت ولازالت تصرفه بالمكالمات تحت عذر انها نايمه , وأشياء كثيره جعلته يعجل بزواج عشانها , عشان تكون معه بخير بعيداً عن عائلتها الغريبه بعيداً عن عدم معرفتها وعدم ادراكاها عجله , انتظرها بسياره وقت طويل وقت لا يقل عن النص ساعه والساعه تقريباً وكل هالوقت كانت تتعرض للمزيد من التهزيئ , كان الاستقبال الجميل الي يلوق فيها مثل العاده , عضت شفايفها تضحك وتسمع همس اسيا : خلاص يامجنونه لا تضحكين !
دانه : يضحكوني وهم معصبين ماقدر !
اسيا : بتموتين دنو قسم بالله !
دخلت ام سيف تناظرها : خلاص انقلعي غرفتك
دانه : عشتي قسم بالله
اخذت جوالها ونياف تطلع لغرفته لان كل هالتهزيئ لجل تجلس عندهم هاليومين بسبب رفض ابوها القطعي لكن مادام الرفض من قبول امها الي انهى رفضه وقراره , وابتسمت بستغراب لانه لا يزال واقف بالخارج ينتظرها ! دقت عليه ورد وهمست بذهوله : لحد الحين موجود ؟
عبدالعزيز : ايه انتظرك
دانه : I'm sorry والله , بجلس عندهم اليوم
عبدالعزيز : احلفي بس
دانه : والله اسفه
عبدالعزيز : انزلي دنو انا ماجلست ساعه عشان تقولين مراح اجي
دانه : نياف يبيني مقدر
عبدالعزيز : وانا ابيك , انزلي
دانه : عزيز !
عبدالعزيز : وديم تنتظرك طيب
دانه : وديم نايمه
عبدالعزيز : اروح اصحيها بس تعالي
ضحكت بدهشه من اصراره المُريب : وش امداك ماقدرت على بُعدي ؟
عبدالعزيز : ايه
عضت شفايفها تضحك : خلاص بالبس عبايتي وبجي
انهى المُكالمه بدون رد ثاني وانحنت تبوس نياف : مادريت اني خفيفه كذا بس باي نيافي
زم شفايفه : تروحين ؟
دانه : بكره اجيك
ميل راسه تتجمع الدموع بمحاجره من لبست عبايتها , و انتبهت على دموعه تنحني له تحضنه : نياف .
نياف : لا تروحين تكفين
دانه : اخذك معي ؟
هز راسه بايجاب يدفن وجهه بعُنقها رافض فكره البُعد يكفي انه ماتعود على الفُراق الي دام لكثر من ١٠ ايام ! والحين بترجع تبتعد عنه ؟ دخلت اوتار وضحكت بذهول : ليش لبستي عبايتك ؟ اصدميني وقولي انك بتروحين ؟
ابتسمت بوسع : للأسف الشديد
اوتار : لنا ساعتين نقنع ابوي ويوم اقتنع بتروحين ؟
أشرت على الشباك : لنا ساعتين نقنع ابوي وله ساعتين ينتظرني المسكين
تقدمت لشباك بستغراب وسرعان مارجعت تناظرها بصدمه : كذابه !
دانه : والله , بروح بس عادي اخذ نياف معي ؟
اوتار : اساساً انتي ماكنتي ناويه تجلسين الا عشانه بتقنعيني تشحذين ابوي من اليوم عشان احد غيره ؟
هزت راسها بنفي وضحكت بقل حيله : يبكي ؟
دانه : يبكي.
اوتار : خذيه , يتعب بدونك .
دانه : احبه
اوتار : وهو مايقدر يعيش يوم واحد من دونك !
حضنته تقبّلها بتكرار تقبّله لانه يبكي مايبيها تروح وتقبّله لأنها تحاول تراضيه : قلبي روحي عيوني انا ماخليك عمري كله ماخليك
نزلت لتحت تطلع وتسكر باب الشارع خلفها ورفع راسه يشوف السياره ويرجع يشوف نفسه بحضنها تحمله : انا بروح مع ماما ؟
دانه : قلب ماما , اقدر اخليك انا ؟
ابتسم بوسع ثغره يحضنها , وضحكت من فتح الشُباك يتاملهم : قولي انك بتجيبينه
دانه : اقول اني بجيبه
ضحك ياخذه منها : يامرحبا بشيخ
ابتسم بتساع : زوز !
ابتسم يقبّل خده : الله حيه
رفع انامله يحضن وجهه ويضحك لانه يعرفه وقضى فتره الملكه كلها معاه , معاه بشكال مُختلفه وبالمعنى الاحرا مع دانه بكل مكان , ضحك يلف لها : ماضمن لختك انه ممكن يرجع لها
دانه : مايحتاج نرجعه ! خلاص صار حقنا