My Jamaican Love Triangle

3

♣Melia POV♣

"Suh mi can get yo digits?" Mi walk ova tuh weh mi si romario siddung Inna wi class, him back tun to mi suh him nu si seh mi deh behind a him, a number him a ask dry head Tash fa? A mussa me nah hear good

"A wah deh gwaan ya suh?" Mi guh tan up in front a di dutty bwoy romario him, Yuh know fra wen mi a hear seh him a gimmi bun but mi Neva wah believe seh a true

"Babe wah gwaan? Mi neva si seh yo com" di dutty bwoy jump up fra out a di chair ah wah com hug mi up, mi push him off a mi and tun to di gal wah him did a chat to

"A look him did a look yo?" Mi just wah mek sure seh mi get mi facts straight before mi light up di dutty bwoy.

"Nuh badda mix mi up Inna unnu business and by di way mi have mi man suh mi mi nuh wah whoring romario" everybody Inna di class start crowd round wen dem si seh war go buss now, dem start loud up dem mouth wen dem si mi start walk up inna di gal face

"Suh if yo Neva did wah him why yo did a chat to him den?" Di liad gal just did a laugh up wid romario wen mi walk inna di class but tru shi know how mi cross shi change har mouth cause shi know seh mi wi buss har up, wuss how shi maaga already she know seh mi wi siddung inna har maaga tuff face

"Mi Neva know seh a crime now fi chat tuh wah bwoy" di gal a gimmi tuff chat , a wonda if shi nu know seh mi a steam up fi har

"Tek yo sight fra outta mi face gal before mi box yo dung!" Mi guh up inna har face ah threaten har.

"Lick mi nuh gal! Yo think seh mi fraid a yo! Di bwoy nuh even wah yo else him wudnt a com tuh mi" mi anga just start blaze up suh, mi tek mi hand dem and start trangle di gal, mi hole har neck an push har pan top a wah desk , everybody start scream out and a shout fi fight. Di gal grab mi hair an pull up mi hairstyle wah did comb inna bun, shi start hawl an pull mi til mi blouse button bruk off

"Stop it!" Two teacher com ah part wi , mi still have mi hand dem a di gal neck a choke har  wen wah man teacha tek mi offa har an tell mi fi gwaan a di principal office

"Watch fi mi ah yo gal!" Mi shout afta di dry head gal while di man teacha push mi outta di class fi gwan a di principal office.

**

" a who mi hear seh buss fight tiday?" Mi only si Tanya com siddung side a mi while mi did a wait unda di main entrance a wi school. School ova now ah true mi an Tanya always guh home together mi did a wait til mi si har. Di principal woman gi mi and di gal one week suspension fra school, mi did know seh shi woulda do dat cause di old fart witch nuh like mi fra mawning.

"Mi nuh wah chat bout dat right now" mi Neva did go admit it to Tanya but shi did right, di dutty bwoy romario a just wah playa, him Neva did really wah mi and mi mek sure seh mi tell him fi go Frigg off, dat a afta mi dun disgrace him in front a everybody inna wi class. One piece a argument between wi, di bwoy all chat out sum things de dat mi did tell him bout mi just suh him can embarrass mi in front a everybody. Man a di worst thing fi mi right now, mi loose offa di bwoy right now

" wah mek? A true because tash beat yo up?"

"Beat up who? Don't chat wah Yuh nuh know, dat deh gal deh caan beat mi. A who tell Yuh suh?" A wonda if deh summaddi de nuh know seh mi wi war dem to. Mi ah Tanya did a walk guh out a school gate fi go look drive guh home

"A mi just a seh so mon. suh a wah cause di fight?"how mi know suh dat shi would a ask dat

"Dis gal wah name tash inna mi class, di gal brite har self wid mi..." Mi start from di part wen mi ketch romario ah chat to di dry head gal to di part weh mi ginga di bwoy. Mi explain everything to Tanya in a every single detail, mi can't keep it a secret from har and besides di hole school know seh di bwoy diss mi

"Yo si mi did a tell yo seh di maaga bwoy nuh Gud" as dem say, di saying 'if mi did know' always com last

"Lawd Yuh nuh have to a rub it inna mi face suh! Mi know now and mi dun wid dat deh bwoy deh, damn idiot him be mon" mi can't understand dem Jamaican man yah, most a dem have dem gud woman inna dem life and dem choose fi go keep adda gal out a road who worst dan dem woman a yard. Mi neva si a set a man fool suh.

•••

Question: tell di truth , Yuh eva have wah man dat cheat pon yo yet?