My Jamaican Love Triangle

16

♠Tanya POV♠

Only God can tell yuh how mi vex right now, mi vex ,mi vex, mi vex so til! Afta mi tell di woman seh mi wah go wid Al a di party cause him wi look out fi mi di woman a say shi nah mek me go no weh.

"But mummy nutten nah go do mi!look how much time Al guh party and nutten nuh happen. Just fi one hour ,mi can't go fi just one hour ?" Mi feel fi just bawl right now, di way mi feel inside is like me a di saltest somebaddi pon earth. Yuh know how it feel when yuh well want something or wen yuh well wah go someweh and no matta how yah try it just nah work out fi yuh get fi do wah Yuh want?

"A me self me a talk to? Yuh nuh hear wah me say already? You nah step foot out a dis house tonight and argument done!" Mi cut mi eye and shub out mi lip dem while mi vex up mi face worst. Mi know betta than fi back chat fi mi mumma, mi know shi wi shot mi one box suh before mi start say nothing mi walk way guh mi room

"Sometime it betta mi neva did born fi go through dem thing yah, betta mi did just dead in child's birth and done at least mi would a betta off" mi walk weh and a mumble to mi self.

Mi did tell rosh say mi did gah com a di party an we all did a mek plan on wah we wud a do deh together,mi all pick out clothes fi wear. Rite now di way mi vex me don't even know wah fi text him an tell him say. But mi haffi mek him know suh him nuh look out fi me . Me text him and mek him know dat me nah go get fi com,me not even wait fi hear him reply me just com offline same time

Mi start fi talk to god in a mi mind cause mi too vex now fi open mi mouth an talk

oh god, mi just unfortunate in life. why nothing Neva a work out fi mi yet? Eeh god? Mi need fi know why mi so salt.

"Why yuh don't ready yet?" Me see Al bust in a mi room well Criss out Inna him big silver chain red shirt, white jeans and one neat white kickers pon him foot, him did have on one red boasy hat that have boss right pon di front, him look neat thou.

"Yuh granny say me can't go" dat a fi me mada who a Al grandmother, just in case yah wonder

"Alrite me a go talk to har" me surprise cause nuh Al him Neva did wah me com wid him? Afta me did haffi blackmail me way through wid him me think him would a glad say me nah com, him must a feel sorry fi me, rite now mi can tell say me look depress, bruk down ,stress out an all di other word dem yuh use describe somebody who salt. A must a true mi look suh him a pity mi, on a normal situation mi nuh want no body pity but rite now mi desperate suh mi wi accept him pity

"Get ready til me com back" him tell mi before him lef out a me room. Mi did a wonda say what if me ready an all have to ga tek off back mi clothes but mi do as him say,mi get up and start ready mi self.

It tek mi bout 20 minutes an mi did ready fi touch road. Mi Neva have time fi put on much make up so me just do face powder and put on one light pink lipstick wid black eye shadow. Full suit a black mi decide fi wear mi guess cause a mi mood me just feel fi wear black.

Mi dress in a me black cut out side tights, yuh know di one dem dat yuh can see yuh skin through, one a dat me have on wid one short half di shoulder belly skin blouse, it Neva too short fi expose all a mi belly just one Lil part did a show ,di tights kinda did pull up to me belly like how high waist pants would look suh me belly nuh really expose, mi have one black bootie looking strap up slippers and a dat me wear.

"Com on, yuh must ready by now" Al com back bout 30 minutes it look like it tek fi convince mi mada.

"Wah she say?" Mi ask since me confuse a wonda how him manage fi get har fi say yes

"She say me fi carry yuh back by 10 o'clock or she ga com fi Yuh har self" mi shake me head knowing say a so my mada tan and she nah joke, she wi do wah shi say.

"OK" mi tell him and di two a wi lef out together, mi whisper tell mi mada say mi gone now ,mi nu too talk much to har cause mi still kinda vex wid har.

Me an Al get drive inna one a him friend dem car , him friend did out a door a wait pon him, it look like one silver Honda car but a night so me might get the color wrong but night or not me can see very well dat it shine, yuh know dem criss car deh wah look good? One like dat.

We travel fi bout 25 minutes and den wi reach. Al fren find one parking space while mi nuh stop look round hoping fi spot out rosh , all now me don't tell him say me a com eno. Me wah surprise him

"Me nah go follow back a yuh so tell yuh wat, keep yuh phone close pon yuh, mi wi call yuh wen mi ready cool" Al did have fi raise him voice Lil ova di loud music dat did a play, pay alkaline music a gwan rite now di one dat name spoil you a play and yuh fi hear di gal dem in a di crowd a sing to it.

Afta him tell mi weh him gah deh just in case mi want him , afta dat him left gone and me tan up fi a while a look round all over til finally me eye land on who me did a look fah. Wah mi see thou a Neva wah me did a hope fi see. Mi see rosh a dance, no wine up behind one gal ass. Only god know how mi heart a feel right now. So a dem thing yah him a gwan wid wen mi nuh deh round. OK. Watch now.

Wah youth did a pree mi from mi com wid Al dem and him nuh tap check mi out so mi go ova to him

"Yuh want a dance?" Mi dat brave fi ask a man dat question yes and besides rite now mi nuh give a damn.  Di youth agree and mi mek sure say mi carry him go near up to way di dutty bwoy can see mi and mi back up and gi di bwoy a wine while him back a mi a wine up. Me only do it so him can see and feel how me feel. Afta a while me get tired an walk weh feeling more than vex, mi should a listen to mi mada an tan home.

**

Sorry for the late update. Thanks for the support I really appreciate it!