My Jamaican Love Triangle

13

♠Tanya POV♠

About 5 minutes drive away from me school and we reach weh roshane say him a carry me go

Nuh him baxide yard him carry me guh!

Just a little turn off from di main road an we go round some corners ina wah lane and we reach. Me nah lie still, him house nice bad. Me never know say a upstairs and downstairs house him live Inna. Blouse an skirt bwoy yah deh live foreign life an Yuh know seh me ever see di lane ya wen me a go and com from school but me never know say a yah suh him live. My god, him fortunate though.

"Before Yuh start wonder a me granny house, me just a live yah fi a while cause shi gone a foreign left har house fi me look after" a cudnt me sumbody sorry fa an left wah nice house like dis fi me look afta.

"Oh. So a you alone live yah?" Him park di bike now so me come off and tan up in front a di white big gate dat in front a di house.

"Call it suh, me granny man com yah when him ready but other from dat, just me alone" me nah lie sometimes me wish me did live alone but wen me tink about it me affi wonder how people who live alone manage. Dem nu have No body fi talk to, dem nuh must lonely!

"OK but yuh gud fi live alone though" him open di gate and mek me go through first. Di place weh him live have some house dat nearby so him have two next door neighbor, thank God no body nuh deh home now fi see me.

"Me a live alone fi so long now so me get use to it by now" all me know is dat him damn good fi live alone. Me surprise him nuh mad by now.

"Alright me hear yuh.Suh why yuh bring me up here to yuh house?" Me look pon him suspicious an me think him get wah me a get to next.

Him buss a small laugh before him talk "if yuh think me go try nothing wid yuh, just know say me go keep me hands dem to me self. Me just  carry Yuh up here cause up here quite and yuh can relax til Yuh ready fi leave and besides yuh company not bad having" him open di white grill dat on di front a di house an me walk in go pon di verandah.

"Oh Yuh try know fi keep yuh distance yes" me tek me foot outta me piece a plastic boot and siddung inna one a di chair dem pon di verandah.  Bwoy me foot did a boil up Inna di piece a plastic boot,me nah tek off me socks though cause me toe dem corn up bad,dis damn plastic boot yah do me toe dem bad!.

"Yuh know say yuh facety?" Suh from when him a chat to me an him just a pick up dat?

"You a know late. Suh yuh nah go inna di house?" Him katch up one side pon di piece a white thick column sinthing that the gril them resting on before him open di door fi me go in, an true because me no want nobody pass and start chat wah dem nuh know

Yuh know how country people nuff already and lov judge people all me now if  dem once see me den den dun ready fi start say how much me bad cause before me gwan a school a man yard me deh.

Roshane just shake him head and open di door "after you ma'am" him tan up a di door way so me just stand up and walk pass him go inside.

This seem like a di hall cause one couch deh to di side and to me right me see  where deh walk go to the kitchen , when me look straight in front a me me see di stairs fi go upstairs. Me nuh know why but me always lov upstairs pon any house

"So weh your room deh?" A hope him nah think negative and feel say me ask fi him room cause a something else me have in mind . "nuh bother ask why me ask, me just want know dats all"  him laugh one a dem fool fool hahaha laugh deh before him answer

"Com on mek me carry yuh to me room den" me cut me eye and follow back a him while him go up di stairs

Me see couple doors wen we reach to di top a di stairs, two doors on di left and Two on di right, dem kinda have a little distance from each other though

Him open di first door on di right "this is my room"me peep inside first before me walk go in. Inside look,simple. Him have one dresser to the left side ,him bed on the right near to do window and him have one little closet near to him bed

"Not bad" me tell him honestly, me did a expect clothes fi throw dun every weh an thing but him surprise me

"Sound like yuh never did a expect me room to look like dis. Me tell yuh say me no dat bad as me may seem ,me a good guy .Me can't believe yuh can't see dat all now" me go over to the mesh window In a him room and a look out. From up here suh Yuh can see as far as dung a di main road wid car and truck and all those passing. Wat a good view him have up yah eeh.

"Maybe Yuh need to prove It more to me den dat you a one a dem good guy deh" me tun weh from looking out through di window an me nuh know wen him reach so close to me but a him dis right inna me face. Me never dis close to him before and god , him eyes. Me guess me did a stare too long cause me foot dem start tremble and me heart a beat fast. Tro,Why him affi com dis close to me? Me tun weh back me face and look pon di view outside.

"Suh me did a ask yuh before wah yuh want me fi do cause me wi do anything fi have yuh" mi shake me head as him say so. Typical man, promise woman di entire world just fi get Inna dem draws. A hope him know say me nah drop my draws and tell him fi com today yah ,so if him have him mind on dat him can think again

"Yes A suh unnu man tell woman wen unnu want a quick release" me com back to me self now , me heart beat gone back dung an mi foot dem tap tremble now suh yuh know me nah back dung from speaking me mind

  "Why Yuh affi gone deh suh now? A true yuh don't understand di feelings wah me have fi Yuh eno. Anyways me know say me feelings no important to yuh cause Yuh already have yuh man. So it go. Such is life. Me all good mon"  right now him mek me feel bad inside. Its not like say me nuh think about him feelings but me don't wah lead him on wen me know say eventually we nah go work out cause me already have Chris.

Me turn back to face him but unlike di first time dis while ago ,right now me kinda pissed off by wah him say "Nuh mek me sound like di bad person. From day one me mek yuh know say me have mi man suh wah yuh want me fi do a-" him not even mek me finish wah me a say me only feel fi him lips them pon mine.

*-*-*

If yuh tink me deserve nuff comment fi deh chapter yah then comment nuh!!! Press di voting star to yuh hear. Thanks guys :)