My Jamaican Love Triangle

11

♠Tanya POV♠

Fi di past two and a half week me and roshane a talk, we mostly text each other over WhatsApp. Just last week him ask how soon him can see me and as fool as me get fi be me tell him say him wi see me today Friday. Him say him a com fi me fi carry me gah school so me accept him offer.

Me and melia already dress in a we uniform and a wait out a weh we tek drive. Him say him a com 6:30 fi we cause a 7:00 we school start, nuff other drive pass by and a ask if we ready all some a dem a cuss we off say a special drive we a wait pon an a dats why some a wi a get tek weh and kill. Through it too early fi a mek argument me just mek it slide dis time an nuh Botha answer di tuff bwoy piggy, all him fi no chat cah everyday him inna fi him one blue and green clown socks, frigga look fool like.

"Me face tan good?" Me a mek sure say me face look presentable fi wen roshane si me. Me nah dress up and pretty up me self fi him cause me nuh care wah him wah think but me have to ensure say me always tan good yuh know dem way deh?.

"Yeah don't worry yuh look good fi si yuh man" me shake me head meanwhile me lift up me skirt an a hawl down me white blouse

"Chris a me man. Roshane a just me friend" me correct melia before she go nuh further. Although me an Chris nah really talk suh much since lately, a him still have di title as me man.

"OK keep tell yuh self dat den" melia seem fi think seh me head over heels in love wid roshane but its just dat me view a him change ova the past two weeks, me get fi know some things bout him dat me neva know before which kinda change me perspective a him

"Ssshhh. See him a com yah" me hush up melia wen me see roshane a com towards we pon him bike.

Today him inna dis orange Hollister sweater, him must  cold in a the morning yah when him fi ride di bike. Him have on wah dark blue cut off foot jeans pants and if me Neva always a pree him den me wouldn't notice but him love short foot pants though

"Morning pretty girl" as him stop and park di bike a me foot him start talk

"Good morning"me answer kind a quietly, me kinda feel nervous inside suh me nuh feel fi go in a much deep conversation with him

"A long time unnu a wait? Tanya yuh couldn't call me an tell me say yah wait?" Him call me name. My god! A first me a hear him call me name. A so me name did sound nice? Me feel fi smile but me affi a hold in it back

"Yuh send mi credit fi mek call?" Mi decide fi just be me self, which as yuh might know, to be very plain

"OK later me send yuh one credit den" me surprise wen me hear wah him say but me nah tun dung no offer

"Mek it one $200 dollar credit please" as dem say , him a gi me room but me a request hall to, an him better send di $200 dollar credit else him try know fi don't text back my number

"Alright hun"

HUN? A hun him just call me? A wonder why him a be dis nice to me. A must a true him wah impress mi. Him must a don't know say me a one hard piece a rock when it comes on to being impressed.

"Sorry fi interrupt but me nuh wah late fi school" a di first melia a talk since roshane com weh we deh an a because shi see how me an roshane caught up Inna credit conversation.

"Yuh wah guh pon di tank fi a change melia?" Me know melia can't hold round a di tank yah but me jus feel fi provoke har

"A who yah talk to?" Melia cut har eye afta me an hop up ova di bike round a di back.

Me lap me skirt and siddung side way in front a roshane, dis yah time yah go mek it di second time me a ride pon him bike,in front a him to at dat. Unlike first time wen me Neva too know him an before me use to talk to him, dis time it feel different fi siddung in front a him. Me feel more nervous?

Nervous. But me nuh normally nervous! A must a through me feel like me unda inspection from him, yuh know wen yuh have di feeling say some body a stare pon yuh even without you looking pon dem fi see say dem a look pon Yuh? Well a dat him a do me an deh feeling deh mek me feel wah weird way.

"Yuh know say me can feel yuh gaze pon me, why yuh nuh tap pree me?" me couldn't tek di feeling nuh longer me did haffi say something

"How me fi stop fra pree beauty?" Only thing me can do a shake me head

"Ahh bwoy. Me hear Yuh" me nuh Bother fi dispute wah him say me just gwan wid it same way afta all a nuh lie him a tell, me Neva need fi hear it from him still fi know say me have looks cause me already know dat, not dat me a boast or nothing thou.

Di rest a drive to school di two a wi did a chat bout general things like how dem wah kill off wi black race by sending dem spoil corn beef fra Brazil com yah fi we nyam. All now me nuh hear melia voice shi quite like lamb.

Wi just reach out a school gate an as me com off a di bike an me tun me head side way to di left weh di school gate deh nuh Britney and har other half,bam bam dat me see tan up. Britney she look like shi ready fi jump sumaddi ,she just a shake suh like wen yuh Inna rage. Me neva did ga pay har no mind until me see say a ova to me di gal a walk com and di gal full a wah tempa yah.

But a weh shi think she a go and a wah shi think shi ga try?

Wah dis now god?

***

Britney and Tanya clash!. What you think gah happen?
Memba fi vote an comment. Treat me Gud nuh😊