My Jamaican Love Triangle

15

1k reads!! We made it guys:) just help mi wid di votes and comments now nuh. Nuh mek it look suh mon;)

♠Tanya's POV♠

"Tanya yuh sista want know wen yuh can come look fi har fi try di dress. Wah mi fi tell har?" Mi mada did a talk to danae over di phone good while now while me siddung side a har pon di settee a text but when me hear shi say me name me frighten, firstly cause fi mi mada she chat loud like a sumbody who hard a hearing, mi deh rite side a di woman an shi a chat to me like say mi out a door

"Chat fast nuh pickney yuh nuh see mi credit deh run off" true mi Neva answer rite away shi a rush mi. Just in case you deh wonda, danae wedding a keep in a di next two week suh a dats why shi want mi fi com try di piece a bridesmaids frock wah shi say shi have up a har yard. Mi Neva did even wah be no bridesmaids but true it would a look wah way fi say a mi sista an mi tun har dung.

"Tell har mi wi text har" mi don't have time fi Danae business rite now. Mi no wait fi hear wah she have to say next mi just tek weh mi self an go mi room. As you might can tell mi nuh too interested Inna no wedding, don't get mi wrong mi like wedding but me don't like di idea a danae getting married to dat Rudolph man. Who can even name Rudolph?

Well enough a dat fi now, on a different level now, me and roshane a talk rite now. We always text on WhatsApp, not a day goes by an him nuh text mi, mi nuh know if a concern him just always concern bout me or him just don't have nothing betta a do but him always text mi even if me nuh text him first.

Me: so wah yah do tomorrow? Because we chat Everyday me and rosh just get close suh. And yes, a rosh mi call roshane now,mi did wah call him wah name dat me alone would call him so mi decide fi just shorten him name an call him rosh

Roshane: mi a guh wah party wid sum a mi fren dem, Yuh wah come wid mi? As mi si di text mi heart skip one beat. Fi be honest mi Neva go no party before, di way how mi sound an gwan people would a think say mi a di type who deh a every party weh deh keep but even if mi would a wah go mi cudnt go wid di mada yah wah mi have.

Di last time mi ask mi mada if mi cud a go a one party dung di road likkle fra weh wi live shi look pon mi an say mi can gwan yes if mi ready fi get rape, cut off neck, chop up, kill an dead throw down a road side in a plastic bag. Me understand say time dangerous now a days especially Inna night but even before it get suh bad my mada neva wah mi fi leave di house a night time.

Me: a wah kind a party ,weh it a keep and wah time it a start? Maybe if a like in a di late evening hours me could a go fi a while and com back home before it too late.

Sum time mi hate mi life! Why mi cudnt be like other teenage gal who get fi go weh Eva dem wah and when Eva dem wah, but no me cudnt be like dem cause in a everything mi just always suh damn salt. Me nah lie sum time mi tyad a mi life, everyday a just di same thing mi do like a one cycle me life surround in, sum time me just wah try sum thing new like going to a party fi first in a mi life, an now mi get di offer from rosh fi go but deep dung mi have a idea say mi might nuh get fi go.

If yuh Neva realize it let mi tell yuh, mi really like rosh, from wi kiss everything just change, mi feelings fi him start change rite away. Di damn kiss just start change everything suh, memba one time when me wud a deny say mi like him well mi nah deny it again. Mi really like him.

On di Matta a me an Chris, mi break up wid him from di time him did a send mi how much text deh mi just tell him say we nah go work out so it best him move on. Everyday him a send mi sad, heartbreak and bawling emoji like say dat suppose to touch mi heart or something, him already tek him side wid nasty crotches Britney so all like him mi don't even wah see, bout if we can meet up an talk. Talk bout mi ass , wen him say suh mi just kiss mi teeth so him know fi don't ask mi nothing.

"Melia!, melia oooie! Way alrick deh!?" Mi go mi back door an shout dung a melia yard. Mi nuh know why mi a ask fi alrick dem time yah fah cause every body know say dat bwoy don't deh no weh but pon di road but mi still deh check.

Memba say alrick an rosh a fren suh wah mi did a tink is dat most likely Al gah go a di party to dat rosh invite mi fi guh wid him suh if mi can ask Al if mi can guh wid him mi wi have a excuse fi say a Al mi a guh wid an him wi luk out fi mi but we all know mi real motive behind a everything but mi mada nuh have fi know dat.

Me no hear melia answer suh mi just put on mi yard slippaz fi go dung a har yard, rain did fall suh mi Neva did really wah lef out a di house but mi wah have a word wid alrick if him dung a him yard.

"Rawco cloth!" Mi scream out as mi right knee lick pon one stone. Nuh di dutty piece a old slippaz slide mi mek mi drop. Mi git up quick an hawl mi self til mi reach a melia dem door way. Mi knock pon dem door and it open fi me

"Yuh Neva hear mi a blouse an skirt call yuh " Al open di door fi me an mi push pass him guh in

"A wah do Yuh?" Him ask mi wen him see how mi kin up mi face an a hawl pon mi foot

"Sake a Yuh mi slide an drop nuh too long" mi siddung pon di settee an look pon di bruise dat now pon mi right knee cup, it all a pain mi too.

"Sake a who? A me tell yuh fi com dung yah. Wah yuh want by di way?" A true mi wah him help eno,If mi Neva wah use him fi dis favor mi wud a dis cuss him off an go back up a mi yard

"You always treat me so bad, anyways mi hear bout dis party.." Mi tell him di details base on wah rosh tell mi like weh di party a keep an thing and as mi guess, Al him say him a go  "Yuh can carry mi wid Yuh?" Mi beg him afta

"Why?" Him a ask mi before di fool say yes and dun.

"Cause mi just wah go. Mi can com wid yuh or mi fi just tell Keisha wah you and sour poochie did a do Inna har room from dem time deh" memba Keisha, Dat a fi me sista, a melia and Al madda.  true mi hav secret fi Al me know say him nah go want mi chat some a wah me know an him kmow mi nuh keep mi mouth wen me ready so him try an do as mi want

"Yuh si how yuh damn face big an broad"him ready fi cuss cause mi a blackmail him

"Yes mi si it an mi nuh care cause mi man love it" Al might fool but him know secret bout mi to suh him know say me an Chris did deh but him nuh have to know say mi have a new man now, who happen fi be him fren to at dat . "Suh tell mi, which one it go be?"

"Yuh can com but wen wi reach Yuh try don't stick on pon mi" hear dis, wid pleasure mi wi gladly stay far from him mi just wah him as excuse to use fi tell mi mada say a him Al a carry me an ting

"Like say mi even wah be seen wid you. Tell melia night fi me. Mi a go up now" mi drag up me ass off a dem settee an walk out a di house

"Damn dragon gal" mi hear Al say afta mi lef, him mus a vex deh now. Oh well,di way mi feel happy me neven memba say mi knee cup did just lick out all me thinking about is that I'm going to the party! ...with rosh! Dis go be wi first official date. A Wonda wah ga happen.

**

Vote?(~_^)

Comment(͡° ͜ʖ ͡°)

Share¯\_(ツ)_/¯