♠♠Tanya's POV♠♠
How much time me fi say sorry?
A just one simple dance eno tanya
me can't believe say yah spite mi just cause a dat.
So wah yuh did expect mi fi do? Deh a dance by mi self tan up a look?
Three days now since me don't talk to di one roshane him afta wah happen a di party wid him a wine up back a gal ,me just tell him fi avoid mi and me stop chat to him.
Me nuh business if nobody wah say me too jealous or me vex easy ova simple things. But dis is no simple thing, sometimes a small things like dat tell yuh wat to expect from a man likkle dung di line, it neva tek him nothing fi wine up pon di gal same so it wouldn't tek him nothing fi ride har to. A just so mi si it.
Since dat night him nuh stop text off mi phone ,me did a think fi block him one a di time but me just couldn't do it. Me always just read him text dem ova whatsapp but me nuh reply to him. If him feel say me and him go in a relationship an him go a wine back a gal an expect me fi be alright wid dat him mek a sad mistake.
Tanya, hun?
I miss talking to you baby.
Answer me please
Me can't believe say you nah talk to mi.
What mi can do to make it up to you?
Me decide fi continue ignore him text dem and focus on something else.
A good while now me nuh siddung an chat wid fi me mad niece melia she but a true because shi did gone up a har fada yard fi a few days, fi har an Alrick fada live in a wah community rite next to fi we,wen dem ready dem gone go spend time wid him up a him yard. Haines, dat a melia an Al fada, him lef fi me sista Keisha wen melia did inna belly an go married to wah next woman, him diss me sista bad sake a so di two a dem nuh chat but wah me rate wid Keisha is dat she Neva keep melia and Al from Haines even thou him diss har so bad. All if a did me dat happen to, breed fi man and live a house wid him an him go married foreign woman pon mi behind mi back, wen mi done chop him up police nor funeral homes can't find him body parts dem fi carry go down a morgue. Man a wicked thing eno.
As melia walk in a di yard me find me way go dung a har yard fi si har. Mi an har text while she did gone but God know it's not di same like wen she deh yah, mi did miss har bad.
"Suh wah yuh cah back fi mi?" As mi step fut in a har room mi si melia a unpack har bag so mi drop mi lazy self pon har bed
"Me cah back mi self fi yuh" she tell mi back while she a tek out har dutty clothes dem out a har travelling bag
"Mi look like me love woman" mi tell har back same time
"You don't have to hide the truth baby, I know the truth so you can tell me and I love you too" she change har voice fi sound like some a dem insane , love -obsessed people de wah yuh see in a show. Me have to shake mi head an laugh
"Look like yuh lick yuh head up a Haines yard eno"
"Suh wah yuh say happen wid you and yuh man now?" Me did text melia and tell har bout wah happen a di party. As yuh maybe notice by now me tell melia everything
"Di dutty nigga bwoy did a wine up back a gyal a di party, mi get say yes him maybe did wah dance but dem deh wine deh a don't nutten normal" me start explain to melia bout wah did happen
"Suh yuh talk to him an tell him dat yuh don't like dat an if di two a unnu go deh yuh don't comfortable wid him doing dat?" Well me neva did talk to him bout it fi true
"But me don't have to talk to him bout it him nuh must know dat me nah go like dat" any sensible man would a know say if dem woman know dat dem a bubble behind a other gal a go problem dat
"Member say not all woman and man have di same view. Wah you have a problem wid it might be ok fi a next female so a you now haffi tell him say, boss dat fi don't happen, yuh get mi?" Melia look pon me and point pon mi like say she a me an a rosh she a talk to, maybe a so she expect me fi tell him say. Mi niece yah might have a madness bout har but one thing she always give me good advice, sometimes that is.
"Ok, Ok maybe mi Neva handle di situation too good but after mi did feel it suh. Dem yah things yah happen when yuh start love-" me stop me self before me finish me sentence.
Lawd God me can't believe me just admit that. But it's di truth me get fi love roshane. Me don't know when it start happen but me guess a dats why mi feel so hurt cause mi love him and then when me see him a wine back a other gal now me start think hard about everything. What if him don't love me back?
"Mmn hear who did say she never even like roshane. By di way, wah Chris deh gwan wid?"
"Chris baxide hole!. Go ask di dutty gyal who him claim a just him friend, I don't know a fart bout him" fi a while now me a avoid Chris, him don't really text me dat much again mainly cause me cuss him out an tell him fi goweh and gwan to di gyal Britney, him still wi send one an two text like
Hi, you OK?
How things going with you?
How the family?
You know dem small talk de like when somebody a look friend, maybe me over react with Chris to, me nu know sometime me feel like say me have a madness bout me dat cause me fi vex over simple things but me did really feel it mon when him tek Britney side over mine, a me and him deh so him should a have my back all di while.
"Tanya me tell yuh already and mi a go tell yuh again. Make sure you know wah you a do and mek sure say dung di line yuh nah go regret yuh decision. You a me auntie and mi love yuh so me don't want see yuh get hurt" me jus look on all a dis as life, life is about making mistakes and learning from dem so if dung di line me realize dat me mek a mistake all me do a learn from it
"Me know yuh worried over me but you don't have to be cause me go be alright afta all mi neva go put mi 100% trust inna no man so none can't hurt mi" while me a talk to melia mi did on mi phone a go through me whatsapp contact, dat a when mi decide fi reply to di text dem dat roshane did send mi, di same one dem dat me did a ignore. Mi just ago look pass what happen, maybe mi just did a overreact
Me: we need fi talk seriously about this thing if we go be in a relationship.
Me text roshane and as expected like Him did a wait on me text him read the message and start type. .
"Ok anything yuh say. Mi did tell yuh say di maaga bwoy romario him a come text back mi phone a say him want mi back?" Melia start tell mi fi har story.
Hear yah now. Man a fool eno.
**
Thank you so much for being patient with me and this story! Appreciate it much! Remember to vote, comment and share!
YOU ARE READING
My Jamaican Love Triangle
RandomWritten in Jamaican patois (patwah) Tanya have har good man but shi find harself falling fi wah next bwoy, dis time wah bad bwoy.. Two man, one gal. But which one a di man dem shi ga choose?.
