♠Tanya's POV♠Just as Chris fi look in a fi me an melia direction wah gyal who him a walk wid touch him an say something to him den dem cross di road go in a wah store, me nu know weh dis feeling com from but mi just feel like fi go ova deh to him, me a wonda a who dat gyal be. Wah him a do wid she to?
"So tanya who dat deh gal deh who Chris a walk wid? " melia did a think di same thing as me cause a dat me wah know to.
"Maybe a him new gyal" it hurt me more than me even expect fi say that. The song dat stefflon don an French Montana sing com to mind, the one wah name hurtin' me.
Heard you gotta new girl-friend and it's hurting me-eee... Di lyrics in a di song just start pop up in a me head. Wah di frigg him a do wid she? Can bet say him did a keep har all along when we did deh
"But Tanya to be fair thou eno imagine say if a did you an roshane a walk an Chris see unnu him wud a deh wonder di same thing wah we a wonder now to dats why me tell yuh say yuh need to set things right" sometimes me hate hear di truth cause it just hurt me. Me have to question me self sometimes if it wrong fi have feelings fi two persons at the same time but as someone said if you really love someone yuh nah go fall fi someone else.
"Mek we just go some weh else" di two a we did still in a di town but we nu too ready yet fi go home so we plan to idle a while in a di town.
Me an melia go a hair store and clothes store but me mind just de pon di old fart Chris an him gyal. If me in a one store me can't help but fi a stare out a door pon everybody who a pass, in a me mind me a wonda if him ga pass wid di gal. Di gyal have lil batty thou a must a dat and har complexion a fool him cause she a Browning, she medium built an she cut har hair in a rihanna hairstyle.
"Com on melia me ready fi go home" we just done buy Patty a juicy beef cause nuh care how we com in a town we can't com an don't buy a patty.
As soon as we walk out a the patty shop nu di Chris an him gyal me see a mek them way fi go inside a di place we a come from outta.
"Tanya? " him say an di look pon him face hard fi read, to me him look surprise,me don't know if a surprise in a good way like him glad in a wah surprise way fi see me or in a bad way like him surprise me ketch him now wid him woman but me don't know which one.
"Chris" me say back him name flat, all dis time me a stare pon di gyal side a him, me a wonda when him a plan fi do di introducing a him woman to me.
"I wasn't expecting to see you here" him tell me , an just as how him a stare pon me a same so me a stare pon him gyal, not even him me dont a look pon so much, har eye dem big thou. It kinda spoil har looks
"Me never did a expect fi see you dung yah so either" Chris live in a next parish as yuh might member but a like next door parish so it nu all dat far "so you not going to introduce yuh female friend to mi Chris?" It com like him not even member say him have di gyal beside a him tan up. Di fool just a stare pon me
"Oh yeah. Tanya this is Priscilla" me look pon har an say hi , me don't want seem mean an unfriendly but him can't really expect say me go like har
"Hi" she tell me back and we stare at each other fi a while longer. Meanwhile me hear Chris a talk to melia, them know each other from before obviously so Him did a ask her about how things going an thing.
After a while when Chris see di eye dem way me a gi him an him gyal, him drag me hand lil and we walk go a lil distance ova to wah side by we self
"Tanya what's going on with you? " him ask me as soon as we tan up alone
"Wah yuh mean wah deh going on wid mi? A you fi tell me wah de gwan wid you an yuh big eye woman ova deh so" me tun me head side way an look ova weh di gyal deh, she tan up by harself an de pon har phone while melia tan up a nyam patty, as usual me can expect dat from melia
"Priscilla is my cousin. She's not my woman an why would you think that I would do something Like that to you? " cause me a do dat to you, dat me a think in a me head an me shame bout it God know. Look how me a judge him say him did a cheat when in reality a me a di one who a do di cheating
"Oh me neva know say she a yuh family, afta yuh never tell mi dat" how me did fi know dat a him family an even suh sometimes cousin look dem cousin, it nu impossible fi dem deh.
"All I'm asking is for you to forgive me and put all that had happen behind us you think you can do that, for me? For us?"
Us ...
a long time me nu hear de word de from Chris, neva know say there could be an us anymore but nu care wah happen Chris a di guy who always have me heart just by him words dem dat him use him always capture me heart with him nice spoken English but some how me caught up between him and roshane.
"Tanya you know that I love you right and I want us to be together but you have to at least meet with me half way . Can I ask you something?" Me want tell him no cause me fraid say di way how him a lyrics me right now me might ketch swell head an chat out everything an tell him di whole truth a wah me a do
" yes yuh can ask mi" well whatever him have to ask me nah go know until him actually ask
"Do you have someone else?" Jesus Christ wah mek di bwoy haffi ask mi dis yah question yah now. Wah mi ga say now fada?
**
I must apologize for the longg wait I'm a bit.. Slow.. with di updates but all who's still reading thanks a lot for the support its well appreciated.
YOU ARE READING
My Jamaican Love Triangle
RandomWritten in Jamaican patois (patwah) Tanya have har good man but shi find harself falling fi wah next bwoy, dis time wah bad bwoy.. Two man, one gal. But which one a di man dem shi ga choose?.