My Jamaican Love Triangle

9

♠Tanya POV♠

Done.

Mi finally finish mi social studies homework now, fra alrick tell mi bout di bike bwoy it cum like mi loose focus god know. Mi tek fi Eva fi done di one homework, thank god a just one homework wi get fi do tiday.

Mi tek up mi belongs dem an find mi way up a mi yard. Wen mi did just com home fra school mi madda did tell mi seh mi big sista danae a com look fi wi today.

Danae ga tun 26 dis year shi have har work as a dental assistant an a dis year on har birthday shi planning on getting married to dis dentist man. A dung a dat same place shi work shi meet har man wen dem did have dis dental fair , a suh comes shi meet di bwoy cause him a one a dem big shot dentist man deh. Mi nah lie thou, mi nuh like how him teeth dem look ,Yuh know how some people have chalk teeth a suh fi him dem look. As dem seh, even di best a carpenter always live Inna di worst house. Mi nuh know how Danae manage fi look pon dem teeth deh everyday much less fi kiss him. Oh bwoy, dat thing dem call love.

Mi shake mi head while mi a walk go up a mi yard meanwhile mi start think bout Chris. Fi seh him a man him love vex, vex thou. Bout him nah go wait forever fi mi. If him think him ga left mi an go to Britney den him try think again cause him know mi mad enough fi throw wah knife Inna mi bag an go fi him an di gal Britney. A dat much mi love di bwoy eno but mi nuh know but something, something bout dis bike bwoy roshane dat mi think mi just drawn to.

"Tanya come put on some clothes pon yuh bredda fi mi. Yuh sista deh near an mi wah dung cook fi she get som before shi left" Danae just come by now an den com look fi wi, shi move in wid di dentist man bout soon two years now but wi hardly si har, only just talk wi mostly talk ova phone.

Mi dash dung mi notebook pon the settee up a mi yard an tek mi likkle bredda fi go put on clothes pon him. Alex a just 4 year old, him a mi only bredda an although mi can't stand him more while ,mi love mi likkle rebel bredda most a di times.

"Suh shi a carry di dentist bwoy?" Afta mi get clothes fi put on pon Alex mi carry him go back Inna di living room and siddung Inna di settee while mi put on him clothes. Yuh can stay in a wi living room an si straight Inna di kitchen suh mi si mi madda who did Inna di kitchen ova di pot pon di stove tun to mi an gimmi one a har serious face

"Tanya have some respect fi di guy, him name is Rudolph or you can say doctor Clarke"  my madda shi nuh fi talk cause di way mi hear she an Keisha style up di bwoy seh him nuh fit Danae an a obea him use conquor Danae head and as you may realize mi nuh too like dat bwoy suh mi nah go really have no respect fi him  "And a just danae alone a com" mi madda add on when shi see seh mi not even acknowledge bout dat bwoy

"Shi a go back today nuh suh?"  Di man com like him don't want danae spend one night away fra him, him must a think non a wi have man up yah Inna di house who go tek weh danae crotches fra him. Mi hate man weh watch woman crotches Yuh si. Di man just wah har fi him self an mi fi like him?

"Yes mi Chile Yuh know how Rudolph is and besides a yuh sista decision" di man com like him a control Danae an shi not even can talk up an seh to him seh har family com first but true di bwoy spend pon har ,anything shi wah him gi har so dats why shi don't seh nothing cause shi don't wah di bwoy ketch vex an cut down pon him spending

Mi just murmur unda mi breathe an tun on di TV fi watch terminator suh til mi can get fi si mi sista, maybe dis a di last wi ga see har until har wedding four months time fra now. Dat a IF mi mek up mi mind fi go a dat wedding. If dem nuh married yet an di bwoy a gwan so imagine wen dem buss married kiss, maybe wi nah go even si har again.

•~•~

"Mek sure say yuh don't wear none a dem big sour draws deh again dat yuh use to love round yuh fiance" danae come bout one hour now an as shi com shi only seh mi name an ask mi if mi good afta data she an wi madda an wi adda sista, Keisha did a chat whole time.

Danae look like one a dem stush gal deh, yuh know di one dem dat gwan uptight cause dem inna position an have hype man? dat same way shi look. Shi look good thou. Har face tan good, har face well make up wid di neat tutorial eyebrows dem dat a wear ,an face well powder up or cream up whichever one shi use cover up di likkle bump dem dat shi use to have pon har face, because she a browning di bright red lipstick shi have on fit har wid dis black,straight, shoulder length human hair wid di end part blonde. Shi did Inna wah short white dress wid flat red shoes an red handbag

"No mother, stop embarrassing me like that. That's a thing of the past now" from shi meet di dentist bwoy she seem fi figet patwah, she must a deh try impersonate those upclass people wah gwan like dem Neva use to chat patwah or dem one deh who gwan like dem don't know how to speak it. 

While mi madda an di rest a family dem laugh up wid har mi tek weh mi self an go mi room. Mi nuh si why mi must pretend an gwan like mi inna har cause fi be honest mi really don't like how shi a gwan.

Mi tek up mi phone an earplug and start listen some music while mi tun on di internet connection pon me phone.

Mi start get wah heap a message but dis one in particular, mi si one message com in pon mi WhatsApp fra one strange number. Mi open the message an it say.

Hey pretty girl

Mi neva haffi second guess a who but mi look pon di dp picture fi si if mi suspicion did right..

As mi did think..Nuh di bike bwoy him!. A Weh di frigga get mi numba from?.

An Wah mi fi do, answer him or not?

~•~

Show mi some love by voting an comment tuh nuh! An can you share dis story wid yuh Jamaican friends too? I'll appreciate it ;)