Question for you: Ladies, if your boyfriend ask you out on a date where would you want to go?
♠♠Tanya's POV♠♠
"Tanya, Tanya you go buy sweetie fi mi today?" Alex mi likkle bredda com a lick mi pon mi hand an a bother mi. Afta mi lay down pon di settee a relax an a text dis likkle dragon bwoy wah mi mada have a com bother mi.
"Sweetie nuh gud fi yuh" me tell him hoping that wi mek him go weh . Me love mi bredda but sometimes, like rite now, mi can't bother wid him
"But you promise me today dat you go buy sweetie fi me" him tell mi an a kinn up him face like wah him always do wen him nu get things fi him way. Wen him bother me bout sweetie me always tell him seh me go buy it today but today always tek fi eva fi cum cause me neva a memba fi buy nothing fi him.
"Alrite then. Tomorrow me buy one sweetie fi yuh , gwan now" me push him way likkle fi gwan walking
"You go buy di green one, you must buy the green one yuh hear" a di apple flavour bonbon him a talk.
"Alrite, alrite. Gwan to yuh mada now" him start smile sametime
"Ok sista" him love call mi sista me nu know how from di four years him com pon earth him mussa don't learn me name yet.Him tek off gone likkle afta. Same time me see Al a pass fi go dung a him yard.
A long time me nuh chat wid him from we did go a di party me not even see him afta fi chat. Al nuh lef di road, him nah work but anybody would a think him a work di way how him go out pon di road early an com back late
"Yow Al, wah gwan?" Me run outta mi house after him
"Wah yuh wah? " di way how him stop an answer mi if mi did have shame me would a more dan shame right now but knowing me, mi just look pass dat
"Suh why yuh affi a answer mi suh? " yuh couldn't just expect mi fi mek de one yah slide suh without saying something
"Di gyal a gi mi problem mon"from him say dat mi understand right away . Al woman wah name Stacie always a stress him out, but me don't know how woman like dat stay wid somebody like Al cause number one him nah work an every woman want money suh me nuh know how him don't expect seh him go get problem wid dat gal cause him a bruk pocket.
"Wah she do now?" Al siddung pon d piece a old chair dat mummy always keep outta door. When yuh look pon Al yuh can see say him inna deep wondering, yuh know when people a look outta space.
"Mi a go kill him" him jump off a di chair long time a chat. Everytime him chat say him a go kill di gal an all now me can't see dat.
"Siddung back an shet yuh cloth up. From wen yuh go kill di gal ,yuh just full a mouth suh . Di only thing yuh fi do a lef di gal an done" some man a fool eno, di gal stress him out suh til now him a chat bout kill before him just find a new gal, even thou Al a me family mi nuh fraid fi tell him say him a fool.
"Yuh can believe say di gal a deh wid frycrab dung di road, mi mus kill him!" Frycrab a wah whoring bwoy in a we community, every gal him sample sake a so dem say him have virus
"Aids body frycrab? Mi mumma. A lie yah tell mon" now me understand wah Al a go through. Me would a pick up fi di gal before but Al dis fi kill him fi true, anybody who do mi dat me would a kill him to. Oh God a wonder if Al ketch di virus to?.
Al walk weh inna him anger a cuss and a loud up him mouth bout wah him go do. Mi sorry fi him. Oh God di gal wicked to him. Not because him nah gi har as much money an thing she shouldn't do him dat, especially wid frycrab of all somebody. A mussa cause him a scamma so him av lil money. Mi a tell yuh some things woman do fi money.
Me can't believe, me Even in a shock, Al gone bout him business so me find mi way back inside a me house. By di way a who him say him go kill? Di gal or di bwoy? Oh bwoy, poor Al.
So dis Saturday we a go out rite?
Mi check me whatsapp message fi see roshane text me back. Me an him did a text before from di time mi torment bredda com bother mi but now wid wah Al tell mi it com like me brain lick, mi feel bad fi him.
Yeah dis sat gud .
Mi text him back and tell him. Rosh wah we ga beach Saturday suh mi tell him say dat gud, before mi did a think bout movies but we can always do dat one next time afta all a don't like seh none a we a run weh or go no weh.
We relationship a tek time gwan now, me don't find no problem wid him suh far except dat him always online even late in a di night an early in a di morning, dem time deh me a sleep suh me have to a wonder sometimes who him up so late a chat wid but maybe me a over react, dis damn technology and social media go mek me go insane, it gud wen yuh can see wen last someone active online but it bad sometimes to God know.
**
Me and melia in town a look pon bathsuit an di amount a dem me see, dem just look gud suh, dem just a red mi eye. Me thinking of buying one bathsuit fi wear ga beach wid rosh. Me don't know why thou but mi obsessed with one piece bathsuit, mi see som wah mi like so me plan fi com back a next day an buy one, melia say she want one to so we both ga com back.
Me tell melia say me a go beach an she nu tap chat say she wah com to suh me tell har say she can com, mi know shi wouldn't wah com if a she alone a cause shi gone back to romario. Yesss! She tek him back, dat maagabwoy, but fi dem story a fi a next day.
"Tanya, tanya. Look! " me hear melia whisper shout side a me, me look pon har an see who shi a tell mi fi look pon. Di person a com in a fi wi direction and mi come like mi freeze.
Chris.
****
I'm working on getting pics for the characters so you'll have an idea of how dem look. Hope you all don't loose interest in dis book because of my poor updating skills. Please vote n comment. Share too ok. Thank you all!!!! :)
YOU ARE READING
My Jamaican Love Triangle
RandomWritten in Jamaican patois (patwah) Tanya have har good man but shi find harself falling fi wah next bwoy, dis time wah bad bwoy.. Two man, one gal. But which one a di man dem shi ga choose?.