حاسس بصداع رهيب في دماغي ..
مفيش أدوية ولا مسكنات بتوقفه..
روحت لدكاتره كتير محدش عارف السبب ..
مبقتش عارف أشتغل..
الموضوع بيسوء كل شوية ..
النهارده وانا راجع من شغلي بالعربية ..
حصل حاجة غريبة جداً ..
انا نسيت مكان بيتي ..
مش فاكر الشوارع اللي بمشي فيها كل يوم ..
استخدمت ال GPS علشان اقدر أروح..
ذاكرتي مشوشة..
زي ما أكون بفقد الذاكرة يوم بعد يوم ..
المرة دي حجزوني في المستشفى لأني اكتشفت اني مباكلش حاجة خالص ..
ده كله والدكاترة مش عارفين انا فيا ايه ..
كان فيه شيوخ وأصدقاء بيزوروني في المستشفى بيقروا عليا آيات من القرآن ..
لكن مكنتش بحس بأي تأثير..
ابتديت أحس إني في بلد تانية..
بشوف أشخاص جنبي بيتكلموا لغة مش مفهومة..
بشوف صراعات وسباقات لحيوانات غريبة..
انا مش عارف ايه اللي بيحصلي ده ..
انا كمان مش قادر أتكلم..
حاسس بصعوبة كبيرة في النطق..
إمبارح قمت من النوم مفزوع الساعة ٣ ألا خمسة قبل الفجر..
شوفت ٣ ستات لابسين أسود في أسود شكلهم بشع ..
بيقربوا عليا ببطئ..
داخلين من الشباك..
رجليهم مش لامسة الأرض..
صرخت كتير وهما بيقربوا..
بيبصوا على خراطيم التغذية اللي في إيدي..
كأنهم عايزين يدخلوا جوا جسمي..
انا مرعوب ومش قادر أتحرك..
افتكرت كلام شيخ من اللي زاروني..
اني لو حسيت بحاجة مش طبيعية ..
اقرأ آية الكرسي..
قريت أول الآية بس ذاكرتي مش مجمعة الباقي..
كنت بعيط وانا شايفهم بيقربوا وبكرر جزء الآية اللي قلته..
بقوا يبعدوا وانا بقرأ ولما يختفوا واسكت يرجعوا تاني..
حاسس ان الغرفة بتتحرك بيا ..
انا خايف..
كل حاجة رجعت لطبيعتها لما باب الغرفة فتح ودخلت ممرضة..
فتحت عيني عليها..
مكنتش عارف ده كان حلم وإلا حاجة تانية..
كنت عايز اكلمها واقولها اللي حصل ..
لكن مقدرتش مش عارف انطق..
كنت سامعها وهي بتسألني انت بتعيط ليه ..
متقلقش انت هتبقى كويس ..
مبقتش عارف افرق بين الواقع والأحلام..
حاولت أهرب من المستشفى دي لأني حاسس إن هي اللي فيها حاجة غلط ..
كنت بقطع خراطيم التغذية من إيدي بشكل غريب ..
إيدي بعدها بتتقطع وتنزل دم كتير ..
بس كل مرة كانوا الممرضين بيلحقوني ويرجعوني الغرفة تاني ..
هما مش شايفين الراجل الأسود المخيف اللي معايا في الغرفة ..
طوله واصل للسقف ومبيحركش عينه من عليا ..
بنظرات كلها تحدي وشماتة..
معرفش مين ده ولا عايز مني إيه..
في الليلة دي شوفت رؤية تانية..
شوفت اتنين شكلهم مخيف شايلين بينهم برواز مكتوب عليه آيات قرآنية بس بالمقلوب ..
كانوا بيشاورا عليه اني اقرأه..
حاولت .. بس مكملتش.. فقدت النطق..
كانوا مصرين اني اقرأه..
بس مقدرتش..
افتكرت آية الكرسي..
لما قريتها الإتنين دول اختفوا..
بصيت في الساعة جنبي لاقيتها ٣ إلا خمسة ..
تاني يوم زارني صديق ومعاه شيخ ..
كان جايب معاه مياه مقروء عليها قرآن..
حاولت اشرب منها لكن مقدرتش في البداية ..
حاسس ان المياه ريحتها غريبة وطعمها مقرف..
لما جابوا مياه عادية شربت منها ..
الشيخ أصر اني اشرب مياه من المقروء عليها ..
لأن معنى إني اقرف منها يبقى ليها فايدة للي بيحصلي ده ..
شربت منها شوية ومقدرتش أكمل..
بعدها حالتي ساءت وفقدت الوعي ..
فوقت بعدها في غرفة تانية فيها أجهزة كتير ..
عرفت بعدها إنها العناية المركزة..
واني فاقد الوعي من ٣ أيام..
واني عندي مشكلة في الكلى محدش يعرف سببها..
بعد يومين في العناية المركزة..
شوفت رؤية..
كنت انا و الراجل الأسود واقفين على حافة جبل ..
حصل صراع بيني وبينه ..
حاول انه يوقعني من فوق الجبل ..
بس انا قاومته وزقيته بعيد عني ..
قام هو اللي وقع من فوق الجبل ..
قمت مفزوع كالعادة في نفس الميعاد الساعة ٣ إلا خمسة..
تاني يوم ابتديت أتكلم واحدة واحدة وابتديت مشوفش خيالات معايا في الغرفة ..
مبسمعش همس مفيش صداع ..
حتى الدكاترة قالوا ان الكلى رجعت كويسة زي الأول..
بعدها بيومين نقلوني من العناية لغرفة تانية ..
زارني صديقي والشيخ اللي زاروني آخر مرة ..
حكيت للشيخ كل حاجة ..
كنت بحس بأيه وبشوف إيه حكيتله عن الستات والاتنين اللي كانوا شايلين البرواز..
الشيخ قال ان ده سحر أسود حد بيكرهك صنعه ليك ..
وان الشخص اللي عمل فيك كده بشرته سوده..
وقالي الحمد لله إني مقرأتش البرواز اللي جالي بيه الإتنين اللي شوفتهم..
لو كنت قريته كان السحر إتمكن مني وكنت هفضل كده لأيام معدودة وبعدها هموت ..
وكان ممكن جداً ان انا اللي اموت نفسي بأيدي من غير وعي ..
وتفسير سقوط الراجل الأسود من فوق الجبل بيعني ان السحر بتاعه تم أبطاله والا كنت مت ..
لأن السحر الأسود مبينتهيش إلا بالموت لو اللي عمله ما أبطلوش..
لما الشيخ قالي كده افتكرت خلاف حصل بيني وبين شخص بالمواصفات دي من فترة ..
بعد أيام وانا خلاص اهلي بيخلصوا إجراءات الخروج ..
جاني صديق وقالي انه أحد أصدقائنا تواصل مع الشخص ده وعرض عليه مبلغ كبير من المال علشان يسيبني في حالي وبعد رفضه في البداية وزيادة المبلغ وافق وده كان في اليوم اللي قبل ما تتحسن فيه حالتي..
نصيحة مني أخيرة
خلوا بالكم كويس ..
احنا عايشين في عالم خالي من الأمان..
الناس بقت مؤذية بشكل مرعب ..
أي خلاف بسيط ممكن تدخله متعرفش عواقبه هتبقى إيه..
انا شوفت الموت بعيني وربنا نجاني..
في دماغي أفكار كتير للإنتقام من الشخص ده ..
لو لقدر الله كنت مكاني وعرفت اللي عمل فيك كده تصرفك معاه هيبقى إزاي؟
