A Walking Canvas (Rare Disorder Series #1)

32: Broken

CHAPTER THIRTY-TWO
Broken

"Ayusin mo naman ang trabaho mo Kervin! Ang usok!"

Sumilay ang ngiti sa mga labi ko nang marinig ko ang pagrereklamo ni Isa na kasalukuyang pinupukol ng masamang tingin si Kervin na hirap na hirap naman sa ginagawa. Nandito kami ngayon sa garden area ng bahay namin. At kanina pa nagrereklamo si Isa dahil sa pagpapausok na ginagawa ni Kervin na siyang sumalo nang trabaho sa pagba-barbeque.

Si Isa naman ay kasalukuyang nagse-set up ng blanket at maliit na lamesa kung saan kami pu-pwesto mamaya kapag tapos na sa pagluluto si Kervin. Na sa tingin ko ay malayo pang mangyari.

Si Devyn naman ay umalis sandali para bumili ng chips at soft drinks dahil naubusan na kami ng stock sa bahay. Habang ako naman ang nakatoka sa pagbabantay kay Maxim na kasalukuyang rumoronda sa garden sakay ng maliit na sasakyan niya.

Nagulat na lang ako kanina nang mabungaran ko silang tatlo sa pinto ng bahay namin kasama si Maxim. Bigla na lang nag-aya na mag "bonding" daw kaming lahat through barbeque party. Hindi na rin ako nagkaroon pa ng panahon na makipag-argumento sa kanila dahil inanyayahan na nila ang mga sarili nila papasok sa bahay, ng walang pahintulot ko.

"Isa, halika rito." Sinenyasan ko siya na lumapit.

Mabilis naman siyang naglakad papunta sa direksyon ko na bahagyang lukot ang mukha. Malayo kasi ako ng sa kanila para hindi makalanghap ng usok si Maxim dahil sa kagagawan ng ama rin niya.

Kinuha ko si Maxim mula sa sasakyan niya. Hindi naman siya nagreklamo at agad na kumapit sabalikat ko. Ngiting-ngiti na humarap ako kay Isa at walang babalang iniabot sa kaniya si Maxim.

Nanlaki ang mga mata niyang inabot pabaik sa akin si Maxim pero mabilis na nakaatras ako. "H-hoy! K-kunin mo 'to."

Ngumisi ako. "Practice na 'yan, Isa."

"Hoy Issadora, ingatan mo 'yang anak ko!" sigaw ni Kervin habang nakaturo pa kay Isa gamit ang tong.

Sinamaan niya ng tingin si Kervin. "Alam ko. Ang pangit mo!" asik niya.

Muli na naman akong napatingin kay Kervin nang eksaheradong suminghap siya. Saklot pa ang dibdib habang masama ang pagkakatingin kay Isa. Animo nayurakan ang pagkatao niya sa paraan nang pagkakaturo niya sa babae gamit ulit ang tong.

"Aba! Insulto na 'yan Issadora! Nakikita mo ba kung gaano ka-gwapo ang anak ko?" sabi niya sa naghahamong tono.

"Nakikita ko." Kumunot ang noo ng babae. "Anong kinalaman no'n sa'yo?"

"Siyempre ako ang tatay kaya malamang sa akin siya magmamana ng ka-gwapuhan," nagmamalaking ang boses na inilahad niya pa ang sarili niya sa aming dalawa. Nakadipa ang dalawang kamay niya animo inaalay ang sarili sa kung sino man.

"Assuming ka masyano, Kervin. Wala ngang nakuha maski isa sa iyo, e. Pangit!"

Napakagat ako sa ibabang labi ko sa hirit ni Isa. Nakatanggap ako ng masamang tingin mula kay Kervin dahil sa naging reaksyon ko. Natatawang nagtaas ako ng dalawang kamay tanda ng pagsuko. Totoo naman kasi ang sinabi ni Isa. Walang kahit na anong nakuha si Maxim sa kaniya. Buhok siguro? May pagabrown kasi ang buhok ng nanay ni Maxim. Habang ang buhok naman ni Kervin ay itim na itim, na siyang namana ni Maxim.

"Palibhasa hindi ka marunong tumingin ng pangit sa hindi. Hindi ka naman kasi babae!"

Si Isa naman ngayon ang napasinghap. "Pinagdududahan mo ba ang pagkababae ko?" hindi makapaniwalang tanong niya.

Muli na namang suminghap si Kervin, mas malakas sa nauna niyang ginawa. "Babae ka?!" eksaheradong tanong niya.

Nagtagisan silang dalawa ng tingin. Natatawang pinagmasdan ko lang silang dalawa at hindi na tinangka na makigulo pa. Baka madamay pa ako.