أنتقام للعشق

البارت الخامس والعشرون

#أنتقام للعشق 🥀
البارت 25
بقلم : نور حيدر
noorhaidar18

مساء الخير عليكم متابعيني 🦋🌿..

(علقو على الفقرات احب اقره تعليقاتكم 💜)

مو هسه حتحس بنقص
باجر يُفر بيك الزمن
واخذ الثار براحتي
يل علمتني على السهر
باجر ترد متعوب الي
چي ما تلگه مثل ولايتي ..🥀

جوري /

كتله بخنكة : لا ما موافقة ..

هدووء عم عند الكل رفعت راسي الهن و اشوفهن
يباوعلي بصدمة و استغرااب ..

كالت رسيل بتوتر : شتكولين جوري ..

سمعت صوت السيد كال :شنوو ما موافقة بويه شنو مجبورة انتي احجي !؟

كتله بغصه : لا سيدنه مامغصوبه على شي ..

رجع كال :متأكده بويه !؟

: ييي متأكده ..

سكت ماسمعت صوت باوعت على امي تبجي كالت : ليش هيج سويتي يمه ..

كالت امه بصيااح : صدك أنتي وحده ماتستحين شلون ترفضين ابني و كدام الناس مافكرتي بسمعتنه من هيج سويتي ..

كمت بغضب و كتله بصياااح حتى الزلم يمكن سمعتني: ابنج الي مايستحي من عاف بنت عمه وعرضه بهيج يوم كدام الناس ومافكر بسمعتنه و لا فكر بسمعتي
اني ردت اخذ حقي و اخذته منه و هاهيه مالكم مره يمنه ...

كالت بغضب : كتله عوفه ما تستاهلك بس مايسمع مني وهاي النتيجة ..

باوعت على الزهراء الي امبين الفرحه بعيونه
ابتسمت بأستهزاء :اخذيله بنت خالته ترهم ويااه ..

حجت امه : تاج راسج زهراء ..

صاحت أمي بأنغعال :احترمي نفسج ام غسان ترى ساكته لان عيب ابيتي واحجي شي يزعلج ماكو احد تاج على راس الثاني .

ضلت صيااح بيناتهن واني واكفه بفستاني بلنص
افكر بلي سوويته و دموعي تنزل اول مره اخليهن يشوفني واني ابجي ..

سمعت صوت صياااح بره صوت ليث :
يالله راح ندخل ..

لبسن عبيهن واني هم لبسني عباية دخلو كلهم
ابوي و اخواني كلهم ماعدا شاهر الي جان ما موجود ومايعرف شي وعمامي بس و اولادهم يباوعولي متفاجئين من الي سويته ونظراتهم ما قابله على السويته ..

اجه اتقدم بأتجاهي أبوي ورفع ايده وضربني راشدي
قوي كله شهكت ابووي الي مدللني و مايقبل احد يزعلني او يضربني هسه هو مد ايده عليه ...

باوعتله و عيونه كله حسره : مع الاسف ماعرفت اربيج
شسويتي ولج ليش وافقتي بيه و هسه ترفضينه
فهميني ليش هيج تسووين مامصدك انتي بنتي جوري ..