حجر النرد 🔞

٤١

زينب علي .....

حجر النرد ......

.
...................

سفانه :
......

طلعت من المستشفى امشي واني شابكته حيل لا يطيح مني ... لازمته خاف يوكع ... اديه ترجف  عاصرته  جوه ضلوعي خاف لا يزلك مني . اريد اركض بلبيت خاف يبجي وما اعرف اركب الممه ...  هواي مشاعر هاجت عندي ....
امشي طول الطريق واشوف بيبان القفص الذهبي الي جنت محبوسه بي تنفتح كدامي ... وفكره تاخذني وتجيبني اذا جان ولد راح أعلمه واربي وادرسه واتعب عليه
واذا جانت بنيه البسها ارقه ملابس واعلمها وارميها وازوجها لأحسن واحد  وافكاااااار تتلاطم براسي . ما حسيت على البيت لني واصله   فتحت الباب وطبيت .

خليته ع الجربايه . وضليت اباوعله اخاف يبجي .
لزمت الطفل وانا خايفه يا ربي معقوله هذا صار اليه ....
عشت ساعات اني بغيبوبة ما حاسه على روحي من الهذيان وسرعان ما اجتي امي . وهي تخلي حجابها على التخم وتدخل لغرفتي تلكاني عايشه بغير عالم .

واكفه صافنه . واباوع ع الطفل بدون حركه ....

.
.
.

ام يعرب : طبيت لكيت الباب مفتوح شنو من شوكت تخلين الباب مفتوح انتي ....

التفتت لوجود امي : هااا .... ها يوم اجيتي ....

ام يعرب : يا صلوات بعد متحسين بالدنيا طشت لو رشت ....

سفانه : يوم متفاجأه والله اعرف هذا الطفل لسه بكماطه واني خطيه اخاف اشيله ....

ضحكت والضحكه ترسم  تضاريس من التجاعيد بين عيونها . تقربت عليه برق مثل ما عودتني عليها وهيه تهمس يمي :  ععههعع دير بالج على فؤاد  ام فؤاد ...

التفتت الها واني اضحك .. شنو يوم ولد هذا ...

ضحكت  : اييي لعد صارله ٣ ساعات بيدج ومتدرين ولد لو بنيه .

سفانه : ها يوم والله شو ساكت ميبجي ....

ضحكت امي وهي تستعرض سذاجتي : اي نو اذا بجن راح تميزين من صوته اذا خشن ولد واذا ناعم بنيه ...

سفانه : ههههه يعني ولد هذا ...

ام يعرب:  اي ام فؤاد هذا ولد ....

سفانه : منو هيه ام فؤاد ....

ام يعرب : انتي...

.

جان احساس مربك احس بي مثل المتيه راسي من رجليه . كانو حلم جنت ما متخيله يوم من الايام يتحقق وهسه تحقق . ما مصدكه راح يصير عندي طفل ...

سفانه : ها يعني اني راح اصير ام فؤاد  ...

ام يعرب :  اني مفاتحتج بلموضوع كلت خاف تصير بي عروضات لو مشاكل وتالي ميصير الطفل الج وما اريد اعلق امالج بالفاضي . لحد ما اتأكد من ام رزان يلة ابلغج . وهسه ما اريده يجي لبيتنه ابد ما اريد آمر تشوفه ...