နှစ်ယောက်သား Mall ထဲမှာလှည့်ပတ်ကြည့်နေကြကာ နောက်ရက်သွားရမဲ့ခရီးအတွက်လည်း လိုအပ်တာတွေဝယ်နေကြသည်။ ဒီကပြန်ရင် ရောင်လွှမ်းမိဘအိမ်ကိုလည်း ဝင်နှုတ်ဆက်ကြဦးမည်ဖြစ်၍ လက်ဆောင်ပစ္စည်းတွေရောဝယ်နေကြရသဖြင့် အထုတ်တွေကများနေကြသည်။
ရောင်လွှမ်းညီမလေးအတွက် အကြိုက်တွေ့စေလောက်မည့်မုန့်တွေရယ်၊ လူကြီးတွေအတွက်အားဖြစ်စေသည့်ဓါတ်စာ၊ တခြားပစ္စည်းများဝယ်ယူပြီးဖြစ်ပေမဲ့ ဘာလိုသေးမလဲဆိုပြီး မိုးပြေးမျက်လုံးတွေက ဟိုကြည့်ဒီကြည့်လိုက်ကြည့်နေမိသေးသည်။
"ဒီလောက်ဆို ရပါပြီအချစ်ရယ်၊ ကိုယ်တို့ကခဏပဲသွားနေမဲ့ဟာ ပြန်လာရင်လာတွေ့ဦးမှာပဲကို"
ရောင်လွှမ်းပြောလိုက်တဲ့အခါ ဘေးနားကရှိတဲ့လူတွေဆီကို မိုးပြေးဝေ့ဝိုက်ကြည့်ပြီးနားရွက်တွေပူသည်အထိ ရှက်ရွံ့ရသည်။ တခြားသူတွေက သူ့အာရုံနဲ့သူ ရှိနေကြတာကိုမြင်မှ မသိမသာ သက်ပြင်းချကာ ရောင်လွှမ်းကို မျက်စောင်းမမြည်သောအကြည့်လေးဖြင့်ကြည့်လိုက်မိသည်။
ဟုတ်သားပဲ။ ဝယ်သမျှအထုတ်တိုင်းကို ရောင်လွှမ်းက အားလုံးကိုင်ထားရတာကြောင့် သူ့လက်နှစ်ဖက်ထဲမှာအပြည့်ဖြစ်နေသည်။ ထိုအခါမှ အနည်းငယ်အပြစ်တင်ချင်နေတဲ့ မိုးပြေးက အားနာသွားရသည်။
"ကိုယ်ကူကိုင်ပေးမယ်လေ ရောင်လွှမ်းလေးနေတော့မယ်"
"ရတယ် မကိုင်နဲ့ ဟိုဘက်သွားရအောင် ဝယ်စရာရှိလို့"
သူ့လက်ထဲမှာ အထုတ်တွေများနေတာမလို့ကူသယ်ပေးမယ်ပြောတာကို လက်မခံပဲယောကျာ်းလေးအသုံးအဆောင်တွေရှိတဲ့ဘက်ကိုမေးငေါ့ပြတာမို့ နှစ်ယောက်သားအဲ့ဘက်ကိုရောက်သွားတော့သည်။
Shave လုပ်ဖို့အတွက်လိုအပ်တဲ့ ပစ္စည်းနဲ့creamတွေ၊ တဘက်အဖြူနှစ်ထည်သုံးထည်နဲ့ တခြားလိုအပ်မယ့်အရာတွေကို မိုးပြေးလည်း လိုက်ကြည့်နေမိသည်။
"အချစ် ကိုယ့်ကို ဟိုဟာလေးထည့်ယူပေးပါဦး"
နောက်ထပ်လူကြားထဲမှာခေါ်ခံလိုက်ရတဲ့နာမ်စားကြောင့် မျက်နှာပူလာသဖြင့် မြန်မြန်ပြီးမြန်မြန်ပြန်ရဆိုပြီး သူပြောတဲ့အရာကိုယူဖို့အတွက် လှည့်ကြည့်လိုက်မိစဥ်မှာပင် တစ်ကိုယ်လုံးပူထူသွားကာ ဘေးနားမှာမယောင်မလည်ရပ်နေတဲ့ အရောင်းဝန်ထမ်းကောင်လေးဆီကိုအကြည့်ရောက်မိသည်။ မိုးပြေးတို့ဆီတိုက်ရိုက်ကြီးတော့ကြည့်မနေပေမဲ့ ဖြစ်သွားတဲ့အခြေအနေကို ကောင်းကောင်းနားလည်နေသည့်ပုံပင်။
YOU ARE READING
နေရောင်လွှမ်းတဲ့ မိုးပြေးသဏ္ဍာန် (ေနေရာင္လႊမ္းတဲ့ မိုးေျပးသ႑ာန္)
Romanceနေရောင်ထွက်ပေါ်လာရင်မိုးတိမ်တွေဖယ်ပေးရတာထုံးစံပဲ...ခင်ဗျားနဲ့ကျွန်တော်နဲ့က ကောင်းကင်တစ်ခုတည်းမှာအတူမရှိနိုင်တဲ့သူတွေ နေရောင်လွှမ်း တစ်ခါတစ်လေကျရင်လည်း မိုးတိမ်တွေကိုနေရောင်က ဖြန့်ကျက်ထားမှ ပိုကြည့်ကောင်းတဲ့မြင်ကွင်းတစ်ခုဖြစ်သွားတာ...