ဆီမီးရောင်တို့ကို တမင်သက်သက်မှေးမှိန်ထားကာ အလင်းရောင်ရရုံလေး ထွန်းညှိထားသော နန်းဆောင်ထဲဝယ် ဘုရင်မင်းမြတ်နှင့် မဏိသိင်္ဂ သားအဖနှစ်ဦးသာ ရှိနေခဲ့သည်။ သလွန်တော်ထက်ပင် မထိုင်နိုင်ဘဲ ဟိုသည်လမ်းလျှောက်ရင်း စကားဆိုနေသူ ဖခမည်းတော်အား စိတ်သက်သာရာရစေဖို့ နှစ်သိမ့်လာသည်။
" နည်းလမ်းတစ်ခုခု ရှာတွေ့မှာပါ ခမည်းတော် စိတ်ကိုလျှော့ပါ "
" အစကတော့ တပင်တိုင်မင်းသမီးဟာ နတ်ရွာစံလွန်ကြောင်း လုပ်ကြံပြီး သားတော်ကို ကိုယ်လုပ်တော်ဖွား မင်းသားအဖြစ် တရားဝင်ခေါ်ဆောင်ဖို့ ကြံရွယ်ထားတာ အခုတော့ ခက်ပြီ "
" လက်ဆက်ပွဲကို ငြင်းဆန်ရင်ရော ဘုရား "
တိတ်ဆိတ်နေသော ညဝယ် ဘုရင်မင်းမြတ်၏သက်ပြင်းချသံက ကျယ်လောင်စွာပေါ်ထွက်လာသည်။
" သူရနရာဇ် နဲ့ လက်ဆက်ဖို့ ငြင်းဆန်ခဲ့ရင်လည်း မင်း နောင်တော်နဲ့ လက်ဆက်ရမှာပဲ သားတော် အရွယ်ရောက်တဲ့ မင်းသမီးတစ်ပါးအနေနဲ့ လက်ဆက်ထိမ်းမြားရမှာ မလွဲမသွေဘဲ "
သားအဖနှစ်ယောက်စလုံး ကြံရာမရဘဲ နှုတ်ဆိတ်သွားကြသည်။ အစီစဥ်တကျဖြစ်လုဆဲဆဲမှပဲ နဒီဝဠာတိုင်းရဲ့ အိမ်ရှေ့စံက ပေါ်လာသည်။
" ခမည်းတော် သားတော်ကတော့ ဒီလို အကြံရတယ် "
" လျှောက်တင်ကြည့်စမ်းပါဦး "
" လက်ဆက်ပွဲကို လက်ခံလိုက်ပါ ခမည်းတော် တစ်ဖက်တိုင်းပြည်ကို သွားတဲ့လမ်းမှာပဲ လုပ်ကြံမှု တစ်ခုခု ကြံစည်ပြီး တပင်တိုင်မင်းသမီးသေဆုံးကြောင်း အတုပြုလုပ်လို့ ရနိုင်ပါတယ် "
" အင်းး အသင့်တော်ဆုံးနည်းလမ်းက သည်တစ်နည်းပဲ ရှိပါရဲ့ သူရနရာဇ် မပြန်ခင် ဂရုတစိုက်နဲ့ သတိထားပြီးဆက်ဆံပါသားတော် "
" မှန်ပါ "
ခမည်းတော်နှင့်တိုင်ပင်စဥ်ကတော့ အစစအရာရာ အဆင်ပြေမည့်ပုံပင်။ နောက်ရက်မနက် သူရနရာဇ် နှင့်တွေ့ဆုံတော့မှ ထက်မြတ်လှသည့် အိမ်ရှေ့စံကို အတော်လေးသတိထားရမည်ဖြစ်ကြောင်း သဘောပေါက်လာသည်။ ပြုံးစစမျက်နှာထားနှင့် အရာရာကို ပေါ့ပေါ့ပါးပါးဖြတ်သန်းနေဟန်တူသော်လည်း စူးရှနေသည့် မျက်ဝန်းအစုံကတော့ အင်မတန်ပါးနပ်ကာ သတိကြီးသူဖြစ်ကြောင်းသိနိုင်ပေသည်။
YOU ARE READING
တပင်တိုင်နန်း..စံမြန်းလေသူ _Completed
Historical Fictionအာဏာနဲ့ ထီးနန်းတွေ ကြားက အချစ်တစ်ခု
