အနောက်တောင်စွယ်သို့ကွန်းခိုလုပြီဖြစ်သောနေမင်းသည် ပတ္တမြားနှယ်ရောင်ခြည်တို့ ဖြာကျကာ မှေးစက်ရန်ပြင်နေချေပြီ။ ကွင်းပြင်ကျယ်ထဲတွင် ဆော့ကစားနေသော ကလေးများသည် နေဝင်ချိန်ကိုပင် သတိမမူမိဘဲ အော်ဟစ်ပျော်ရွှင်နေကြသည်။ ထန်းရွက်မိုးသည့် တဲတစ်ခုထဲမှ လှမ်းခေါ်လိုက်သည့် အော်သံကြောင့် ဆော့ကစားနေခြင်းကို ရပ်တန့်ကာ တဲဆီသို့ ပြေးသွားကြသည့်ကလေးများကြောင့် ဖုန်လုံးတွေက တလိမ့်လိမ့်တက်လာပြန်သည်။
" သူငယ်တို့ အိမ်ပြန်ချိန်တန်ပြီ "
" ဆရာ ကျုပ်တို့မနက်ဖြန်လည်း လာခဲ့မယ်နော် "
ကလေးအုပ်စုထဲတွင် အရပ်ရှည်ရှည်ထွားကျိုင်းပါသည့် ကောင်လေးတစ်ယောက်ကပြောလာသည်။ဆံရစ်ဝိုင်းဝဲဝဲတွင် ဆော့ကစားထားသည့် ဖုန်မှုန့်တို့က ပေကျံနေကာ မျက်နှာထက်တွင်လည်း ညစ်ပေလျက်ရှိသည်။ ထိုကလေးတစ်ယောက်တည်းတင်သာမဟုတ်ချေ။ အခြားကလေးများသည်လည်း ထို့အတူသာပင် ညစ်ပေလျက်ရှိသည်။ ဆရာဟုအခေါ်ခံရသော သူဟာ တဲအတွင်းမှ ထွက်လာကာ ကလေးတွေကို ပြုံးပြရင်း ဆိုသည်။
" မနက်ဖြန်က ဥပုသ်နေ့လေ ရွာဦးကျောင်းကို သွားရမယ် နောက်ရက်မှ ပြန်လာခဲ့ကြ "
" ကောင်းပါပြီ "
နှုတ်ဆက်ကာ ပြန်သွားကြသော ကလေးတွေကို ငေးကြည့်ရင်း အိမ်ပြန်ရန်ပြင်ဆင်ရတော့သည်။ မှောင်ရီပျိုးစပြုပြီမို့ အလင်းရောင်မကျန်တော့သော အခိုက်ဝယ် သဲထူထူတောလမ်းထက် တစ်ယောက်တည်းလျှောက်လမ်းလာရင်း အတွေးရေစီးထဲမြောသွားသည်။
ဖခမည်းတော် နတ်ရွာစံပြီးနောက် လူသူမသိသောအရပ်မှာ ပုန်းကွယ်နေထိုင်ခဲ့ရသည်။ မင်းအသစ်ဖြစ်သော နောင်တော်ကြီးဟာ သူ့ကို အလွတ်မပေးဘဲ လိုက်ရှာမြဲဖြစ်သဖြင့် နေရာတစ်ခုတည်းမှာ အခြေမချရဲခဲ့ပေ။ သင့်လျော်သလိုရွှေ့ပြောင်းရင်း ဟောသည်ရွာငယ်ဇနပုဒ်မှာတော့ နေထိုင်ခဲ့သည်မှာ လအတန်ကြာခဲ့ပေပြီ။ရွာထဲရှိ ကလေးသူငယ်များကို စာရေးစာဖတ်သင်ပေးရင်း အေးအေးချမ်းချမ်းနေထိုင်နေခဲ့သည်။
![](https://img.wattpad.com/cover/310881576-288-k539551.jpg)
KAMU SEDANG MEMBACA
တပင်တိုင်နန်း..စံမြန်းလေသူ _Completed
Fiksi Sejarahအာဏာနဲ့ ထီးနန်းတွေ ကြားက အချစ်တစ်ခု