နိုင်ငံရပ်ခြားမှ လာသော ကုန်သည်အဖွဲ့သည် မြစ်ကို အကြောင်းပြုကာ ရောင်းဝယ်ဖောက်ကားခွင့်ပြုရန် တောင်းဆိုလာကြသည်။ မှူးမတ်တွေနှင့်တိုင်ပင် ဆွေးနွေးကြသည့်အခါမှ အမြင်ကလည်း အမျိုးမျိုးထွက်လာခဲ့သည်။
" အရှင့်သား သည်လူမျိုးခြားတွေမှာ ဘယ်လိုအကြံအစည်တွေရှိနေမလဲ မသိနိုင်ပါဘူး ဘုရား "
" ဗြဲတိုက်ဝန်ရေ ကုန်စည်ကူးသန်းမှုဟာ တိုင်းပြည်ရဲ့ စီးပွားရေးအတွက် အကျိုးများစေပါတယ် "
" မှန်ပါတယ်ဘုရား ကျွန်တော်မျိုးကတော့ အခွန်ဝန်မင်းရဲ့ စကားကို ထောက်ခံပါသည်ဘုရား ကမ်းစပ်ကို ဆိုက်ကပ်လာသည့် လှေ သင်္ဘောတွေကို အခွန်အခ ကောက်ခံလို့ရပါမယ်ဘုရား၊ ဆိပ်ကမ်းအနီးနားမှာရှိသည့် ပြည်သူတွေအတွက်လည်း လုပ်ကိုင်စားသောက်ဖို့ အခွင့်အရေးရလာမှာပါဘုရား "
ခမည်းတော်ဘုရား ကတော့ နိုင်ငံခြားကုန်သည်တွေနှင့်ပတ်သက်သမျှကို သူ့ထံတွင်သာ လွဲအပ်ထားပေသည်။ ခြုံငုံသုံးသပ်ကြည့်လျှင် အကောင်းသာ ရှိမည်ဆိုပေမယ့် မသိမသာကပ်ပါလာနိုင်သည့် အန္တရာယ်ကိုလည်း ထည့်တွက်ရသေးသည်။ နန်းတော်မှ ပြန်အလာ ဝေါယာဥ်ထက်တွင်လည်း ကုန်သွယ်မှု အကြောင်းကိုသာ စဥ်းစားလို့နေခဲ့ရာ အိမ်တော်ရှေ့ထိ ရောက်လာသည်ကိုပင် မသိလိုက်ရ။ အခြွေအရံတွေကို ဦးဆောင်ကာ ဆီးကြိုနေသော သိင်္ဂကိုပင် သတိမထားမိ။ လက်ကို ဆုပ်ကိုင်လာမှသာ သတိပြုမိတော့သည်။
" အမောင် ဘာကိစ္စများရှိနေပါသလဲ "
အိမ်ရှေ့စံအိမ်တော်အတွင်း၌မူ သိင်္ဂသည် အမျိုးသားဝတ်စုံကိုသာ ဝတ်ဆင်တတ်ပြီး ဆံနွယ်တွေကို ထုံးနှောင်ခြင်းမရှိ ဖျားလျားချထားလေ့ရှိသည်။ ယခုလည်း နက်မှောင်နေသော ကေသာကျော့ကို အမှတ်တမဲ့ ငေးကြည့်မိပြန်သည်။.
" အဆောင် တော်ထဲ အရင်ဝင်ကြရအောင် သိင်္ဂရယ် "
အခြွေအရံများကလည်း အလိုက်တသိ အပြင်ဘက်တွင်သာ ကျန်နေရစ်ခဲ့ကြသည်။ ဆုပ်ကိုင်ထားသည့် လက်တွေကို မလွှတ်ပါဘဲ သလွန်ထက်ဝင်ထိုင်လိုက်ပြီး သိင်္ဂကိုပါ ဆွဲချကာ ရင်ခွင်ထဲ ပွေ့ချီထားလိုက်သည်။
YOU ARE READING
တပင်တိုင်နန်း..စံမြန်းလေသူ _Completed
Historical Fictionအာဏာနဲ့ ထီးနန်းတွေ ကြားက အချစ်တစ်ခု
