Compatible Pheromones |TK|✓

Chapter 30

(Unicode)

နောက်တစ်ရက်တွင် သူတို့အားလုံးသည် တောအုပ်၏အတွင်းပိုင်းသို့ဝင်ကာ လှပသည့်နေရာများ၌ ဓာတ်ပုံရိုက်ဖြစ်ကြသည် ။ ထယ်ယောင်းနှင့်ဂျောင်ကုတို့သည်လည်း အသေးလေး၏အကူအညီဖြင့် မြောက်များစွာသော အမှတ်တရပုံတို့ကိုရိုက်ယူခဲ့သည် ။

ထိုနေ့တစ်ရက်ပျော်ပါးပြီးသည့်နောက်တွင် သူတို့သည် ကျောင်းသို့သာပြန်လာခဲ့ကြသည် ။ နဂိုက နှစ်ညအိပ်သုံးရက်ဟူသည့် အပန်းဖြေခရီးသည် တစ်ညအိပ်နှစ်ရက်ဖြစ်သွားတာကြောင့် သူတို့အားလုံး ငြီးငြူမိကြသော်လည်း လုံလုံလောက်လောက်အပန်းပြေခဲ့ပြီမို့ ဆရာယူပြောသလိုပင် ပြန်လာခဲ့ကြသည် ။

ညနေခြောက်နာရီခန့်တွင် သူတို့အားလုံး ရှင်းဟွာကျောင်းသို့ ပြန်ရောက်လာကြသည် ။ တစ်ချို့သော ကျောင်းသူ၊ကျောင်းသားများကတော့ အိမ်မှလူကြီးများကလာကြိုသွားကြပြီး ထယ်ယောင်းတို့ကဲ့သို့ အဆောင်နေကျောင်းသားများကတော့ ကျောင်းအိပ်ဆောင်ကိုသာသွားလိုက်ကြသည် ။

အဆောင်သို့ပြန်ရောက်သည်နှင့် ထယ်ယောင်းသည် အထုတ်များကိုပစ်ချကာ ကုတင်ပေါ်သို့ပစ်လှဲလိုက်သည် ။ နာရီအတော်ကြာ ကားစီးလာရသည်မို့ တစ်ကိုယ်လုံးကညောင်းညာနေသည် ။ ထို့ကြောင့် ခဏတာအနားယူပြီးနောက်တွင် ရေနွေးနွေးလေးဖြင့် ရေချိုးလိုက်သည် ။ ရေချိုးပြီးနောက်တွင် အပန်းဖြေခရီး၌ဝတ်ခဲ့သည့်အဝတ်များကို အထုတ်ထဲမှထုတ်ကာ လျှော်ဖွတ်ရမည့်အဝတ်ထုတ်နှင့်ရောထည့်လိုက်သည် ။

အပန်းဖြေခရီးထွက်ခဲ့စဉ်က ဝတ်ခဲ့သည့် အနွေးအင်္ကျီ၏အိပ်ကပ်ကို စမ်းကြည့်မိသည့်အခါ ဂျောင်ကုကိုပေးမည်ဟု ရည်းမှန်းထားသည့် ဝေလငါးပုံဆွဲကြိုးလေးကိုတွေ့လိုက်ရသည် ။ နှစ်ယောက်သား အိပ်မပျော်၍ ကြယ်များကြည့်ခဲ့သည့်ညက ပေးမည်ပြုထားသော်လည်း စကားကိုသာအများကြီး ပြောခဲ့ကြတာမို့ ပေးဖို့ရန်မေ့သွားခဲ့သည် ။

ထို့ကြောင့် ထယ်ယောင်းလည်း ဂျောင်ကုအားဆွဲကြိုးပေးရန် ဂျောင်ကုအခန်းရှေ့သို့သွား၍ တံခါးခေါက်လိုက်သည် ။ ထယ်ယောင်းတံခါးသုံးချက်ခေါက်ပြီးသည့်အခါ ဂျောင်ကုက တံခါးဖွင့်လာသည် ။