“လရောင်လေး လာတယ်”
လရောင်သသ ကားပေါ်က ဆင်းလိုက်တာနဲ့ ချက်ချင်းပင် မမဆွေ၏ အသံကိုကြားလိုက်ရသည်။ရုံးပိတ်ရက်ဆိုရင်တောင် အိမ်မှာရှိလေ့မရှိတဲ့လူကြောင့် လရောင်တို့ ကိုနေနဲ့ကြီးကြီးနဲ့အတူ ကျေးဇူးတင်ကြောင်း လာပြောဖို့ကို ရုံးဖွင့်ရက်ရဲ့ မနက်အစော ခုနစ်နာရီလောက်ကြီး ထွက်လာခဲ့ရတာဖြစ်သည်။
“မမဆွေ သူရှိသေးတယ်မလား”
“ရှိသေးတယ် လရောင်၊သခင်ကြီးလည်း ပြန်ရောက်နေတယ်”
“ဟင် ဖိုးပြန်ရောက်နေတယ်ဟုတ်လား”
“ဟုတ်တယ် ဟိုတစ်နေ့က မမလေးဇူးဇူးမေသော်ရောက်လာပြီး အကြောင်းစုံကိုသိတော့ အကိုလေးအံ့ကျူးကိုတောင် ဆူနေတာ။သခင်ကြီးကိုလည်း သူခေါ်လိုက်တာထင်ပါတယ်။ အိမ်ထဲကို ကြွကြပါအုန်းရှင့်”
မမဆွေက လရောင်ကို ရှင်းပြနေရင်းကနေ ကိုနေနဲ့ကြီးကြီးကိုလည်းခရီးဦးကြိုပြုသည်။
လရောင် ကိုယ်ကြီးပြင်းခဲ့တဲ့နေရာကို ပြန်လာရမှာကိုပင် အပြစ်ရှိသလိုခံစားနေရ၍ နေ့ရွှေ့ညရွှေ့လုပ်နေခဲ့တာ တစ်ပတ်ခန့်ပင်ရှိပြီဖြစ်သည်။
ဧည့်ခန်းမှာ ဖိုးက သတင်းစာတစ်စောင်ကိုင်ထားပြီး ခြေချိတ်ကာ အေးအေးလူလူထိုင်နေသည်။လရောင်တို့ တူဝရီးသုံးယောက်ဝင်သွားတော့ မျက်ခုံးနှစ်ဖက်မြှင့်တက်သွားပြီး သတင်းစာကိုချကာ လှိုက်လှိုက်လှဲလှဲပင် ပြုံးရှာသည်။
“လရောင်လေး”
“ဖိုး...လွမ်းနေတာ အင့်”
လရောင် ဖိုးကို အတင်းပြေးဖက်ထားမိသည်။ငယ်ငယ်လေးကတည်းက အဖေလိုရောအမေလိုပါ စောင့်ရှောက်လာခဲ့တဲ့ ဖိုးရဲ့ရင်ခွင်က လရောင်အတွက်တော့ အမြဲတမ်းနွေးထွေးသည်။ဖိုးက Aussie မှာသွားနေတဲ့ လတွေအတွင်းမှာ ဘာမှပြောင်းလဲမသွား။စိတ်ချမ်းချမ်းသာသာနဲ့နေရ၍ ထင်သည်။ပိုပြီး အသားအရေစိုပြေလာသည်။
“ထိုင်ကြပါအုန်းကွယ် မိဆွေရေ ဧည့်သည်တွေကို ဧည့်ခံပါအုန်းဟဲ့”
ဖိုးက လရောင်ကို ရင်ခွင်ထဲထည့်ကာ ခေါင်းကိုဖွဖွပွတ်လျက်နှင့်ပင် ကိုနေတို့၊ကြီးကြီးတို့ကို ဧည့်ဝတ်ပြုသလို မမဆွေကိုလည်း ညွှန်ကြားနေသည်။
أنت تقرأ
My possessive of you
العاطفية{Own creation}❀ Love story between possessive type bad boy and fragile boy. Art : Leo Start date : 14.9.2022 End date :
