الزّبرقان "غرور الأثمد"

Part 3

البارت الثالث .

بسَم الله الرحمٰن الرحيم
اللهُم مصلِي على مُحمد وآل مُحمد

قراءة مُمتعة الكُم 🤍..
لا تنسون التصويت + التعليق بين الفقرات + مُتابعة الحسابي .

ما مرتاحَ الحِزن نفس الحِزن
والجاي نفس الراح ..
<________________________>

غمضت وأنا أشوف طيف جدو من بعيد وهو لابس ابيض ويبتسملي ابتسامة بشوشة .. من بعدها غمضت وما حسيت بشيء

بعد فترة كعدت صار بأذني صوت الاجهزة عرفت أنا بالمستشفى
تمنيت بوقتها لو ميتة وما فاتحة عيوني وراجعة للضيم ، فتحت عيوني بهدوء باوعت وين موجودة ؟

بغرفة بيضة وبصفي الممرضة تفحص المغذي حچت وهيّ ترتب بالأشياء إلليّ يمي ..

- الحمدلله علىٰ السلامة حبيبتي

هزيتلها راسي بدون لا اجاوبها لان ما گدرت احجي اشرتلها بـإيدية علىٰ حنجرتي يعني ما جاي اگدر احچي صوتي ما يطلع !

- طبيعي حبيبتي حنجرتج شوي تعبانة

تقربت يمي وحجت بهدوء

- الگدمَات الليّ بجسمج مو طبيعة واضح متعرضة للضرب اذا متعرضة التعنيف احجي اگدر اساعدج لا تخافين !

هزيتلها راسي نافية هذا الشيء وأنا ببالي اندمهُم علىٰ كلشي سووا بحقي اعرف الشرطة حتىٰ لو حجيت ما راح تسوي شيء وترجعني عليهم مُجتمعنا الليّ ما ينصف الحق 

رجعت أردفت الممرضة

- لا تخافين حبيبتي احجي أگد..

بعدها تحجي  ودخل ياسين للغرفة كامت الممرضة من يمي وطلعت تقرب ياسين كعد مقابيلي علىٰ الكرسي درت وجهي عنة ما طايقتة ولا طايقة احد بيهم 

ياسين :- ترىٰ مو أنا الكاتلچ حتىٰ هيج تباوعين وبعدين لو ما غلطانة أيمن ما يمد ايدة عليج

باوعتلة بصدمة يعني هسة أنا صرت غلطانة ! ماكدرت احجي صوتي ما يطلع احس اريد اصرخ بوجهة وارزلة ادافع عن روحي بس كل هذا بدون فايدة !

طلعت من المستشفىٰ بعد ما خلص المغذي الممرضة كالت كم يوم يلا يرجع صوتي طبيعي وارجع احجي ، ضحكت علىٰ نفسي كالعادة محد يمي لا أهل ولا عمام بيهم حظ وخوالي ماعرفهم  اصلًا ولا عمري التقيت بيهم

رجعنا للبيت والطريق كله افكر واتوعد الهم علىٰ سوايتهم هاي كارهتهم كره مو طبيعي خصوصًا راس الحية ذيچ فتح الباب ياسين ودخلنا بالمطبخ جانت فرح واگفة اول ما شافتني كلبت عيونها وحجت ويا ياسين