الحلقه ال٩ ج٣
كان كله نايم وهما قاعدين في الأوضه بتاعتهم
مسك اديها بحب وقال: فاكره اول رمضان كان لينا مع بعض
ابتسمت وقالت: اه كنت يوم ما نزلنا اول مره مع بعض نجيب حجات رمضان...
ضحكت وقالت: يوم ما فضحتك في البلد كلها...
ضحك وقال: وده يوم يتنسي...
فلاش باك..
كان واقف وهي جامبه وماسكه دراعه وبتقول: زود يا ليل الزبيب والسوداني انا بحبهم
ليل: اسكتي يا بت فضحتيني
بصت للبايع وقالت: بكام الكيلو من عين الجمل يا عمو
ابتسم على طريقتها وقال: ب ربعميت جنيه يا بنتي
بصت ل ليل اللي قال: ربعميت ايه دول ليه عين مين دي
سلمى: عين جمل يا ليل
ليل: حط يا عم محسن الزبيب والسوداني قبل ما اتشل وخليني امشي
ضحك الراجل وقال: من عنيا يا عمده...
بصت على العيال اللي بيولعوا سلك وبيلعبوا بيه... بصت ل ليل اللي انشغل بدفع الفلوس واتسحبت وقربت منهم وقالت: ممكن العب معاكم..
بصولها العيال ولأن شكلها صغير من طولها وملامحها وافقوا...
ولعت السلك وقعدت تلفه وعملت شراره كتير ونطت بسعاده وكل الناس كانوا بيبصوا عليها...
عند ليل..
ليل: بقولك يا حبيبتي اجيب كام واحده قمر الدين وكام كيلو تمر
مسمعش صوتها لف واتصدم لما مشفهاش خاف وبص بعينه عليها واتصدم وهو شايفها بتلعب بالسلك مع العيال...
حس انه هيتشل وقرب منها ومسكها من هدومها وقال: بتعملي ايه يا بت الهبله اي الجنان اللي عملاها ده
بنت صغيره قالت: سبها يا عمو تلعب معانا شويه
ليل بصدمه: اسيب مين يا حبيبتي دي انتي عارفه دي عندها كام سنه
البنت: ايوة دي اربعتاشر سنه
انفجرت في الضحك على ملامحو وهو مسكها من هدومها وقال: دي مش اربعتاشر سنه دي 25 سنه يا حبيبتي وعندها عيل في سنك
بصوا الأطفال ليها بصدمه وهي قالت بتمثيل الحزن: كده يا ليل بتقولي في وشي كده اني كبرت... وكمان فهد لسه مكملش الست شهور على بعض...
مسكها من هدومها ومشيوا...
ليل: اي الجنان ده تبقي مرات ليل وتلعبي مع العيال في الشارع
سلمى: وفيها اي انا لما ببقى عند ماما بجيب صواريخ واسلاك وبديهم للعيال في الشارع وبلعب معاهم..
تنح وقال: هو انا متجوز عيله عندها خمس سنين...
سلمى: اذا كان عجبك وكملت بتمثيل الحزن: انت بتكلمني كده ليه ده انا حتى لسه والده وجبتلك الولد اللي انت عاوزه اهيء اهيء
عقد حواجبه وقال: كويس انك مجبتيش البت كانت هتبقى هبله زيك.. وكمل بتأثر: انا ظالم فعلا يا حبيبتي انا اسف حقك عليا...
سلمى: هاتلي صواريخ وسلك وانا هسمحك..
ضربها على راسها بخفه وهزار وقال: يلا يا هبله..
سلمى بضحك: مش بذمتك انت بتحبهم
ليل بحده: امشي يا بت...
باك..
كانوا بيضحكوا على ذكرياتهم
سلمى ببسمه: مش بذمتك كانت ايام حلوة...
ليل: اه والله... الولاد كبرونا بدري شكلنا استعجلنا وجبنا العيال بدري
ضربته في كتفه وقالت: كله بسببك...
حط ايده على وسطها وقال: بقولك ايه...
سلمى بتوتر: ايه..
ليل: رمضان بكره فخليها اخر مره الشهر ده بس...
حركت دماغها بالرفض وقالت: تؤتؤ معلش...
ليل وهو بيقرب اكتر: ليه بس خليها انهارده بس واوعدك مش هعمل كده تاني
حاولت تبعد لكنه مسكها وهي قالت بخجل: ما انت مش هتعمل كده تاني عشان رمضان بردو...
ليل: ما تخلصينا بقى بقالنا سنين السنين ماشاء الله يعني مع بعض عدينا المراحل دي
بعدت شويه وقالت: معلش بلاش المره دي..
قرب اكتر وقال بضحك: مش بمزاجك علفكره..
غمضت عنيها من لمساته ومن قربه منها ومره واحده دخل ولادهم التلاته وهما بيتخنقوا على الفوانيس...
انتفض الاتنين وهي عدلت شعرها بإحراج وحطت اديها على وشها وهو اضاياق وبصلهم بشر وقال: نعم في ايه ودخلتوا من غير ما تخبطوا ليه مش انا قايل الاوضه دي محدش يقرب منها لما ابقى فيها انا وماما...
تايم: يا بابا ده اخد الفانوس بتاعي..
تميم: لاء مش انا ده تيام..
تيام: اسكتوا شويه وكمل بنبره شماته: ده احنا شكلنا دخلنا في وقت كده غير مناسب وضحك وقال: احسن.. احسن..
مسك حزامه ولفه حولين ايده وقال: والله لأوريكم يا جذم...
طلعوا يجروا وهو قفل الباب بغضب ورمي الحزام على الأرض وقال بغضب: انا عارف مش هيحصل حاجه انا عارف...
بص عليها لقى اديها على وشها من الكسوف اتنهد وقال: محصلش حاجه مش اول مره يشفونا كده...
سلمى وهي بنفس الوضعيه: اسكت.. اسكت انت مشفتش بصولنا ازاي
ليل: عادي يعني...
سلمى: امشي يا ليل اطلع بره سبني في حالي
ضحك واتحرك نحية الدولاب وطلع البوكس اللي على شكل فانوس وقعد جمبها وقال: طب بصي طيب..
سلمى: لاء
ليل: بصي بس..
بصتله وقالت: نعم..
اداها البوكس وقال: اي رأيك في المفجأة دي
ابتسمت وقالت: ده عشاني انا..
ليل: ايوة طبعا عشانك اومال عشان مين يعني...
حضنته وقالت؛ انا بحبك..
ليل: وانا كمان بحبك... وهمس: طوعيني بس واسمعي الكلام
اتكلمت بنفس طريقته وقالت: لاء يا عم خلينا حلوين كده
اتنهد وقال: تمام يا سلمى...
بعد تلت ساعات...
على وقت السحور...
كان نايم كله الا هي بصت ل ليل اللي نايم جمبها وحضنها كالعاده
ابتسمت وبصت للإزازه اللي جمبها وابتسمت بشر.. قامت ومسكت الازازه وكبتها عليه
ليل بخضه: الحقوني بغرق... غريييق...
انفجرت في الضحك على شكله وهو استوعب اللي حصل...
ليل: بقى كده تعالي...
قام جري وراها وهي طلعت تجري وهو وراها مسكها وشالها وقال: بقى كده يا بت تعملي فيا كده
سلمى بضحك: المقلب حكم..
ضحك وحطها عالسرير وحط دماغه على رجلها وقال: الساعه كام
سلمى: واحده..
ليل: طب قومي نحضر السحور سوا ونصحي الجذم الاربعه..
سلمى: حاضر..
قاموا الاتنين وهو قال: روحي صحي العيال عشان نكون مع بعض..
سلمى: حاضر..
دخلت اوضه فهد وقربت منه وقالت: فهد حبيبي اصحى يلا...
فتح عيونه بإرهاق وقال: سبيني يا امي عاوز انام
سلمى: طب اتسحر ونام...
بص في الساعه وقال: اتسحر الساعه واحده...
سلمى: ايه يا حبيبي مش عاوز تعلق الزينه معانا...
شد اللحاف وقال: طب عشر دقايق..
سلمى: دقتين وتبقى في الحمام...وطلعت...
راحت اوضه التلاته اللي كل واحد نايم نومه اغرب من التانيه قربت من تميم وعمل زي فهد وتايم وتيام كذلك...
طلعت وقفت في نص الشقه وبصت ل ليل اللي قال:الخطه التانيه ابتسمت وقالت بصراخ: يلهووييي الحقوني... اه.. اه بولد
جريوا الاربعه عليها وهي قالت: دقتين وتبقوا في الصاله عشان نعلق الزينه... مسحوا على وشهم بضيق...
بصت ل ليل اللي كان بيضحك وقربت تساعده في المستلزمات بتاعت رمضان
ليل: احط دي فين
سلمى: في التلاجه وشاورت على اكياس البلح: ودول في دولاب المطبخ
بعد وقت..
جه الاربعه وقعدوا قدامهم وبصولهم وهما بيرصوا الحاجه...
تيام: مادام احنا مش هنعمل حاجه مصحينا ليه
ليل بهدوء: وانا قدكم وحتى لما اتجوزت كان جدكم سليمان بيجمعنا كلنا عشان نعلق الزينه معاه وبيعيشنا الجو ده معاه وانا عاوز اعيشكم الجو ده عشان لما تكبروا وتتجوزوا ويبقى عندكم عيال تعملوا كدا وتفتكروا الذكريات دي
قرب منهم ومسك ايد تميم وقال: ديب فريزر فكها عشان مديكش كف اتففك سنانك..
تميم: احمم حاضر..
قعدوا كلهم على الكنبه وبدأوا يرصوا الحاجه في كراتين
سلمى: تعرفوا بابا لما كنا في الصعيد كان بيعمل كدا هو واخواته
ليل بضحك: ههه وامكم كانت لما بتبقى مش طيقاني كانت بتبوظ اللي بعمله
ضحكوا وهي قالت: بس ده ميمنعش اني كنت بحب اغيظك واني حبيتك اكتر ما بحبك واثبتلي انك راجل وحنين بجد واستحملتني وفضلت ومازلت مستحمل قرفي وهرموناتي...
ساب اللي في ايده ومسك اديها بحب وقال: انتي حياتي كدا كدا
بصتله برمانسيه ونظرات حب ونسيوا وجود ولادهم اللي متبعنهم ابتسم كلهم عليهم ماعدا تايم اللي عدل نضارته بإحراج وقال بتعلثم: في ايه يا جماعه لاحظوا اننا قاعدين... ده حتى رمضان بكره استغفر الله العظيم...
بصتله برفع حاجب وقالت:انت مالك ياض ملكش دعوه..
ابتسم تايم وقال وهو قاصد يضايقها: يا ماما انتو كبرتوا على الحجات دي والرومانسيه دي..
اتسعت عنيها وكتم ليل ضحكه وقال: امك كبرت عيب عليك ياض ده اللي يضوفها يقول عليها اختكم انتو ناسين لما راحت توديكم المدرسه وقالولها اتفضلي قولي اسمك عشان تدخلي الفصل...
انفجروا في الضحك وهي بصتلهم بغيظ...
مسك فهد كفها وقال: احلى ام يا ناس...
ابتسمت ليه وليل بعد ايد فهد من اديها واخدها تحت كتفه وقال: حصل يا فهد امكم دي اصغر منكم انا لما بمشي جمبها بيحسبوها بنتي.. ضحكت عليه ولعبت في شعره وقالت: يا بكاش انت..
ضحكوا كلهم وكملوا عملهم...
بعد وقت...
دخل ليل وسلمى المطبخ لقوا تايم وفهد بيعملوا السحور ضحك ليل وقال: لاء والله شيف يا مفجوع انت وهو
تايم؛ طب دوق كده يا بابا وشوف
اخد حته عيش وداق بيه الفول اللي عمله تايم
ليل: الله تحفه اوي... تسلم ايدك يا حبيبي...
بصله فهد بغيره وقال: ايوة طبعا قول كدا...
ضحك ليل وقرب من فهد وحط ايده على كتفه وقال: وانت عملت ايه بقى..
فهد ببسمه: عملت طبق بيض مقلي هيعجبك اوي
سلمى: عالسحور مش هنعطش كدا..
خبطها ليل وقال: وماله يا حبيبتي وماله انا بحبه وهاكله انا...
فهمت وبصت لفهد اللي باصص ل ليل ببسمه داق الأكل وابتسم وقال: طعمه حلو اوي...
بصت للأكل بقرف وليل قال: ده احنا مخلفين شيفات
سلمى ببسمه: طالعين زي ابوهم يا حبيبي
مد ايده بلقمه وقال: دوقي كدا
بصت للأكل وطلعت تجري وهو استغرب...
فهد: هي ماما ملها هو اكلي وحش
ليل: لاء طبعا تلاقي معدتها وجعاها ولا حاجه...
عند تميم وتايم..
تايم: اخيرا خلصنا..
وقف تميم وبص للزينه اللي عملوها في الشقه وقال: والله احنا عالميين
ضربوا الاتنين كفهم بكف بعض وجريوا عند اخواتهم...
تميم: بابا وماما فين
فهد: ماما في الحمام وبابا مستنيها..
تيام: شوفتوا احنا عملنا اي الشقه بقت حلوة اوي..
تايم: اي رأيكم نعمل هدايا لأهلنا وجيرانا واصحابنا..؟؟
فهد: طب والله فكره حلوة... عندكم افكار
تيام: احنا طلبنا من بابا يجبلنا فوانيس صغيره فهو جبلنا فساتين صغيره خالص شكلها حلو اوي ... هنلفها ومعاها تلت تمرات وورقه صغيره مكتوب عليها رمضان مبارك وكلمات تشجيعيه وشوكلاتات صغيره كدا ونحطهم في صندوق صغير ونديهم للعيله ولأصحابنا ونوزعها على الجيران...
فهد: تمام حلو...
تيام: انا اللي هكتب على الورق
تميم: وانا هزين الصناديق الصغيره بورق التزين
قعدوا يتكلموا بحماس واتحركوا على اوضه فهد ومش واخدين بالهم باللي وراهم وبياكل الأكل...
عند ليل وسلمى...
طلعت من الحمام وعلامات التعب على وشها سندها وقال بلهفه: مالك يا حبيبتي ايه حوار الترجيع ده...
مسكت في هدومه وضغطت على صدره وقالت: مفيش ده طبيعي...
بصلها شويه وقال: متأكده
سلمى:اه..
ليل: طب تمام... حطت دماغها على صدره وغمضت عنيها وهو ضمها بحنان...
سلمى: هي الساعه كام..
بص على الساعه اللي على الحيطه وقال: بقت تلاته ونص هي لحقت...
بعدت بسرعه وشهقت وقالت: هي لحقت ده يادوب ناكل يلا يا ليل خد شنط رمضان وحطهم جمب الباب عشان توزعهم بكره مع الولاد وانا هروح اساعد العيال على السحور...
وكانت لسه هتمشي مسك اديها وقال: انتي مش هتعملي حاجه خالص انتي هتقعدي وترتاحي والاكل هيجي لحد عندك
سلمى: بس انا كنت عاوزه اعمل السحور
ليل: مش هتعملي حاجه لحد ما اطمن عليكي... وباس دماغها
ابتمست وقالت: تمام يا حبيبي...
شلها وحطها عالكنبه وقال: هروح اعملك طبق فول مكلتيش منه قبل كده
ضحكت برقه وقالت: تمام يا حبيبي...
دخل المطبخ واتصدم لما شاف تايم نايم بعمق وجمبه الأطباق فاضيه واولاده مش موجودين واكتشف انهم في اوضه فهد...
ضرب ليل على صدره زي الستات وقال بزعيق: تيااااااااامممم
من صوته جه كله على صوته
انتفض تايم برعب وقال: اي اي...
سلمى بلهفه: ماله يا ليل الواد ماله
بصت لتايم اللي واقف وفاتح عينيه برعب قربت منه وقالت بلهفه: مالك يا حبيب ماما انت كويس
مسك السكينه وقال: هموتك دلوقتي يا قلب ماما
بص فهد وتيام وتميم للأطباق وبصوا بعديها لتايم ففهموا اللي حصل سلمى بإستغراب: في ايه يا ليل...
شاور على الأطباق وقال: الأستاذ عمل السحور واتسحر ونام ونسي انه عايش مع بشر هنا...
بصت للأطباق وبصت لتايم وكتمت ضحكها وحاوطت تايم خوف من ليل وقالت: اهدى يا ليل الواد خايف.. احنا هنتسحر اي حاجه
ليل بغضب: اتحركتي ليه مش انتي تعبانه...
سلمى: ده الجيران صحيت من صوتك حرام عليك...
حرك راسه وهو في حضنها وقال: ايوة انا خايف
ضربته في راسه وقالت: اسكت ياخويا دلوقتي بدل ما يخلص عليك..
ليل بغضب وغيره: اطلع من حضنها وانتي ابعدي عنه
مسكت ابنها اكتر لما ليل قرب وليل شدها وبعدها عنه وقال: يلا روح يا تميم طلع العيش وحطوا عالسفره وانت يا فهد حط الجبن في اطباق وحطها على السفره وانت يا مفجوع يا ابن المفجوع اعملي كوبايه شاي....
طلعوا بسرعه ينفذوا الأوامر وليل بصلها بشر وهي قالت بتعلثم: طبعا انا لو حلفتلك بإيه اني مكنش قصدي اعصي كلامك مش هتصدقني
ليل بهدوء مرعب: عالأوضه أستنيني جايلك
سلمى: لاء والنبي انا اسفه خلاص...
شلها وحطها على كتفه وقال: ده انا هنفخك بقى تحضني غيري وتعصي كلامي وقومتي وانتي تعبانه...
ضحكت وقالت: طب نزلني طيب وانا هصالحك...
حطها على رخامة المطبخ وقال:طب اتفرجي عليا وانا بعمل الأكل
ابتسمت وقالت: فاكر لما عملتلي اكل واحنا في اليخت
ليل: يوم ما نكدتي عليا
ضحكت وقالت؛ معلش بقى ما انا بغير عليك مش جوزي
قرب منها ولسه هيقرب دخل تايم وهي ضحكت على ملامح ليل
اخد تايم التوابل عشان يحطها على السلطه اول ما شافه ليل خلع شبشبه وضربه على راسه
تايم بألم: ااااه يا ليل بقى..
حرك السكينه قدام وشه وقال: اخرس ياض بدل ما انفخك...
طلع يجري وهي ضحكت وهو قال: بيجوا في وقت مهم
ضحكت وقالت: طب يلا عشان نلحق نتسحر..
بعد وقت...
كانوا قاعدين بيتسحروا وهي بتبصلهم بسعاده
قبل الأذان بربع ساعه...
قعدوا يشربوا الميه بشراها
ليل: بس يا ابني انت وهو كفايه ميه
سلمى بضحك: بيفكر بنفسي وانا صغيره كنت اقعد اشر في ميه لحد الاذان ما يأذن واقعد طول اليوم ادخل الحمام...
ضحكوا كلهم...
على الأذان...
كان قاعد ليل وحواليه ولاده وقال: اهم حاجه النيه في الصيام مفيش صيام من غير صله عشان تعرفوا واهم حاجه تقولوا الدعاء ده " اللهم اني نويت صيام رمضان كاملا فأعني على شكرك وحسن عبادتك "
رددوا وراه وهي قالت: انا عملالكم مفجأة...
بصولها بإهتمام وهي طلعت فانوس كبير اوي مكتوب عليه أساميهم كلهم وفي أخر الفانوس بجانب أسامي الولاد كان مكتوب خمسه ليل
انفجر ليل في الضحك وقال: خمسه ليل...
سلمى: اه دول واخدين كل حاجه منك مفيش حد جبر بخاطري وطلع شبهي
ليل بمشاكسه: سهله جدا اجبلك واحده شبهك
احمر وشها خجلا وهما ضحكوا عليها...
ليل بضحك: طب يلا قوموا اتوضوا بسرعه والبسوا جلاليبكم وانتي يا حبيبتي البسي الأسدال الجديد بتاعك وهاتوا المصليات والمصحف بتاعكم...
بعد وقت...
كان بيفرش ليل وفهد السجاجيد جمب بعض
كانوا واقفين كلهم الا هي
ليل: هي امكم فين
تميم: دخلت الأوضه تتطلع الأسدال من سعتها...
قام وراح الأوضه لقاها نايمه وتحت البطانيه
ضحك وقرب منها وقال: حبيب بابا يلا قومي نصلي
سلمى بنوم: سبني يا بابا انام شويه
ليل: جايه تكسلي دلوقتي ما انتي صاحيه من ساعتها
سلمى: اصل السرير مغري اوي
ضحك وقال: طب قومي يلا
سلمى بنوم: تعالى وخدني في حضنك
ضحك وقال: يا بت احنا في رمضان... طب قومي يلا
مردتش وهو قال: هسبقك درجه في الجنه ومش هنبقى مع بعض
ابتسمت وقالت؛ حاضر...
بعد وقت...
كانوا قاعدين على السجاجيد بعد ما صلوا وقال: دلوقتي هنخلص تسبيح ونقرا آيه الكرسي زي ما عودتكم عشان اللي بيقراها بعد كل صله مفيش حاجه هتفرق بينه وبين الجنه غير الموت عشان كده هنقولها بعد كل صله... يلا امسكوا مصاحفكم بعد ما تقروا الآيه...
بعد وقت..
ليل: تقبل الله يا حبايبي
صاح تيام بصوت عالي: اي رأيكم في الشقه...
ليل: ماشاء الله يا حبايبي تسلم ايديكم
تميم بصوت واطي: بابا وطي صوتك ماما نايمه
بص على دماغها اللي على كتفه وهو كان حاسس بيها ابتسم وشالها وقال: يلا يا شباب كله على اوضته ينام عشان تصحوا على الضهر تذاكروا وتعملوا الفطار مع ماما...
تميم: لاء يا بابا احنا قاعدين هنعمل هدايا للعيله والجيران ولصحابنا
ابتسم وقال وهو شايل سلمى: طب خلاص هنام انا وماما عشان يومنا طويل بكره..
كان هيدخل الأوضه وقفه صوت تيام اللي قال: احنا في رمضان يا بابا هاه واخد بالك...
ضحك وكان هيشتمه قال: اللهم اني صايم استغفر الله...
اخذوا يعدوا الهدايا بسعاده غامره
يتبع...
السلام عليكم.. 💕🌺
رمضان مبارك عليكم💕🌺🌜
اسفه على التأخير كان المفروض تنزل اول يوم رمضان بس انشغلت في الدراسه شويه وبأجواء رمضان 🌜😂
مستنيه رأيكم في الحلقه والروايه عموما وبقيت الروايه التانيه وكل سنه وانتم طيبين 🌜🌺
YOU ARE READING
عشقني ليل الصعيد
Romanceنظل ما بين تلك الحرب القويه ما بين مشاعرنا... لم يتوقعا ان يقعا في عشق بعضهما البعض... بعد قسوة وزواج مجبران عليه تحولا الى عاشقين لا يستطيعا ان يتفرقا او يتخلوا عن بعضهما البعض...، كانا يظنان انهما في طريق طويل مظلم لا نهايه له... حتى تقابلا هي ذاق...
