Breaking the Rules (Mondragon Series #3)

Chapter Sixty

Chapter Sixty

Eliz

"SOBRANG DAMI pala ng tao!" Tila nalululang sabi ko habang sinisilip ang event hall mula dito sa likod ng kurtina kung nasaan kami ngayon, sampu pa ng ilang curator at artist na kasama rin ang gawa sa naka-display sa labas.

Ilang minuto na lang ang natitira bago opisyal na magsimula ang event na magsisimula sa mga usual event innuendos na susundan ng ribbon cutting.

Balita pa ni Michelle, isang kilalang socialite raw ang magka-cut ng ribbon mamaya at may ilan ding kasamang artista, ilang mall executives at maging mismong event coordinator na rin.

"Sana pala hindi ko dinala si Iris." Wika ko pa saka niyuko iyong batang hawak ko na kasalukuyang naglilikot ang mga bata sa kakatingin sa mga tao sa paligid nito at kumakaway pa sa kanila na siya namang ikinaka-tuwa no'ng iba pa naming kasama.

"Bakit nasaan iyong kumara mong tumatayong baby sitter din d'yan sa anak mo kapag wala ka?" Tanong ni Michelle na ang tinutukoy ay si Bea.

"Hindi ko rin alam. May mga pagkakataon talaga na bigla siyang nawawala ng ilang araw o linggo doon sa apartment complex namin," sagot ko sabay napabuntong-hininga matapos maalala iyong note na iniwan ni Bea sa letter box ko.

"Alam mo, nahihiwagaan pa rin talaga ako d'yan sa kaibigan mo na 'yan!" Komento ni Michelle. Maging ako ay gano'n din ay may ganoong pakiramdam kay Bea pa-minsan-minsan lalo pa kapag nawawala ito nang walang pasabi.

Hindi lang kasi siya basta-basta 'nawawala'. Literal na parang binubura nito iyong existence niya sa mundo sa tuwing nawawala ito sa amin. May isang beses pa nga na naabutan kong bukas iyong inuupahan niyang apartment at ang mga gamit na lang na natitira doon ay iyong mga default na gamit na nandoon kapag may bagong rerenta o titingan doon sa unit.

Bigla siyang nawawala na tila ba may pinagtataguan siya at hindi niya gustong may makaalam o makakita ng mga bakas niya.

"Sigurado ka bang magandang impluwensya 'yan kay Iris Selene?" Kumpletong banggit ni Michelle sa pangalan ng anak ko. "Hindi naman sa nagiging judgmental tayo, ano? Pero may kakaiba talaga sa babae na iyon e! Hindi ko lang ma-point out kung ano."

Iris Selene. Iyan ang ipinangalan ko sa anak ko na sinunod sa pangalan ng dalawa sa Greek Goddess: Iris, one of the goddess of sea and the sky at Selene naman para sa goddess of the moon. Nakuha ko ang inspirasyon na ito base na rin sa kung saan nabuo si Iris at kung paanong isinunod din sa pangalan ng Greek God ang pangalan ng ama nito at kung saan lumaki ito na napapalibutan ng tubig ng isla ng Alta Pueblo.

"Michelle, nakalimutan mo na ba na kayo lang ni Bea ang naging katuwang ko no'ng pinagbubuntis ko 'tong si Iris?" Pagpapaalala ko sa kanya. "Isa pa, kung hindi dahil sa kanya, hindi ako agad masusugod sa ospital no'ng biglang pumutok iyong patubigan ko."

"Ah! Oo nga pala!" Natatawang sabi pa nito. "Na-kwento mo nga pala iyong bigla niyang pagmaneho doon sa tricycle no'ng kapit-bahay n'yo sa sobrang panic na madala ka sa ospital agad."

"Kaya nga huwag mo nang kuwestyonin iyong impluwensya ni Bea sa anak ko," turan ko pa sa kanya. "Isa pa, kahit may iba rin akong nararamdaman para kay Bea, alam ko naman na mabuting tao talaga siya."

"Okay. Sabi mo e! Ikaw ang nanay kaya ikaw laging may say sa anak mo." Kibit-balikat na sabi na lang ni Michelle. "O, siya! Mamaya mag-ready ka, ha? Kapag may tumingin doon sa gawa mo, kausapin mo agad! Malay mo bilhin, hindi ba?"