အတိတ်မေ့နေသောကျောင်းလူဆိုးလေးနှင့်ဟန်ဆောင်တွဲခြင်း[မြန်မာဘာသာပြန်](Completed)

//Chapter 4//

Unicode

ရှီပုဖန်၏ခေါင်းထက်တွင် ချုပ်ရိုးရာအနည်းငယ်ရှိနေပေမဲ့လည်း ယင်းက ကြမ်းကြုတ်၍အဟန့်ကောင်းသည့်သူ့အမူအရာကို ပိုလို့တောင်မဖုံးကွယ်နိုင်ပေ။

သူ ကုတင်အုံးတားပေါ်မှာ ခေါင်းမှီကာလှဲလိုက်ပြီး ကျန်းယွမ်ပိုင်၏အိပ်ယာကို အရေးမစိုက်ဘဲနေရာယူလျက်။ သူ ကုတင်တစ်ခုလုံးပေါ်မှာ ခြေပစ်လက်ပစ်လဲလျောင်းလိုက်တော့ ကုတင်ပိုင်ရှင်ဖြစ်သူ ကျန်းယွမ်ပိုင်ခမျာ ရွေးချယ်စရာမရှိဘဲ သူ့ဆုံလည်ကုလားထိုင်ပေါ်မှာ ကျိုးကျိုးနွံနွံသွားနေရလေသည်။

အော်ဒါမှာခါနီးတွင် ရှီပုဖန်၏ဒဏ်ရာကိုထည့်သွင်းစဉ်းစားမိပြီးနောက် ဟော့ပေါ့အစပ်ကို စွန့်ပစ်ဖို့ ဆုံးဖြတ်လိုက်၏။ ထိုအစား သူ အခြားပေါ့ပါးသည့်စားစရာအချို့သာ မှာလိုက်သည်။ မှာထားတာတွေနဲ့အတူ အစားအစာပို့တဲ့သူရောက်လာတဲ့အချိန် ကျန်းယွမ်ပိုင် သူ့ခြေဖဝါးကို ဖိနပ်ပါးထဲထိုးသွင်းလိုက်ပြီး အခန်းအပြင်ဘက်သို့ ပြေးထွက်သွားလိုက်၏။ သူ အစေခံတစ်ယောက်လို ဆက်ဆံခံနေရတာပင်။

စားစရာတွေယူပြီးတာနဲ့ သူတံခါးကိုခေါက်ကာ သူ့ညီလေးကို ခေါ်လိုက်သည်။
“ ယိုရှို့?”

ကျန်းယိုရှို့က ထိုင်၍ သူ့PS4နှင့် ဗီဒီယိုဂိမ်းကစားနေတာပင်။ သူ ကျန်းယွမ်ပိုင်ဘက်ကို လှည့်လိုက်ပေမဲ့ သူ့နားကြပ်ကိုတော့ တပ်ထားဆဲ။ ကျန်းယွမ်ပိုင် သူ့ကို မစ်တီးဘူးပေးကာ ပြောလိုက်သည်
“ ဒါမင်းအတွက် ”

“ အဲ့မှာထားခဲ့လိုက်”

ထို့နောက် သူ စခရင်ဘက်ကို တစ်ဖန်မျက်နှာပြန်လှည့်သွားသည်။ ကျန်းယွမ်ပိုင် ၎င်းအား သူ၏ဘေးတွင်ထားလိုက်ကာ ဆက်ပြောလိုက်၏
“ မင်းဟာထဲမှာ ငါရေခဲနည်းနည်းပဲထည့်ထားတယ်။ အရမ်းအေးတာသောက်ဖို့အတွက်ကျ ရာသီဥတုကအေးလွန်းတယ်လေ”

ကျန်းယိုရှို့ရဲ့မျက်လုံးတွေက စခရင်ကနေ မခွာလာသော်ငြား ယဉ်ယဉ်ကျေးကျေးပြောလိုက်သည်။
“ ကျေးဇူးပါ ကော”

ကျန်းယွမ်ပိုင်က သူ့တုံ့ပြန်မှုနှင့်ပတ်သပ်၍ ကျေနပ်လေသည်။ သူ့ညီလေး၏ခေါင်းကို ပုတ်ပေးလိုက်ပြီး သူ့အခန်းသို့ပြန်လာလိုက်သည်။ သူ ရှီပုဖန်အတွက် ဆန်ပြုတ်ကို ကုတင်ဘေးရှိစားပွဲတွင် ထားလိုက်ပြီးနောက် လေ့ကျင့်ခန်းမေးခွန်းတွေလုပ်ဖို့အတွက် သူ့မစ်တီးဘူးကို ယူလာလိုက်သည်။ တစ်ခဏကြာပြီးနောက် ရှီပုဖန်က နေရာကနေမလှုပ်သေးမှန်း သူသတိထားမိသွား၏
“ ရှီပုဖန်?”