Duo Meng《夺梦》// Seizing Dreams Translation

Chapter 6

{Unicode}

[Vol-1: The Great Wall]
ဆင်နတ်ဘုရား

ထိုအခိုက်အတန့်ပြီးနောက်, မဟူရာနဂါးကြီးက ကျယ်ကျယ်လောင်လောင် ဟိန်းဟောက်အော်ဟစ်လိုက်ပြီး ကွေ့ကောက်လိမ်ဖယ်နေသော မြွေသတ္တဝါအလား အာကာယံထက်မှ အန္တရာယ်များလောက်သည့်အရှိန်အဟုန်ဖြင့် အောက်သို့ထိုးဆင်းလာခဲ့လေသည်။

" ငါတို့ကိုရှာတွေ့သွားပြီ! "

Generalက လျင်လျင်မြန်မြန်မတ်တပ်ရပ်လိုက်ပြီး အော်ဟစ်လေတော့သည်။

" ပြေး!! "

ယွီဟောက်ကမူ နန်းတော်ဆီသို့ ဝင်ပြေးချင်ပါသော်လည်း Generalက သူ့လက်ကို လှမ်းဆွဲလိုက်ပြီး -

" အလျင်စလိုမလုပ်စမ်းနဲ့! "

ယွီဟောက်ကပြန်ပြောလိုက်လေသည်။

" ဒါပေမယ့် ကျွန်တော်တို့နဲ့ အရမ်းနီးနေပြီကို! "

မိမိတို့၏ပန်းတိုင်က မျက်စိရှေ့လေးတင်ရောက်နေပြီဖြစ်သော်ငြား လက်လျှော့လိုက်ရတော့မည်တဲ့လား။ ယွီဟောက်ခမျာ စိတ်ဆိုးမာန်ဆိုးဖြင့် ပင့်သက်ရှိုက်လိုက်ပြီး‌နောက် Generalနှင့်အတူ ဈေးတန်းရှိရာထံသို့သာ ပြန်ပြေးကြလေသည်။ သို့သော်လည်း မျက်တောင်တစ်ခတ်အတွင်းမှာပင် ကောင်ကင်ဘုံနှင့် ကမ္ဘာမြေကြီးအကြား အရာအားလုံးပြောင်းလဲသွားလေသလား - တိမ်မည်းများက အာကာယံဝယ် တလိပ်လိပ်တက်လာလျက်၊ မိုးကြိုးမုန်တိုင်းများက တဂျိမ်းဂျိမ်းဖြင့် တစ်ခုပြီးတစ်ခုပစ်ခတ်ပေါက်ကွဲလျက်၊ လျှပ်စီးကြောင်းများဟာလည်း မဟူရာရောင်နဂါးကြီး ပတ်ပတ်လည် တဖျပ်ဖျပ်အသံမြည်ကာ လက်သွားလေ၏။ ထိုသတ္တဝါမှ ပါးစပ်ဟကာ ပြင်းပြင်းထန်ထန်ရေစီးသန်လှ‌သော မည်းမည်းနက်နက်ရေလှိုင်းလုံးများကို မှုတ်ထုတ်လိုက်ပြီး လမ်းမကြီးတစ်ခုလုံးကို ရေလွှမ်းသွားစေပါသည်။

လမ်းမဘေးရှိအိမ်‌ခြေများမှာ တစ်ခုပြီးတစ်ခု ရေလှိုင်းလုံးများအောက် ဝါးမျိုခြင်းခံလိုက်ရပြီး မြို့တစ်မြို့လုံးဟာလည်း ကျယ်ပြောလှသောရေပြင်ကြီးအဖြစ် ပြောင်းလဲသွားရလေသည်။ ကြီးမားလှသောမြို့ကြီးအတွင်း အိမ်ခြေများ၏ ခေါင်မိုးလေးများကိုသာ ရေမျက်နှာပြင်ထက်ဝယ် မြင်တွေ့ရလေတော့သည်။