{Unicode}
[Vol-2: Chichén Itzá]
သေနတ်သံ
ကျိုးရှန်းလက်ထဲမှ ကျင်းကူးပန့်သည် တုန်ခါလာခဲ့ပြီးနောက် တစ်စတစ်စ ရှည်ထွက်လာကာ တစ်ဖက်တောင်စောင်းနှင့် သွားရောက်ဆက်သွယ်လျက် နှစ်ယောက်သားအား တံတားသဖွယ် အသုံးပြု၍ရအောင် စီစဉ်ပေးလေသည်။
"သတိထားဦး"
ကျိုးရှန်းက စိတ်မပါသည့်လေသံဖြင့် ဆိုသည်။ သူသည် ကျင်းဝူးစက်ဝန်းတစ်ဖက်ရှိ အသင့်စောင့်ဆိုင်းနေကြသော နဂါးနှင့် စစ်သားအုပ်စုကို ဒီဘက်သို့ဆင့်ခေါ် ဖို့ရာ ချန်းယဲ့ခိုင်ထံမှ ဘယ်လိုခွင့်ပြုချက်တောင်းရမလဲကို စဉ်းစားနေခြင်းဖြစ်၏။
လမ်းတစ်လျှောက်တွင်လည်း ချန်းယဲ့ခိုင်အား သူ့ထံတွင် နဂါးတစ်ကောင်ပိုင်ဆိုင်ကြောင်း၊ ထိုနဂါးကို အနှီအိမ်မက်ထဲတွင်ပေါ်လာစေချင်ကြောင်း၊ အမျိုးမျိုးပရိယာယ်သုံးပြီး ကြိုးစားခိုင်းကြည့်သော်လည်း အားလုံးအချည်းအနှီးသာ ဖြစ်နေလေ၏။ အခြားလိုအပ်ချက်တစ်ခုခုရှိသေးလို့ဖြစ်မယ်...... ကျိုးရှန်းတွေးမိသည်။
"မင်းနဲ့ ယွီဟောက်က...... ခင်လာတာကြာပြီလား?"
ကျင်းကူးပန့်ပေါ်တွင် လျှောက်နေရင်း ချန်းယဲ့ခိုင်က မသိမသာ မေးခွန်းထုတ်သည်။
"မကြာသေးဘူး"
သူ ယွီဟောက်ကို ဘယ်လိုကယ်ဆယ်ခဲ့ကြောင်း ကျိုးရှန်းက အကြမ်းဖျင်းရှင်းပြလိုက်သည်။
ချန်းယဲ့ခိုင်, "ထင်တဲ့အတိုင်းပါပဲ"
ကျိုးရှန်းတွေးမိလိုက်သည်။ ချန်းယဲ့ခိုင်တစ်ယောက် အနှီမေးခွန်းကိုမမေးမှီ စိတ်ထဲ များစွာသောအဖြေများ ကောက်ချက်ချထားလောက်၏။ ယွီဟောက်၏ ယခင်က ကိုယ့်ကိုယ်ကိုအနာတရဖြစ်အောင် ကြံစီတတ်သော အမူအကျင့်များအပါအဝင်ပင်။
ရုတ်တရက် ချန်းယဲ့ခိုင်က ရပ်တန့်သွားသည်။
အကာအရံဟူ၍ တစ်စိုးတစ်စိမျှမရှိသော ကျင်းကူးပန့်အပေါ်တွင် မတ်တပ်ရပ်နေကြရင်း ကျိုးရှန်းသည် တစ်စုံတစ်ရာကို အာရုံခံမိလိုက်၏။ အောက်ဘက်ရှိ အဆုံးမဲ့အသုတရာချောက်နက်ကြီးထဲမှ တစ်စုံတစ်ခုက လျင်လျင်မြန်မြန် အပေါ်သို့တက်လာနေသည်ပင်!
YOU ARE READING
Duo Meng《夺梦》// Seizing Dreams Translation
Fantasy• Author : 非天夜翔 ( Fei Tian Ye Xiang ) • 2018 Released • 165 Chapters • Genre : Action, Adventure, Fantasy, Romance, Yaoi • English Translator : Zryuu I don't own any of this novel, just fan translation. Everything belongs to original author. Both Z...
