[Zawgyi]
အခန်း ၆၅၁ ရင်သပ်ရှုမောဖွယ် အမျိုးသားနှစ်ဦး
ကုနင်းသည်တော့ အင်တာနက်ပေါ်တွင် သူမအကြောင်း ဗီဒီယိုများထပ်ပျံ့နေသည်ကို မသိခဲ့သလို သိခဲ့ရင်တောင်မှ ဂရုစိုက်နေမည့်သူမဟုတ်ပေ။
လင်ရှောင်းထင်နှင့်ကုနင်းတို့ အိမ်မှစထွက်လာသည်က မနက်၁၀နာရီကတည်းမှဖြစ်ကာ လမ်းတွင်ကြန့်ကြာနေခဲ့တာကြောင့် ဟိုတယ်သို့ရောက်ချိန်တွင် နေ့လည်၁၂နာရီထိုးခါနီးနေပေပြီ။
“နင်တို့ဘာလို့ ဒီလောက်ကြာနေတာလဲ?” ချောင်ဝမ်ရှင်းမေးလိုက်သည်။ ဤသည်မှာ သူမအပြစ်တင်လိုခြင်းကြောင့်မဟုတ်ဘဲ ကုနင်းတို့ တစ်ခုခုဖြစ်နေမည်ကို စိုးရိမ်ခြင်းကြောင့်သာ။ အစကတော့ လမ်းကြောပိတ်နေ၍နောက်ကျခြင်း ဖြစ်မည်ဟု ချောင်ဝမ်ရှင်းတွေးခဲ့ပေမည့် ၁နာရီကျော်လောက်ကို နောက်ကျနေခဲ့ခြင်းဖြစ်သည်။
“လမ်းမှတစ်ခုခုဖြစ်လာလို့။” ကုနင်း အလုံးစုံမရှင်းပြသလို ချောင်ဝမ်ရှင်းကလဲ ကုနင်းတို့ရောက်နေပြီဖြစ်၍ အသေးစိတ်ထပ်မမေးခဲ့ပေ။
သူတို့လက်မှတ်ဝယ်ထားသည့် လေယာဉ်မှာ နေ့လည်၁နာရီ၅၀တွင် စတင်ထွက်ခွာမည်ဖြစ်တာကြောင့် မြန်မြန်လေး နေ့လည်စာကိုစားကာ လေဆိပ်သို့သွားမှ ဖြစ်ပေတော့မည်။ သူတို့အတွက် နေ့လည်စာစားချိန်သိပ်မရတော့တာကြောင့် ၁၂နာရီခွဲမတိုင်မီ နေ့လည်စာကို ပြီးအောင် အမြန်စားလိုက်ကြသည်။
ပုံမှန်ဆိုလျှင် လေဆိပ်သို့သွားဖို့ရန် ၁နာရီလောက်သာလိုတာကြောင့် သူတို့အတွက် အချိန်လုံလုံလောက်လောက်ရှိသည်မှန်သော်လည်း လမ်းတွင် ကားပိတ်တာများဖြစ်လာနိုင်သေးတာကြောင့် စောစောသွားကာမှ တော်ကာကျပေမည်။
ရှန်းရှစ်လုပ်ငန်းစုမှကားကိုပင် လင်ရှောင်းထင်မောင်းကာ လေဆိပ်သို့ထွက်လာခဲ့သည်။ ဤသို့ဆိုလျှင် လေဆိပ်တွင် ဒီအတိုင်းကားရပ်ထားခဲ့လို့ရကာ သူ့ဝန်ထမ်းတစ်ဦးဦးက ကားလာပြန်ယူသွားပေးပေလိမ့်မည်။
သူတို့အဖွဲ့တွင် ချောမောလှသည့် ကောင်လေး၊ ကောင်မလေး ၄ဦးတောင်ပါဝင်တာကြောင့် လေဆိပ်ထဲသို့ဝင်လိုက်သည်နှင့် လူအများ၏အာရုံကို ဖမ်းစားထားနိုင်ခဲ့သည်။
