[Unicode]
အခန်း ၆၈၇ လင်းလိကျွမ်းရူးသွားပြီ
လင်းလိကျွမ်းမှာ တစ်ချိန်လုံးဝမ်းနည်းပူဆွေးနေကာ လင်းမိသားစုအိမ်၏ အေးချမ်းနေသာသည့် အခြေအနေကို ဖျက်ဆီးနေတာကြောင့် ဘယ်သူမှ စိတ်သက်သက်သာသာမရှိတော့ပေ။
ကျန်းမေယွိကတော့ လင်းလိကျွမ်းကို ကလေးများမျက်နှာကိုထောက်ကာ ကုချင်းရှန်နှင့် မကွာရှင်းရန်အတွက် ဖြောင်းဖျပြောဆိုသည်။ ကုချင်းရှန်သာ သူမအပေါ် ဆက်ပြီး မဖောက်ပြန်တော့ပါက ဘဝကို ကောင်းကောင်းမွန်မွန်အတူတကွ ဆက်လက်ဖြတ်သန်း၍ရသည်ဟုပင်။ သို့ပေမည့် လင်းလိကျွမ်းကတော့ ဝမ်းနည်းပူဆွေးနေစဲဖြစ်ကာ ကျန်းမေယွိ၏အကြံကို လက်မခံတာကြောင့် ကျန်းမေယွိလဲ လက်လျှော့လိုက်ရတော့သည်။
လင်းလိကျွမ်းနှင့်သိပ်ပြီးစကားစမြည်မပြောချင်တာကြောင့် ကျန်းမေယွိလဲ အားလပ်ချိန်ရသည်နှင့် အပြင်ထွက်ကာ သူငယ်ချင်းများနှင့် ဈေးဝယ်ထွက်ခြင်း မာကျောက်ကစားခြင်းများပြုလုပ်သည်။
ထိုအချိန်တွင်တော့ ကျန်းမေယွိသည် မီးဖိုခန်းထဲတွင် ချက်ပြုတ်နေကာ လင်းလိကျွမ်းသည်တော့ ဧည့်ခန်းထဲတွင်ပင် စိတ်လွတ်နေသည့်အမူအရာဖြင့် ထိုင်နေခဲ့သည်။
လင်းယွဲ့ဟောင်သည်တော့ ဆိုဖာပေါ်တွင် မှီလှဲနေကာ ဖုန်းကစားနေသည်။
တီဗီတွင် ကြော်ငြာတစ်ခုပြီးနောက် သတင်းကြေညာသူမိန်းကလေးမှနေပြီး “ဖက်ရှင်သတင်းအစီအစဉ်ကနေ ပြန်လည်ကြိုဆိုလိုက်ပါတယ်။ ဒီနေ့ကတော့ JadeBeautyလက်ဝတ်ရတနာလုပ်ငန်းနဲ့Charmရဲ့ သတင်းထုတ်ပြန်ပွဲသတင်းကို ထုတ်လွှင့်ပြသွားမှာပဲဖြစ်ပါတယ်။”
ထိုစကားကြောင့် လင်းလိကျွမ်းရော လင်းယွဲ့ဟောင်ပါ အံ့ဩတကြီးနှင့် တီဗီကိုကြည့်လိုက်ကြသည်။ JadeBeautyလက်ဝတ်ရတနာလုပ်ငန်းဆိုသည်မှာ ကုနင်း၏လုပ်ငန်းဖြစ်ကြောင်း သူတို့အားလုံးသိထားပြီးဖြစ်တာကြောင့် အာရုံစိုက်နားထောင်လိုက်ကြသည်။
ကြေညာသူမှဆက်ပြီး သတင်းထုတ်ပြန်ပွဲအကြောင်းကို မပြသခင် JadeBeautyနှင့်Charmအကြောင်းကို မိတ်ဆက်ပေးနေသည်။
