Love and redemption (琉璃美人煞)Myanmar Translation

အပိုင်း( ၅၄ )ချွီရူအကြောင်း အမှန်တရား ( ၁)

ထို့နောက် သူတို့ခြောက်ယောက်သည် ဓားပျံကို စီးနင်းလျက်ဟိုင်ဝမ်တောင်သို့ ပျံသန်းသွားလိုက်ကြသည်။ယခင်တစ်ခေါက်တုန်းက ကြိုတင်ပြင်ဆင်မှုမရှိဘဲ  မဆင်မခြင် ပြေးသွားမိသဖြင့် ဆုံးရှုံးမှုကြီးကြီးမားမား ခံစားခဲ့ရလေရာ
ဤတစ်ကြိမ်မှာတော့ သူတို့ခြောက်ယောက်သည် လိုအပ်သမျှကို ယူဆောင်လာကာ  အနောက်တောင်ပေါ်သို့ အရောက်တွင် ရပ်တန့်လိုက်ကြသည်။

"ထပ်ပြီးအဲ့အနံ့ပဲ " လင်းလုံက နှာခေါင်းပိတ်လိုက်ရင်း မျက်မှောင်ကြုတ်လိုက်သည်။ "မနေ့ကဒီလောက်အများကြီးသတ်ခဲ့တာတောင် ဒီနေ့ဆက်ပြီးရှိနေသေးတယ် "

ယွီစီးဖုန့်က ရွှမ်ကျီးအား  လက်ဟန်တစ်ခုလုပ်ပြလိုက်သည်။သူမက ချက်ချင်းသဘောပေါက်သွားပြီး ခြောက်ယောက်သား ဖြန့်ကျဲလိုက်ကြကာ ကောင်းကင်အလယ်တွင် စက်ဝိုင်းတစ်ခုပုံစံဖန်တီးလိုက်ကြပြီး တိုက်ခိုက်ဖို့ရာ အသင့်ပြင်လိုက်ကြသည်။ ရွှမ်ကျီးက ရင်ဘတ်အတွင်းမှ မီးစာတစ်ခုကို ထုတ်ယူလိုက်ပြီး မြေပြင်ပေါ်သို့ပစ်ချလိုက်၏။

နောက်ထပ် "ဘန်းခနဲ "အသံနှင့်အတူ အရပ်မျက်နှာတစ်ခွင်လုံး နေ့အလင်းရောင်ကဲ့သို့ လင်းထိန်သွားခဲ့သည်။ တောင်စောင်းထက်၌ မရေမတွက်နိုင်သော အနက်ရောင်အစက်အပြောက်များဖြင့် ပြည့်ကျပ်နေခဲ့ပြီး အကုန်လုံးမှာ ခေါင်းသုံးလုံးနှင့် ချွီရူငှက်ချည်းသာပင်။ ယမန်နေ့က တစ်အုပ်အား သတ်ဖြတ်ခဲ့ခြင်းမှာ အနည်းငယ်ပင် အကျိုးမထူးကြောင်းမှာ သိသာထင်ရှားနေပြီဖြစ်ကာ ၎င်းတို့က ယနေ့တွင် ထပ်မံ၍စုဝေးနေကြပြန်လေပြီ။

ချွီရူငှက်များသည် အလင်းရောင်​၏ရန်စမှု​ကို ခံလိုက်ရသောအခါ တောင်ပံများကို ဖြန့်လိုက်ကြပြီး ပျံတက်လာကြတော့သည်။ သူတို့ခြောက်ယောက်သည် ၎င်းတို့ပျံလာသည်နှင့် သတ်ဖို့ရန် အသင့်ပြင်လိုက်ကြသော်လည်း ထိုငှက်များမှာ ယမန်နေ့ကကဲ့သို့ မဟုတ်ဘဲ လေထဲတွင်သာ ခပ် နိမ့်နိမ့် လှည့်ပတ်ပျံသန်းလျက် အော်မြည်နေကြပြီးနောက် ထပ်မံ၍ ပြန်ဆင်းသွားကြပြီး တိတ်ဆိတ်သွားတော့၏။

"အာ သူတို့လည်းငါတို့က အစွမ်းထက်မှန်းသိသားပဲ !လင်းလုံက ကျီစယ်လိုက်သည်။