I'm Not A Girl |TK|✓

နဂါးမင်းသမီးလေးပုံပြင်

(Unicode)

အပိုင်း - ၁၇

တစ်ခါတုန်းက နဂါးတွေအုပ်စိုးတဲ့တိုင်းပြည်ကြီးတစ်ခုမှာ အလွန်လှပတဲ့မင်းသမီးလေးတစ်ပါးရှိသတဲ့ ။ အဲ့ဒီမင်းသမီးလေးဟာ သိပ်ကိုလှပလွန်းတော့ နဂါးဘုရင်ကြီးဟာ သူ့ရဲ့သမီးတော်လေးကိုစိတ်မချနိုင်တာကြောင့် ဘုံခုနှစ်ဆင့်မြင့်တဲ့ ရတနာကိုးပါး မျှော်စင်ကြီးတစ်ခုကို ကြီးမားလှတဲ့‌တောကြီးအတွင်း ဆောက်လုပ်စေပြီး မင်းသမီးလေးကို ရတနာကိုးပါးဘုံနန်းစံစေခဲ့တယ် ။ ငယ်ရွယ်စဉ်ကတည်းက စိတ်အလိုရှိရာမှန်သမျှကိုရခဲ့တဲ့ မင်းသမီးလေးဟာ သိပ်ကိုကံကောင်းတယ်လို့ထင်ရပေမဲ့ သူမရဲ့အသက်တစ်ဆယ့်ခြောက်နှစ်မှာတော့ မနာလိုသူအောက်လမ်းပညာသည်တစ်ယောက်ရဲ့ ကျိန်စာကိုခံယူခဲ့ရတယ် ။

အနှီအောက်လမ်းပညာက ယုတ်ညံ့လွန်းပြီးအစွမ်းထက်လွန်းတာကြောင့် ဘယ်အထက်လမ်းပညာရှင်ကမှ ဖယ်ထုတ်နိုင်စွမ်းမရှိခဲ့လေဘူး...။ ဒါ့အပြင် ကျိန်စာရဲ့သဘောတရားက ကူးစက်နိုင်စွမ်းရှိတာကြောင့် နဂါးတိုင်းပြည်တစ်ခုလုံးက မင်းသမီးလေးကို တိုက်ပိတ်အကျဉ်းချထားဖို့ရန်အတွက် တောင်းဆိုခဲ့ကြတယ် ။ နဂါးဘုရင်ကြီးက သူ့ရဲ့သမီးလေးကို သိပ်ချစ်ပေမဲ့ သူဟာ ဘုရင်တစ်ပါးဖြစ်နေတာကြောင့် သူ့ရဲ့တိုင်းသူပြည်သားတွေကိုကာကွယ်ပေးဖို့ တာဝန်ကရှိနေပြန်ရော ။ ဒါကြောင့် နဂါးဘုရင်ကြီးဟာ ရင်နာနာနဲ့ပဲ သူ့ရဲ့ချစ်လှစွာသောသမီးတော်လေးကို ရတနာကိုးပါးဘုံနန်းရဲ့ အပေါ်ဆုံးထပ်မှာပိတ်လှောင်ထားခဲ့ရလေတယ် ။ ထိုနေ့မှစပြီး မည်သူတစ်ဦးတစ်ယောက်ကမျှ ထိုဘုံနန်းဘက်ကို ခြေဦးတောင်မလှည့်ကြလေတော့ဘူး ။

သနားစရာကောင်းလှတဲ့မင်းသမီးလေးဟာ သူ့ရဲ့ကျန်ရှိတဲ့သက်တမ်းတစ်လျှောက်မှာ ကျိန်စာကြီးကိုပွေ့ပိုက်ပြီး ဝမ်းနည်းအထီးကျန်စွာနဲ့ကုန်ဆုံးရတော့မယ်မှန်းသိတာကြောင့် ညစဉ်ငိုကြွေးခဲ့လေတယ် ။ နဂါးတို့ရဲ့သဘာဝအရ နှစ်ထောင်ချီပြီးအစာမစားပဲနေနိုင်ပေမဲ့ သူမရရှိခဲ့တဲ့ကျိန်စာကြောင့် သူမရဲ့သက်တမ်းဟာ နောင်သုံးနှစ်သာ အသက်ဆက်ရှင်နိုင်တော့မည်သာ ။ သိပ်ကိုကြောက်ဖို့ကောင်းတဲ့ ကျိန်စာက ထိုသုံးနှစ်အတွင်းမှာ သူမကို တစ်ဖြေးဖြေးနဲ့ လူသေကောင်လိုပုတ်သိုးလာစေမှာဖြစ်တယ် ။ ထို့ကြောင့် မင်းသမီးလေးဟာ မွေးရာပါလှပလွန်းတဲ့ သူမကိုယ်ကိုအပြစ်တင်စိတ်နဲ့ ညစဉ်ညတိုင်းနာကျည်းစွာငိုကြွေးခဲ့လေသတဲ့ကွယ် ။