Unicode
နောက်ထပ်တစ်လနှင့် တစ်ဝက်ကုန်ဆုံးသွားခဲ့၏။
တစ်လုံးတွင် ဧပြီလဦးပိုင်းမှာ မြို့၏ အကောင်းဆုံးရာသီဖြစ်လေသည်။ ရွှမ်းချန်ချောင်းဘေးနားပေါက်ရောက်နေသည့် မိုးမခပင်အိုကြီးများတွင်ဝယ် အစိမ်းရောင်ရွက်နုလေးများ ထွက်လို့နေချေပြီ။ မိုးမခပင်တစ်ပင်စီ၏ သိပ်မမြင့်သော အလယ်နေရာတွင် ရွှေအိုရောင်ပွင့်များ ခက်ယှက်ကာ ပွင့်လန်းလျက် ယိမ်းနွဲ့နေကြသည်။
ကျောင်းဝန်းထဲရှိ ဥယျာဉ်ငယ်ထဲမှ မီးလျံနှင်းဆီနီတို့မှာ ပိုလို့တောင် မျက်စိပဒေသာဖြစ်စေပါ၏။
နွေဦးမှာ ဆောင်းရာသီနှင့် မတူ။ မိုးရွာသည်ဖြစ်စေ၊ လေတိုက်သည်ဖြစ်စေ အနည်းငယ် ငြင်သာသည့် ခံစားမှုမျိုးပေးအပ်နိုင်စွမ်းရှိသည့် ရာသီပင်။
ထိုနေ့က မိုးဖွဲဖွဲလေးများကျနေပြီး နွေဦး၏ လေညှင်းများမှာ စိမ့်စိမ့်လေး အေးနေသည်။ ကျန်းမန့်နှင့် ချန်ဖေးအာတို့မှာ ညနေစာအတူစားပြီးနောက် စာသင်ဆောင်ထဲသို့ ပြန်လာခဲ့ကြသည်။ အလင်းဖောက်အကြည်ရောင် ထီးကို ပိတ်လိုက်ပြီး ထီးပေါ်တွင် တင်ရစ်နေသော မိုးရေစက်များကို ဖြည်းဖြည်းချင်း ခါချလိုက်သည်။
သူမက ဒုတိယအထပ်ကို တက်သွားလိုက်သည့်အခါ အနက်ရောင်အခန်းဘက်၌ အဝင်အထွက်လုပ်နေသော အတန်းဖော်များကို တွေ့လိုက်သည်။ သူတို့မှာ ပုခုံးချင်းဖက်လျက် မျက်စိတစ်ဖက်မှိတ်ပြ၍ စနောက်ကျ၊ ဟာသပြောကြနှင့် သူမ ရောက်လာသည်ကို တွေ့သည့်အခါ တစ်ယောက်ပြီးတစ်ယောက် လှမ်းနှုတ်ဆက်ကြသည်။
ကျန်းမန့် သူတို့ကို လက်ဝေ့ယမ်းကာ ပြုံးပြသည်။
အတူတူ နှစ်လလောက် ဖြတ်သန်းခဲ့ကြအပြီးတွင် အတန်းဖော်ဆယ့်တစ်ယောက်၏ ဆက်ဆံရေးမှာ တိုးတက်ပြီးရင်း တိုးတက်လာနေသည်။
ပြိုင်ပွဲဝင်ရန် ပြင်ဆင်နေကြသော ကျောင်းသားများမှာ သိပ်ကို ရိုးရှင်းကြသည်။ သူတို့က ကြက်ဥတွေအားလုံးကို ခြင်းတစ်ခြင်းထဲ ထည့်ထားကြပြီး (တစ်ဖက်တည်းကိုပဲ ပုံအောထားပြီး) များများစားစား မစဉ်းစားထားကြ။
YOU ARE READING
(Completed) An Encounter With Your Younger Self (Myanmar Translation)
RomanceRebirth Plan to Save the Leader (completed) [ ပြန်လည်မွေးဖွားလာပြီးနောက် ဉာဏ်ကြီးရှင်ကို ကယ်တင်ခြင်း အစီအစဉ် ] မြန်မာဘာသာပြန် ⚠️Disclaimer I'm not the owner of the story. All the credits go to the original author. [Please don't repost any of my tr...
