ချစ်သူ၏လက်အစုံဖြင့် ထွေးပွေ့လှည့်ပါ (COMPLETED)

Extra (4)

''ဒီနားလေးကို ချလိုက်လေ ချမ်းမြေ့"

ရှင်းမြတ်လက်ညှိုးထိုးပြသည့်နေရာကို ချမ်းမြေ့ကြည့်ပြီး
တစ်ဖန်မီးရောင်ပြိုးပြိုးပြက်ပြက်လက်နေတဲ့
ဇာတ်စင်ထက်ကြည့်၏။ယခုဖျာချမည့်နေရာက
အနောက်ဘက်ကျကာ ဇာတ်စင်နဲ့မဆိုသလောက်
အလှမ်းဝေးပေမယ့် ဇာတ်စင်တည့်တည့်ကျသည်မို့
မြင်ကွင်းရှင်းလင်းလှပေသည်။
ထို့ကြောင့် ရှင်းမြတ်စကားကိုနာခံစွာ
သယ်လာသည့်ဖျာကို ထိုနေရာသို့ချခင်းလိုက်သည်။

''အမေ ဒီမှာလာထိုင်"

ဘေးနားရပ်နေသည့်မိခင်ဖြစ်သူကို အလယ်မှာနေရာချပေးပြီး ရွှင်လန်းလက်ထဲမှရေဘူးနှင့်
တစ်ခြားအသုံးအဆောင်အချို့ထည့်ထားသည့်ခြင်းကို
ဘေးနားချလေသည်။

''ပွဲခင်းလိုက်ကြည့်ကြဦးမှာမလား ပွဲမစခင်သွားကြလေ"

အမယ်အိုကလေစလိုက်တော့
ရွှင်လန်းမှအပ ကျန်သူတွေမှာတစ်ယောက်နှင့်တစ်ယောက်
မျက်စပြစ်လိုက်သည်။

''အမေတစ်ယောက်တည်းကျန်နေရစ်မှာပေါ့"

''ငါအမေနဲ့အဖော်ကျန်နေရစ်မယ်၊
လူတွေများလွန်းရင် မျက်စိနှောက်လို့"

''ကြည်နူးကရော"

''အနူးနေရစ်ဘူးနော်...အတူတူလိုက်မှာ"

''ကြည်နူးကိုအတူခေါ်သွားလိုက်လေ...
အပြန်ကျရင် အကြော်စုံနဲ့မုန့်လင်မယားဝယ်ခဲ့ကြအုံး၊
အမေရော ဘာစားအုံးမလဲ"

''ပွဲကြည့်ရင်းအိပ်ချင်ပြေအောင် အချဥ်ပေါင်းပါဝယ်ခဲ့ကြ"

''ဟုတ်ပြီ ဟုတ်ပြီ ဒါပဲမလား"

''အေး...အေး"

''ဒါဆိုသွားပြီနော်"

ချမ်းမြေ့က ရှင်းမြတ်လက်ကိုဆွဲပြီး
ပျော်ရွှင်က ကြည်နူးကိုတွဲကာလေးယောက်သား
ပွဲစျေးကြည့်ရန်မဏ္ဍပ်အပြင်သို့ ထွက်လာလိုက်ကြသည်။

''အနူးကိုအရုပ်ဝယ်ပေးနော် လေးပျော်"

''အနူးကဘယ်အရုပ်လိုချင်တာလဲပြောပါအုံး"

တွဲထားသည့်လက်ကိုဖြုတ်ကာ ကြည်နူးကိုပွေ့ချီရင်း
ပျော်ရွှင်ပြုံးကာကျီစယ်လေတော့ အချွဲလေးကြည်နူးက
အကဲပိုစွာဖြင့် ပျော်ရွှင့်လည်ပင်းကိုသိုင်းဖက်လေသည်။