نهاية الإستفزازية

دولمة

فوك شفت باب غرفه وسام مفتوح وهو متمدد على الجربايه والتلفون بيده يباوع تيكتوك اني بقيت واكفه بالباب وهو اصلا بكل هدوء من شافني حتى متحرك من مكانه او عدل كعدته باوعلي وكال افتحي المجر هذا اليمج تلكين علاكه اخذيها الج ..

المجر جان بصف الباب ففتحته اني لكيت علاكه سوده بيها بيبسي واندومي ونساتل كومه باوعتله باستغراب مجاوبته

فهو كال واخذي وياج الخاولي تلكي معلك وره الباب نشفي شعرج شكد مهمله شعرج ينكط مي وعافني ورجع يباوع على التلفون اني صراحة بقيت مصدومه

ومدري اصلا اتوماتيكيا فعلا مديت ايدي على التعلاكه الوره الباب واخذت الخاولي والعلاكه وطلعت

بس الي اني متفاجئة منه هو مو انو يعني شنو قصده وكذا الان هالشي ميهمني بس اني من جنت اصلا صغيره من اطلع من الحمام ابد ما انشف شعري اصلا الخاولي ما احب استخدمه ابددد واتعجب على الناس النازوكين الي يستعملو للتنشيف تذكرت

((مره من جنه صغار صار نفس الموقف بس الفرق انو اتذكر سبحت وطلعت بالشارع كبل فهو اجه ورايه خله الخاولي على شعري وهو يكول لا تتمرضين امسحي شعرج ماما تكول الي مينشف شعره يتمرض ))

اجه هالموقف بالي كلت اوي شكد مفستق هذا اتخبل من هيج ناس اني اعرف ليش هو انطاني العلاكه بيها حلويات اكيد متقصد حتى يهيني لان حجيت قبل شويه بالمطبخ اوي وشعليه قابل جذب

يلا اهم شي حصلتلي علاكه بلوشي عود عباله راح ارجعها اله نزلت للمطبخ وعمتي بعدهي موجوده كالت ها شيريد

كتلها كلي اخذي علاكه من المجر

كالت وشبيها العلاكه كتلها حلويات وببسي

كالت ياا خاف سمعج من تتعاركين ويه مصطفى

كتلها هيج هو اذنه مال زرقاء اليمامه ويسمع

كالت عمه اذا انتي صوتج فضيحه اكو احد ميسمع يلا خلف الله عليه والله هو خوش ولد راح هو وعمج رضا اليوم للسوك وجاب للجهال كلهم

كتلها عمة يعني شنو اني جاهله هم

ضحكت عمتي وكالت والله عمه انتي الطول طول النخله والعقل عقل الصخله

كتلها هاهيه لعد عمه انتي هم مزاعلتج صايره مثل امي بس تشمرين بسامير

عاد هي كالت يلا يلا لا تتموعين اكلي حتى تصعدين اطلعين الجدر الجبير تلكي بالبيتونه نلف بي دولمه عمتي كالت بالليل نلف دولمه اذا الله راد باجر نطلع الكربلاء لان خطية عمتج تكول حلمانه بالامام العباس وبالكي يفك كربتها ...