نهاية الإستفزازية

حبشكلات

كتله لعد وين وسام كال بقى يم صديقه هسه شويه ويجي
كلت اهوو مو راح يعزل المحل كلي شتردين من المحل كتله اريد حبشكلات كلت نشوف فلم اليوم

كال ديلا فوتي جوه اني راح اجيب كتله ماكو داعي تجيب وتكعد تذلني

ضحك وكلي هسه دخيل ربج حاجي ذالج اني كتله عبالك ما ادري ليش انطيتني الظهر عود داتذلني لان حجيت عليكم

ضحك وكال لا والله بس نقهرت عليج من سمعتج تتوسلين باخوج وهن اصلا زايدات بالغرفه فكلت خلي الزعطوطه تاخذهن

كتله طاحظك قصدك شمرتهن عليه لان متريدهن

بطرف اصبعه ضربني على راسي وهو يكول الساااانج الساااانج انتي الا ينكص يلا ترتاحين

ابتسمت وكلت اسفه
كلي دفوتي فوتي عافني ورجع طلع اجه جايب كوووومه حلويات

انطاني علاكه وكلي هاي كافية لو بعد اني عيوني الا شويه تبجي كلت همزين مكلت الوسام جان راح اشترالي وقشمرني بالافين كتله كاااافية وزيادةةة هم شكراً

وشفت بعد علاكه بيده كلت يجوز هاي اله اخذت العلاكه وضميتها بمكاني السري بالكاونتر وشفته هو دخل جوه بالهول يم الباقين رحت وراه شفته ينطيهم موطات يطلع وينطي من العلاكه جايب للكل ومن خلص انطه العلاكه الامي بالي بقى وكلها هاي للولد خطيه خاف يجون

بيبي سئلته على وسام كللها واحد من اصدقاءة مدعوم ومكسوره ايده وراح هو والولد يوجبو ويجون فد شويه.

عافنه ورها وراح سمعت رنا تكول الامها خطية راح صعد حتى ناخذ راحتنه

امها كالت يلا لعد كومن همن وغسلن الماعين الي صارت هالمره عليجن مايا قبل شويه غسلت مال عشه دزيت بوسات طائرة العمتي نسرين

كامت رنا وسهى هم الي غسلو الماعين واني جنت مقرره اسويلي سهره واكعد نباوع فلم بس امي كالت نامو من وقت حتى باجر نكعد الصبح وره الصلاه نتريك ونطلع الجو حار

اني هم كلت يلا غير يوم تذكرت الحلويات كلت خطية اشتره النه كلنه وهو كلشي ما اخذ وحتى بسبوسه منطيته هاي لو وسام جايبلي جان ذلني ذل ولازم يكعد ياكل وياي فكلت خلي اخذله بسببوسه

رحت للمطبخ جبت ماعون سهى جانت ملتهي تسولف ويه رنا صاير محور كلامها وحياتها كله ميار تكول عبالك هو الهوه همزين اهله سمو ميار مو هوه

المهم عفتهن ورحت الغرفه بيبي خليت خمس قطع بالماعون ورحت صعدت والطريق كله اكول اهووو اني ليش ما اكل وحده خمسه هواي والله بعدين اكول مايا ام نفس الدنيا كبري عقلج اشترالج حلويات يمكن ب٥ الاف وكفت على خمس قطع عندج صينيه شكدها